Omavandururiro 13 - Herero Revision Bible (HRR)

Otjipuka tji tja pita mokuvare

1 Okuzambo ami mba munine otjipuka tji matji piti mokuvare. Otjo tja ri nozonya omurongo noviuru hambombari; nu konya aihe peke kwa ri ekori rouhona, nu kotjiuru atjihe peke kwa ri ena nda ri eyamburure ku Ndjambi. 2 Otjipuka hi aatji munika otja otjitotongwe, nu tja ri novikoti mbya sanene novyongu, nu tja ri notjinyo tjimuna otjongeyama. Notjitjupamuriro tja yandjere omasa watjo otjini notjihavero tjatjo tjouhona nouvara watjo ounene kotjipuka hi. 3 Notjiuru tjimwe tjotjipuka hi aatji munika aayo tji notjito tji tja harere okutjizepa, nungwari nambano otjito hi tja veruka. Nouye auhe wa himinwe nau kongorere ihi otjipuka. 4 Ovandu avehe ve rikotamena kotjitjupamuriro, tjinga atja yandjere ouvara watjo kotjipuka. Owo wina ve rikotamena kotjipuka ave tja: “Owaṋi ngwa sana notjipuka hi? Nowaṋi ngu ma sora okutjirwisa?”

5 Notjipuka hi tja yandjerwa okuhungira oviṋa ovihimise nokuyamburura Ndjambi, nu wina tja perwe ouvara oure womieze omirongo vine na vivari. 6 Otjo tja yarukire okuyamburura Ndjambi, nu wina tja yambururire ena re nopoṋa eye pa tura na imba avehe mba tura meyuru. 7 Wina tja perwe omasa wokurwisa otjiwaṋa tja Ndjambi nokutjihavera; nu wina tja perwe ouvara wokuhonaparera oviwaṋa avihe nomihoko avihe nomaraka aehe novanavisenginina avehe. 8 Ovandu avehe, mba tura kombanda yehi mave rikotamene kotjipuka hi, avehe mba vomana nge ha tjangerwe membo romuinyo okuza kombutiro youye, indi embo rOndjona ndja ṱa.

9 Ngu nomatwi okuzuva nga puratene! 10 Tji pe nomundu ngwa pwira okuhuurwa, eye, tjiri, ma huurwa; nu tji pena ngwa pwira okuṱa nengaruvyo, eye, tjiri, ma ṱu nengaruvyo.

Nu poṋa mba, tjiri, otjiwaṋa tja Ndjambi opu matji hepa onḓaro orure nongamburiro.

Otjipuka tji tja za mehi

11 Okuzambo ami e munu otjipuka tjarwe tji tja zire mehi. Otjo tja ri nozonya mbari nḓa sanene na inḓa zondjona, nu aatji hungire otja otjitjupamuriro. 12 Notjo tja ungurisa ouvara auhe wotjipuka otjitenga mena ratjo. Nu tja ṋiṋikiza ehi na imba avehe mba tura mu ro okurikotamena kotjipuka hi otjitenga, ihi tjotjito otjizepe tji tja verukire. 13 Otjipuka otjitjavari hi tja tjitire ovihimise ovinene; otjo tja rokisa omuriro kombanda yehi mbwa zire keyuru momurungu wovandu avehe. 14 Novandu avehe mba tura kombanda yehi tje ve pukisa novihimise, mbi tja perwe okutjitira momurungu wotjipuka ihi otjitenga. Otjo tje ve raera okutunga otjiserekarera kondjozikiro yotjipuka hi tji tja ri notjito tjengaruvyo, nu tji tja kotora omuinyo. 15 Notjipuka hi otjitjavari tja perwe ousemba wokusuvirira mo osuvaneno motjiserekarera tjotjipuka ihi otjitenga, kokutja ihi otjiserekarera tji sore okuhungira, nu tji sore okuzepa ovandu avehe mbe hi nokurikotamena ku tjo. 16 Notjipuka hi tja ṋiṋikizire ovandu avehe, ovaṱiṱi novanene, ovatumbe novasyona, ovakarere novakutuke, kutja ve tuwe ko otjihako komake wawo wokunene poo kovipara vyawo. 17 Nungwari ingwi porwe ngwa ri notjihako hi ngwaa yenene okuranda poo okurandisa. Notjihako hi tja ri ena rotjipuka poo otjivaro tjena ratjo.

18 Poṋa mba mape hepwa ounongo. Ingwi ngu nozondunge ma sora okukonḓonona omaheero wotjivaro tjotjipuka; orondu ihi otjivaro otjo ena romundu. Notjivaro tjatjo otjo omasere hamboumwe nomirongo hamboumwe na hamboumwe.