Ondjorokero onene meyuru
1 Kombunda yoviṋa mbi ami mba zuvire eraka enene nda ri nombosiro tjimuna oyotjimbumba otjinene tjovandu meyuru, amave tja: “Haleluja, tangeye Muhona! Ondjamo nondjozikiro nomasa ovyo ovya Ndjambi wetu! 2 Ozombanguriro ze ozatjiri nozosemba! Eye wa pangurire ingwi omukorondu omunene ngwa zunḓire ehi nouhakohoke we. Eye wa sutisire omukorondu ngwi mena rokutja wa tirahi ombinḓu yovakarere ve.” 3 Nu wina va ravaerere ave tja: “Haleluja, tangeye Muhona! Omuise wotururumo tu twa seseta otjihuro hi otjinene mau rondo kombanda aruhe nga ko nga aruhe!” 4 Novanene mba omirongo vivari na vane novinamuinyo mbi vine vya wora ozongoro navi rikotamene ku Ndjambi ngwa haamene kotjihavero tjouhona. Owo va tjere: “Amen! Haleluja! Tangeye Muhona!”
Omukandi worukupo rwOndjona
5 Tjazumba otji kwa posire eraka nda zire motjihavero tjouhona ari tja: “Tangeye Ndjambi wetu, vakarere ve amuhe, na eṋe amuhe, ovanene nouṱiṱi, mbu mu nondira ku ye!” 6 Okuzambo ami e zuu ombosiro tjimuna oyotjimbumba otjinene, nu tjimuna oyomahwaarero womeva, nu tjimuna oyotuṱuṱumo otuzeu. Mbe ve zuva amave tja: “Haleluja! Tangeye Muhona! Orondu Muhona Ndjambi wetu, Omunamasaaehe, u honapara otja Ombara! 7 Ngatu yoroke, tu nyande nu tu mu yozike! Orondu orukupo rwOndjona rweya; nomukupwa wayo we rirongerere orukupo ndwi. 8 Neye wa pewa ombanda ongohoke nongeṋangeṋe kutja a zare.” Ombanda oheze ndji oyo ozondjito ozosemba zovakambure.
9 Nomuengeri arire tja tja ku ami: “Tjanga! Ovaṋingandu imba mba ṋangwa komukandi worukupo rwOndjona!” Tjazumba a hungire komurungu a tja: “Inga owo omambo watjiri wa Ndjambi.”
10 Nami e woro ozongoro pozombaze ze okurikotamena ku ye, neye a tja ku ami: “Ngoo roro, o tjiti nao! Owami omukarere omukweṋu puna ovakweṋu mongamburiro mbe panḓera pomahongononeno Jesus nga zuvarisa. Rikotamena ku Ndjambi, orondu Jesus eye ngwi ngwa zuvarisa omahongononeno, nOmbepo ondja yandja omaprofetero.”
Omukavire kokakambe okavapa
11 Nami e munu eyuru ari ri kamwaha, nu tara, pa ri okakambe okavapa. NOmukavire wako u isanewa kutja Muṱakame na Munauatjiri. Eye u pangura nu u rwa ovita vye nousemba. 12 Omeho we ya sanene norururumo rwomuriro, nu wa zarere omakori omengi wouhona kotjiuru tje. Eye wa ri nena nda tjangerwe mu ye, nu kapa ri omundu ngwaa tjiwa ena ndi posi na ye erike. 13 Eye wa hwikikire ombanda ndja rimbarere nombinḓu. Ena re “Embo ra Ndjambi.” 14 Ovimbumba vyovita vyeyuru vye mu kongorerere avya kavire oukambe ouvapa navya zara ozombanda ozongohoke. 15 Nu motjinyo tje mwa pitire engaruvyo etwe kutja a toṋe na ro oviwaṋa ovinavisenginina. Eye me vi honaparere nokati kotjitenda, neye omuini ma tombere omandjembere motjikameno tjomavinu, inga omavinu womazenge omanene wa Ndjambi, Omunamasaaehe. 16 Nungwari kombanda ye onde na ketumbo re kwa tjangerwe ena ndi: “Ombara yozombara noMuhona wovahona.”
17 Okuzambo e munu omuengeri ngwa kuramene meyuva. Eye wa ravaerere neraka enene kozonḓera azehe nḓaa ze tengerere kombanda mevaverwa, a tja: “Indjeye mu woronganene omukandi omunene Ndjambi mbwa zepa! 18 Indjeye mu rye onyama yozombara noyovahongore noyovarwe wovita, nonyama youkambe noyovakavire vawo, nonyama yovandu avehe, ovakarere novakutuke, ovanene nouṱiṱi!”
19 Tjazumba arire tji mba munu otjipuka nozombara zehi novimbumba vyazo vyovita aza woronganene okurwisa ingwi Omukavire wokakambe okavapa notjimbumba tje tjovita wina. 20 Notjipuka hi tja kamburirwe pamwe nomuprofete ngwi wovizeze ngwa tjitire ovihimise momurungu watjo. Nu novihimise mbi eye arire tja pukisa imba mba ri notjihako tjotjipuka hi, na imba mbe rikotamenene kotjiserekarera tjatjo. Nu ihi otjipuka na ingwi omuprofete wovizeze aveyevari va yumbirwe nomuinyo merindi romuriro mbu yaka nosurungu. 21 Nu imba ovakwao mba sewa po va ṱa nengaruvyo nda zire motjinyo tjOmukavire ngwi wokakambe okavapa. Nozonḓera azehe za rya onyama yawo aihe okukuta.
© Herero Revision Bible © Bible Society in Namibia, 2021.
