Ovaengeri hambombari mbe noviwonga ovisenina
1 Nu mevaverwa arire tji mba munu mo ombunikiro onene nohimise. Ami mba muna ovaengeri hambombari mbu mave eta oviwonga hambombari ovisenina; ovyo vya ri omayeneneno omasenina womazenge wa Ndjambi.
2 Nu mba munine aayo pe nomeva womuronga omanyeṋanyeṋe otja otjiritarero mu mu nomuriro. Wina mba munine imba ovandu mba toṋene otjipuka notjiserekarera tjatjo, notjivaro tjena ratjo. Owo va kuramene pomeva nga womuronga omanyeṋanyeṋe ave noviharpe, mbi va perwe i Ndjambi. 3 Owo va imburire eimburiro ra Moses, omukarere wa Ndjambi, neimburiro rOndjona, ave tja:
“Muhona, Ndjambi, Omunamasaaehe,
oviungura vyoye, tjiri, ovinene novihimise.
Mbara yoviwaṋa avihe,
ozondjira zoye, tjiri, ozosemba nozouatjiri!
4 Owaṋi ngu ha tira ove, Muhona?
Nowaṋi ngu ha yozike ena roye?
Oove erike ngu u ri omuyapuke!
Oviwaṋa ovinavisenginina avihe maavi ya
okuyekurikotamena kove,
orondu ozondjito zoye zousemba tjinga aze munika ku avehe.”
5 Kombunda yaimbi mba munine ondjuwo meyuru, indji Ondanda yOmahakaeneno ai ri kamwaha. 6 Novaengeri mba hambombari, mba etere imbi oviwonga hambombari, va pitire mondjuwo ndji. Owo va zarere omarapi omakohoke nomakeṋakeṋe, nu va kutire omakwamo wongoldo motukoro twawo. 7 Tjazumba tjimwe tjovinamuinyo mbi vine otji tja yandjere kovaengeri mba hambombari imbi oviyaha hambombari vyongoldo mbye urisirwe nomazenge wa Ndjambi ngu nomuinyo aruhe nga ko nga aruhe. 8 Nondjuwo ye urisirwe nomuise mbwa zire mondjozikiro na momasa wa Ndjambi, nu kapa ningire omundu ngwaa sora okuhita mondjuwo ndji, nga imbi oviwonga hambombari vyovaengeri mba hambombari tji vya yanda.
© Herero Revision Bible © Bible Society in Namibia, 2021.
