Omukazendu notjitjupamuriro
1 Nu pe riraisire ombunikiro onene nohimise mevaverwa: Pa ri omukazendu ngwa hwikikirwe neyuva, nu ngwa ri nomueze kehi yozombaze, nu ngwa zarere ekori rouhona rozonyose omurongo na mbari kotjiuru tje. 2 Eye wa ri pokupanduka, nozongama nomihihamo vyombandukiro vya tjita kutja a ure tjinene.
3 Nu pe riraisire ombunikiro yarwe ohimise mevaverwa: Pa ri otjitjupamuriro otjinene otjiserandu pyu; otjo tja ri noviuru hambombari nozonya omurongo; nu koviuru vyatjo kwa ri omakori wouhona hambombari. 4 Notjo tja nanene orukondwa orutjatatu rwozonyose zeyuru nomutjira watjo natji ze imbirahire kombanda yehi. Notjo tja kuramene momurungu womukazendu, kokutja tji sasaure inga okanatje tjimanga oko tji ka zu nokupandukwa. 5 Nomukazendu wa pandukire okanatje okazandu ku make sokuhonaparera ovanavisenginina avehe nokati kotjitenda. Nungwari okanatje nga ka hakanwa ake twarewa ku Ndjambi kotjihavero tje tjouhona. 6 Nu ingwi omukazendu wa taurira kokuti onguza, Ndjambi ke kemuṱunina oruveze, kokutja ovandu ve kemuparurire ngo oure womayuva eyovi nomasere yevari nomirongo hamboumwe.
7 Nu pa kara ovita meyuru. Mikael novaengeri ve va rwisire otjitjupamuriro, notjo wina tje ve rwisire novaengeri vatjo, 8 nungwari ihi otjitjupamuriro tja havererwe, notjo novaengeri vatjo kave yandjererwe okuuhara amave kara meyuru rukwao. 9 Notjitjupamuriro otjikuryoma hi tja imbirahiwa, indji onyoka onguru, ndji ku za Omudiaboli poo oSatan, nu ndji pukisa ouye auhe. Otjo tja nakaurirwa kombanda yehi puna ovaengeri vatjo.
10 Ami arire tji mba zuu eraka enene meyuru amari tja: “Nambano Ndjambi wetu wa eta ondjamo! Nambano Ndjambi wa raisa omasa we otja ngu ri ombara! Nambano Omutwirisiwa we wa raisa ouvara we! Orondu ingwi ngu kurama komurungu wa Ndjambi nu ngu rondora ovakwetu omutenya nouṱuku, wa rambwa meyuru. 11 Ovakambure ovakwetu ve mu toṋa mena rombinḓu yOndjona na mena rOmbuze youatjiri ndji va hongonona; nowo va ri nombango okuyandja ominyo vyawo nokuṱira indji Ondjona. 12 Notji mwa sokuyoroka, eṋe mayuru na eṋe amuhe mbu mu tura mu wo! Nungwari owee ku eṋe, mahi nokuvare! Orondu Satan wa rauka, meya ku eṋe, neye u nomazenge omanene, tjinga ama tjiwa kutja u noruveze orusupi uriri.”
13 Notjitjupamuriro tji tja muna kutja tja nakaurirwa kombanda yehi, arire tji tja utu okurambera ingwi omukazendu ngwa pandukire okanatje okazandu. 14 Nomukazendu wa perwe ovivava vivari vyonguvi onene, kokutja a tuke okuyenda kokuti onguza, ka sere okukakara. Ingo oku ma kaparurirwa oure wozombura ndatu nohinga e hi nokumunika keho rotjitjupamuriro. 15 Tjazumba ihi otjitjupamuriro otji tja tjupa omupupo womeva motjinyo tjatjo kongotwe yomukazendu, kokutja owo u mu pupe okutwara. 16 Nungwari ehi ra vaterere omukazendu; oro ra mwahurura otjinyo tjaro nari ṋiṋa imbwi omupupo womeva mbwa zire motjinyo tjotjitjupamuriro. 17 Notjitjupamuriro tja pindikira omukazendu, narire tji tja kumuka okukarwisa ozondekurona ze nḓa sewa po, okutja owo mba avehe mbe ṱakamisa omatwako wa Ndjambi nu mbe panḓera pomahongononeno wa Jesus. 18 Notjitjupamuriro arire tji tja kakurama pomukuro wokuvare.
© Herero Revision Bible © Bible Society in Namibia, 2021.
