Eksodus 40 - Herero Revision Bible (HRR)

Moses ma ziki Ondanda yOmahakaeneno

1 Norukwao Muhona wa hungira ku Moses a tja: 2 “Meyuva etenga romueze omutenga zika Ondanda yOmahakaeneno. 3 Nove twa mo otjipwikiro tjomatwako, nu u tji tjizikize nerapi etjizikize. 4 Nu hitisa mo otjiriro, noviṋa vyatjo twa ku tjo nawa; wina hitisa mo otjikurameno tjomamunine, nu u twe ko inga omamunine ku tjo. 5 Nu zika otjipunguhiro tjongoldo tjomatwimisiro komurungu waihi otjipwikiro tjomatwako; nu rekarekisira erapi etjizikize pomahitiro wOndanda yOmahakaeneno. 6 Wina twa otjipunguhiro tjozombunguhiro ozoningiririsiwa pomahitiro wOndanda yOmahakaeneno. 7 Notjiyaha tjomerikohero mo tji twa pokati kOndanda yOmahakaeneno notjipunguhiro, no tirire mo omeva. 8 Nu ungura orumbo okukondoroka, nu u rekarekisire erapi etjizikize pomuvero worumbo.

9 “Toora omaze omatwirise nu u twirise na wo Ondanda yOmahakaeneno, noviṋa avihe mbi ri mu yo. Nu i yapura noviungurise vyayo avihe kutja i rire ondjapuke. 10 Notjipunguhiro tjozombunguhiro ozoningiririsiwa noviungurise vyatjo avihe vi twirisa; tji yapura komuhingo mbwi, notjo matji rire otjiyapuke tjinenenene. 11 Twirisa ihi otjiyaha tjomerikohero notjikurameno tjatjo; tji yapura komuhingo mbwi.

12 “Eta Aron novazandu ve pomahitiro wOndanda yOmahakaeneno, nu u ve kohe momeva. 13 Nu zarisa Aron ozombanda ozondjapuke zoupristeri; mu twirisa nu u mu yapure kutja e ndji karere moupristeri. 14 Eta ovazandu ve wina u ve zarise ozombanda zokehi. 15 Tjazumba ve twirisa otja tji wa twirisa ihe kutja ve ndji karere wina otja ovapristeri. Nomatwirisiro wawo maye ve tjiti ovapristeri nga aruhe, komuhoko nga komuhoko.”

16 Nu Moses wa tjita avihe nawanawa otja Muhona punga e mu rakiza. 17 Meyuva etenga, komueze omutenga wombura oitjavari kombunda yokuza kwawo mOengipte, Ondanda yOmahakaeneno otji ya zikwa. 18 Moses wa zika indji Ondanda yOmahakaeneno; eye wa zikamisa mehi inḓa ozombaze zayo na hitisa otutapo twayo nomiti omityakaṋa na ziki ozongunḓe zayo. 19 Wina wa nyatururira ko erapi ekutjire kombanda yOndanda yOmahakaeneno na kutjire ko ombanda ongutjire kombanda yayo otja Muhona pa rakiza ku Moses. 20 Nu wa toora imbi ovitjangero vyomatwako ne vi twa mOtjipwikiro tjOmerikutiropamwe na hweke imbi ovinḓe meṋe yatjo na twako otjikamo kombanda yatjo. 21 Tjazumba eye wa twa ihi Otjipwikiro mOndanda yOmahakaeneno na rekarekisire ko erapi etjizikize otja Muhona pe mu rakiza.

22 Eye wa zika otjiriro mOndanda yOmahakaeneno, pendje yaindi erapi etjizikize, komukuma wokeyuva kokunene, 23 na twako omboroto ndja tjitirwa okupunguhira Muhona otja Muhona punga a rakiza ku Moses. 24 Wina wa zika otjikurameno tjomamunine mOndanda yOmahakaeneno, ouhunga notjiriro, komukuma wokeyuva kokumuho, 25 na twako omamunine ku tjo momurungu wa Muhona otja Muhona pa rakiza ku Moses. 26 Neye wa zika otjipunguhiro tjongoldo mOndanda yOmahakaeneno momurungu werapi etjizikize, 27 na kangisire ko ovyomoro omuwa ku tjo otja Muhona punga a rakiza ku Moses. 28 Eye wa rekarekisira indi erapi etjizikize pomahitiro wOndanda yOmahakaeneno. 29 Eye wa twa otjipunguhiro tjozombunguhiro ozoningiririsiwa pomahitiro wOndanda yOmahakaeneno na eta ku tjo ombunguhiro oningiririsiwa noyovikurya otja Muhona pa rakiza ku Moses. 30 Eye wa zika otjiyaha tjomerikohero pokati kOndanda yOmahakaeneno notjipunguhiro na twa omeva wokurikoha mu tjo. 31 Moses na Aron novazandu ve ave rikohere mo omake nozombaze zawo. 32 Owo tji mave hiti mOndanda yOmahakaeneno poo tji mave ya kotjipunguhiro, aruhe ave rikoho otja Muhona pa rakiza ku Moses. 33 Eye wina wa zika orumbo okukondorokisa Ondanda yOmahakaeneno notjipunguhiro na rekarekisire erapi etjizikize pomuvero worumbo. Komuhingo mbwi Moses otja mana ihi otjingura atjihe.

Otjikamba tji tja vandeka Ondanda yOmahakaeneno

(Num 9:15-23)

34 Notjikamba otji tja vandeka Ondanda yOmahakaeneno, nongeṋangeṋeno ya Muhona ye urisa Ondanda yOmahakaeneno. 35 Nu Moses kaa sora okuhita mOndanda yOmahakaeneno tjinga otjikamba atja kara kombanda yayo, nongeṋangeṋeno ya Muhona aye urisa Ondanda yOmahakaeneno. 36 Ovaisrael aave tjindisa ozondanda zawo okutwara poruveze rwarwe, indu otjikamba tji tja zako kombanda kOndanda yOmahakaeneno, 37 nungwari ngunda otjikamba atji hiya zako, kaave tjindisa ozondanda zawo. 38 Ouyenda wawo auhe aave munu otjikamba mu mwa ri Muhona kombanda yOndanda yOmahakaeneno mutenya; nomuriro aa u yerisa otjikamba uṱuku.