Otjirimunikise tja Daniel ponḓonḓu Tigris
1 Mombura oitjatatu youhona wa Kirus, ombara ya Persie, otji pa tjivisiwa ombuze ku Daniel, ingwi wina ngwa rukirwe Beltsasar. Ombuze ndji ya ri ouatjiri, nungwari ya ri onḓeu tjinene okuizuva. Oyo ya mangururirwa ye motjirimunikise.
2 Moruveze ndo, ami Daniel, mba ri noruhoze oure wovivike vitatu. 3 Ami hi na pu mba rya ovikurya ovitjate nonyama aihe ngamwa, nu wina hi na pu mba nwa omavinu aehe ngamwa, nu hi na pu mbe rivava omaze ngandu ovivike mbi vitatu tji vya kapita.
4 Meyuva oritjamirongo vivari na yane komueze omutenga wombura, ami Daniel, mba kuramene potjikere tjonḓonḓu onene Tigris. 5 Ami mba yera omeho ne munu omundu ngwa zara ozombanda ozoheze nekwamo rongoldo ongohoke. 6 Orutu rwe aa ru keṋakeṋa tjimuna oviwerawere. Omurungu we aa u yere otja ondjerera yorutjeno rwombura, nomeho we aaye ruruma tjimuna omuriro. Omaoko nomarama we aaye keṋakeṋa otja ongoporo ongohoke, neraka re aa ri pose tjimuna ondokohero yotjimbumba otjinene tjovandu.
7 Owami erike ngu mba muna otjirimunikise hi. Ovarumendu, mba ri puna ami, kave mwine otjiṋa, nungwari owo va tira tjinene, notji va tupuka nave kaṱara. 8 Ami mba sewa mbo erike ame tarere otjirimunikise otjikumise ho. Himba ri nomasa rukwao, nomurungu wandje wa tjitukire tjinene nai nga tji pe ha ri omundu ngwe ndji zemburuka. 9 Tji mba zuva eraka re, mba wira pehi amba seuka ne rara mbo onḓurumika. 10 Tjazumba eke otji re ndji kambura nari ndji yere kutja mbi kuramene komake na kozongoro zandje, tjandje nao me zezera.
11 Omuengeri wa tja nai ku ami: “Daniel, Ndjambi we ku suvera, Sekama nu u puratene nawa ku imbi mbi me hungire kove. Ami mba hindwa kove.” Eye tja za nokuhungira omambo nga, ami arire tji mba sekama, tjandje ingee me zezera.
12 Tjazumba eye arire tja tja nai: “Daniel, o tira. Ndjambi wa zuvira ozongumbiro zoye okuza keyuva ndi ove ndi wa tya okurisusuparisa omuini kokutja u ninge ozondunge. Ami mba yendere eziriro rongumbiro yoye. 13 Omuengeri ohivirikwa wouhona wa Persie we ndji pirukira oure womayuva omirongo vivari na rimwe. Tjazumba Mikael, umwe ngu ri otjiuru tjovaengeri ozohivirikwa, weya okundjivatera, tjinga amba isiwa erike mOpersie. 14 Ami mbe ya, mbi ku zuvise kutja mape tjitwa tjike kotjiwaṋa tjoye moruveze ndu maru ya. Orondu ihi wina otji tji ri otjirimunikise tjoruveze ndu maru ya.”
15 Eye tja za nokuhungira omambo nga, ami mba tara mehi kumwi. 16 Tjazumba omuengeri ngwaa munika otja omundu wa roporora okuoko kwe ne ndji ṱunu komiṋa neke re. Nami mba tja nai ku ye: “Muhona, otjirimunikise hi matji ndji pungarisa tjinene nai nga tji me zezera tjinene. 17 Ami mbi ri otja omukarere ngwa kurama komurungu womuhona we. Me sora vi okuhungira na ove? Ami hi nomasa nu hi nokusora okusuvana.”
18 Omundu ngwi we ndji kambura rukwao, nami mbe rimuna okuharera ko omasa. 19 Eye wa tja nai: “Ndjambi we ku suvera. O kurungisiwa i otjiṋa ngamwa; kara nohange nu o tira.”
Eye tja za nokuhungira nai, ami otji mba harera ko omasa, notji mba tja nai: “Muhona, ndji raera imbi mbi wa sokuhungira. Ove wa tjiti kutja mbi hare omasa.”
20-21 Eye wa pura a tja: “Mo tjiwa kutja mbe ere tjike kove? Mbe ere kutja mbi ku raere imbi mbya tjangwa mEmbo Rouatjiri. Nambano ami mbi sokuyaruka mbi karwise omuengeri ohivirikwa wa Persie. Kombunda yanano omuengeri ohivirikwa wa Grike otji ma munika. Kape na ngu me ndji vatere posi ya Mikael, omuengeri ohivirikwa wa Israel.
© Herero Revision Bible © Bible Society in Namibia, 2021.
