Sakaria 12 - Herero Revision Bible (HRR)

Ongutukiro ya Jerusalem moruveze ndu maru ya

1 Indji ondji ri ombuze Muhona ndji ma hungirire Israel, ingwi Muhona ngwa parangisa omayuru, ngwa uta ehi nu ngwa mema ombepo yomundu momundu. Eye ma tja nai: 2 “Tara, ami me tjiti Jerusalem tji rire tjimuna otjinwino tji tje ura nomavinu; oviwaṋa mbye tji kondoroka mavi nu omavinu nga navi teratera tjimuna ovandu mba purukisiwa i omavinu. Novyo tji mavi kovere Jerusalem, novihuro vyehi ra Juda nda sewa po mavi koverwa wina. 3 Nungwari oruveze ndwi tji rweya, ami me tjiti Jerusalem tji rire otja ewe ezeu, otjiwaṋa atjihe tji matji kondjo okutoora ro matji hihamisiwa. Oviwaṋa avihe mouye mavi rikutu kumwe okurwisa Jerusalem. 4 Moruveze ndo ami me tirisa oukambe wawo auhe, nu me verisa ovakavire vawo avehe oviyoze. Nungwari me tjevere otjiwaṋa tja Juda, nu me poṱuparisa oukambe wovanavita na tjo. 5 Nozonganda za Juda otji maze rihungirire ozeni aze tja: ‘Muhona Ndjambi Omunamasaaehe u yandja omasa kotjiwaṋa tje tji tja tura mOjerusalem.’

6 “Momayuva ngo ami me tjiti ozonganda za Juda ze rire otja omuriro mehwa, notja omuriro momahi wovikunino vyovikokotwa mbya hora, ozonganda nḓa maze nyono oviwaṋa avihe mbye ze kondoroka akuhe. Nungwari ovature va Jerusalem mave kara motjihuro nokuhinatjipo.

7 “Ami, ngu mbi ri Muhona, me yandja outoṋi kovimbumba vyovita vya Juda rutenga, kokutja ondjozikiro ndji mai yandjewa kozondekurona za David na kovature va Jerusalem, ai ha rire onene pu indji yehi ra Juda nda sewa po. 8 Momayuva ngo Muhona ma yama ovature va Jerusalem, nu nandarire imba ovingundi tjinene mokati kawo mave rire ovanamasa tjimuna David tja ri. Ozondekurona za David maze ve hongorere tjimuna omuengeri wa Muhona, tjimuna Ndjambi omuini. 9 Momayuva ngo ami me yandeke oviwaṋa avihe mbi mavi vanga okurwisa Jerusalem.

10 “Ami me tirire ombepo yotjari noyongumbiro kombanda yozondekurona za David novature ovakwao va Jerusalem wina. Owo mave tara ku ingwi umwe ngu va twera okuzepa, nu ave riri tjimuna ovandu amave riri omuatje omukwatwa erike. Mave riri tjinene tjimuna ovandu mba zepaisa omuzandu otjiveri. 11 Momayuva ngo omaririro mOjerusalem maye rire omanene tjinene tjimuna inga nga tjitirwa Hadad-Rimon morutjandja rwa Megido. 12-14 Eṱunḓu arihe mehi mari ritjitire orini omutambo, okutja eṱunḓu rozondekurona za David, na indi rozondekurona za Natan, na indi rozondekurona za Levi, na indi rozondekurona za Simi, nomaṱunḓu aehe omakwao. Eṱunḓu arihe mari ritjitire orini omutambo, novarumendu veṱunḓu arihe mave riri oveni peke, novakazendu wina mave riri oveni peke.”