Omawiro wa Babilon
1 Nu kombunda yoviṋa mbi ami mba munine omuengeri warwe ngwa zire meyuru. Eye wa ri nouvara ounene, nongeṋangeṋeno ye ya yerisire ehi arihe. 2 Eye wa ravaerere neraka enene a tja: “Otjo tja u! Babilon otjinene tja u! Otjo nambano tja rire omaturiro wozombepo ozohakohoke; nozonḓera azehe zondova nozondjaukise ze tji isa po omaundiro wazo. 3 Orondu oviwaṋa avihe vya purukisiwa i omavinu watjo, inga omavinu omazeu woruvakiro rwatjo. Nozombara zehi ze riyandjere mourunde watjo, novarandise wouye va tumbisiwa i okuhinomeritjaerero kombyarero yatjo.”
4 Tjazumba e zuu eraka rarwe nda zire meyuru ari tja:
“Piteye, tjiwaṋa tjandje! Piteye mu tjo!
Amu ha kara norupa momaurunde watjo,
nu amu ha kara norupa momberero yatjo!
5 Orondu ourunde watjo mau tendekwa kumwe nga tji wa kavaza keyuru,
nu Ndjambi wa zemburuka ozondjira zouhasemba watjo.
6 Tjiteye kObabilon otja punga atja tjitire ku eṋe;
tji sutiseye potuvari imbi avihe mbi tja tjita!
Nu motjinwino ho Babilon mu tje mu hambuninine mo omanuwa
tirireye mo omanuwa omazeu potuvari komeho.
7 Tji peye omihihamo noruhoze
punga atje ripere otjini ondjozikiro nehambaneno.
Orondu otjo tji kara pokurihungirira otjini atji tja:
‘Owami ngwi mba haama otja ombara oserekaze!
Himuhepundu,
nu himee kara ko noruhoze!’
8 Oviwonga avihe mbi,
omutjise noruhoze nondjara,
opu mavi zu okutjitoṋa meyuva rimwe;
Notjo matji ningiririsiwa nomuriro,
orondu Muhona Ndjambi,
ngu me tji pangura, eye omunamasa.”
Ozombara maze ririre omawiro wa Babilon
9 Nozombara zehi nḓa nḓe riyandjere mourunde watjo nokuvyarera tjo, maze ririre otjihuro nokutjiṱira oruhoze, tji maze munu omuise wotururumo tu matu tji seseta. 10 Ozo maze kurama kokure, tjinga amaze tira omahihamisiro watjo. Ozo maze tja: “Owee, owee! Otjihuro otjinene notjinamasa hi Babilon! Moure woiri imwe ombanguriro ye ya kombanda yoye!”
Ovarande novarandise mave ririre omawiro wa Babilon
11 Ovarandise vehi wina mave ririre tjo nokutjiṱira oruhoze, tjinga ape hi nomundu ngu ma randa ovirandisiwa vyawo mbi: 12 Ongoldo nosilveri, nomawe omahuze nomaundjendje, nozombanda ozoheze ozoserarovazu nozoserandu pyu; nomiti ngamwa avihe omihuze tjinene, noviṋa ngamwa avihe mbya ungurwa pomayo wozondjou na pomiti ominanḓengu na pongoporo na potjitenda na pomawe omamarmel; 13 nokaranela novivawa oviwa, novyomoro omuwa, nomaze omaṋuke wanawa noutakoroni; nomavinu nomaze womiṋinga; novikokotwa noruhere orunḓunḓura, nozongombe nozonḓu, noukambe nomatemba, nozonḓu, noukambe nomatemba, novakarere, nangarire ovandu ovanamuinyo. 14 Nu wina rumwe maku zu nai: “Oviṋa avihe oviwa ove mbi wa ri nomuhoro na vyo vya zengi. Nombyarero novikeṋakeṋe vyoye avihe vya zu po pove, nu komoo vi munu ko rukwao!” 15 Ovarandise, mba tumbisiwa i okurandisa oviṋa motjihuro hi, mave kurama kokure, tjinga amave tira omahihamisiro watjo. Owo mave riri nokuṱoruhoze 16 nave tja: “Owee, owee! Otjihuro otjinene tji tja zarisiwa nozombanda ozoheze nozoserarovazu nozoserandu pyu, nu tji tja harekwa nongoldo nomawe omahuze nomaundjendje! 17 Moiri imwe uriri outumbe mbu ṱa mba wa nyonwa!”
Ovaungure womozondjuwozomomeva mave ririre omawiro watjo
Ovahongore avehe vomozondjuwozomomeva novaryange avehe mbe ri mu zo, na imba mbe ungura mu zo na imba avehe mbe hupa mokuungura mokuvare va kuramene kokure 18 nave ravaere tji va muna omuise wotururumo tu twe tji seseta, ave tja: “Otjihuro tjiṋe tji tja sanene notjihuro otjinene hi?” 19 Owo ve risisirire ehi moviuru, ave riri nave ṱoruhoze amave tja: “Owee, owee! Otjihuro otjinene! Avehe mbe nozondjuwozomomeva mokuvare va tumbisiwa i ovihuze vyatjo. Nu moiri imwe uriri outumbe mbu ṱa mba wa nyonwa!” 20 Yorokera omanyoneno watjo, ove yuru! Yorokeye, eṋe tjiwaṋa tja Ndjambi, novaapostele, novaprofete! Ndjambi we tji verera imbi otjo mbi tja tjita ku eṋe! Omawiro wotjihuro owo omakarerere!
21 Nomuengeri omunamasa otja toora ewe enene ndi ṱeki pewe enene rotjikweyero ne ri yumbu mokuvare, a tja: “Momuhingo tjingewo mbwi otjihuro otjinene Babilon otjinga ama tji vandwa pehi nomasa, notjo kamaatji kamunika rukwao. 22 Nomizumbi vyoviharpe novyomaraka wovandu novyovanyande vouhiva novozohiva kamaavi kazuvaka move rukwao. Nomunaunongo motjiungura ngamwa atjihe kamaa kamunika move rukwao. Nombosiro yotjikweyero kamaai kazuvaka move rukwao. 23 Nondjerera yemunine kamaai kayera move rukwao; neraka romuvarekwa noromuvareke kamaari kazuvaka move rukwao. Novarande novarandise woye omba ri ovahonapare ovanamasa tjinene mouye auhe, nu noundjai woye wovineya ove wa purukisa oviwaṋa avihe!”
24 Babilon tji nondjo yokutirahi ombinḓu yovaprofete noyotjiwaṋa tja Ndjambi, ii, indji ombinḓu ya imba avehe mba zepwa kombanda yehi.
© Herero Revision Bible © Bible Society in Namibia, 2021.
