Jesaja 13 - Herero Revision Bible (HRR)

Ndjambi ma vere Babilon

1 Ombuze ohunga na Babilon, Jesaja, omuzandu wa Amos, ndja pewa i Ndjambi momerimunikisiro.

2 Turikeye erapi rovita kombanda yondundu ndja kuruka! Ravaereye kovarwe wovita, nu yereye omaoko weṋu otja otjiraisiro ku wo kutja ve rwise omivero vyotjihuro otjiritongamise. 3 Muhona wa isana ovarwe ve ozombangaṋe novaṱakame kutja ve rwe ovita oviyapuke, nokutja ve vere imba eye mbe nomazenge na wo.

4 Purateneye kondokohero kozondundu, ombosiro yotjimbumba otjinene tjovandu, ombosiro yomihoko noyomauhona tji mavi worongana. Muhona Omunamasaaehe wovimbumba vyeyuru ma rongerisa ovarwe ve wovita. 5 Ovyo mavi zu komahi wokokure komaandero wouye. Muhona meya okunyona ehi arihe momazenge we.

6 Rireye! Eyuva ra Muhona ri ri popezu, indi eyuva Omunamasaaehe mu ma eta omanyoneno. 7 Eke raauhe mari rekareka moungundi, nouvanḓe waauhe mau zu po. 8 Owo avehe mave tirisiwa nu mave tjeme momihihamo vyawo tjimuna omukazendu mozongama zombandukiro. Owo mave tarasana nondira, nomirungu vyawo mavi hara oupyu nomburuma. 9 Eyuva ra Muhona mari ya, indi eyuva etirise romazenge omandandi nge surumuka. Ehi mari rire ongaango, novanauvi avehe mave yandekwa. 10 Ozonyose notjose kaze nokuyera, eyuva mari zorere tji mari yeruruka, nomueze kau nokukara nondjerera.

11 Muhona ma tja nai: “Ami me eta oviwonga kombanda yehi, nu me verere ovanauvi avehe omauvi wawo. Ami me susuparisa auhe ngu me ritongamisa, nu me vere auhe ngu ri otjirangaranga nu ngu tjita outwe. 12 Imba mbu mave hupu mave rire ouṱiṱi pongoldo ongohoke. 13 Ami me zezerisa omayuru, nehi mari nyinganyinga poṋa paro meyuva ndo ami, ngu mbi ri Muhona Omunamasaaehe, tji me raisa omazenge wandje.

14 “Ovozonganda mbe tura mObabilon, mave tupuka komahi wawo oveni, amave rimbara tjimuna ozongoṱu nḓu maze tupuka kovayeve, nu tjimuna ozonḓu nḓe hi nomurise. 15 Auhe ngu ma kamburwa, ma ṱu nengaruvyo. 16 Ngunda amave tarere, ounatje wawo mau nyanyaurwa, ozondjuwo zawo maze pundwa, novakazendu vawo mave tjerewa.”

17 Muhona ma tja nai: “Ami me sekamisa Ovamedie mbe hi na ko na tja nosilveri nu mbe hi nonyuṋe mongoldo kutja ve rwise Babilon. 18 Owo mave zepa omitanda nomauta noviku vyawo. Kave nokuṱira ovanyame otjari, nu kave nokukara nondjenda novanatje. 19 Ouhona wa Babilon owo ouwa oumanise pomauhona aehe; owo omerihiviro wovature vawo. Nungwari ami, Muhona, me tungunyuna otjihuro Babilon otja tji mba tjitire kOsodom na Gomora. 20 Kamaamu tura omundu mu tjo rukwao. Kamaape kara Omuaraba ngu ma tono ondanda ye mehi ndo; nu kamaape kara omurise ngu ma risire ozonyanda ze mu ro. 21 Otjo matji rire otjirongo mu mamu kara ovipuka vyokuti, nu ovisiwi mu mavi tungu oviruwo vyavyo. Nu mamu kara ozombo, novitjerenge mavi ryanga momatundu. 22 Otuhungu nozondjuwo zouhona maze itavere okuvandara kwozombungu na kwozombandje. Oruveze rwomaandero wa Babilon rweya! Omayuva watjo ye ri pokuyanda.”