Deuteronomium 32 - Herero Revision Bible (HRR)

Eimburiro ra Moses

1 “Mayuru nomahi, zuveye omambo wandje,

purateneye nawa ku imbi mbi me hungire.

2 Omahongero wandje maye

roko otja omata wombura,

nu maye ri zezenga kombanda

yehi otja omueme.

Omambo wandje maye roko otja

omata koruhapo ndu maru piti,

notjomata omakozu komahozu.

3 Ami ame zuvarisa ena ra Muhona,

novandu ve mave hungire ounene we.”

4 “Muhona, eye oruuwa,

oviungura vye vya pwa;

ozondjira ze azehe tjinga aze ri ozosemba;

Ndjambi woye omuṱakame nomunauatjiri;

eye u tjita mbi ri ovisemba nouatjiri.

5 Nungwari oweṋe ovahaṱakama,

nu kamuyapwa okurira ovandu ve,

otjiwaṋa otjinauvi notjinavineya.

6 Hapo imbwi oomuano mbu

mo sokutjita ku Muhona,

tjiwaṋa otjiyova notjihinazondunge?

Eye onguri iho, nOmuute woye,

neye ongwe ku tunga u rire otjiwaṋa.”

7 “Ripura nomayuva woruveze orukuru,

pura kovanene woye ve ku raere mbya tjitirwe,

pura ovakurundu ve ku raere orukapitaveze.

8 Owokombandambanda tja tyera

oviwaṋa otjirumatwa tjavyo,

tja haṋa ovanatje vovandu,

otja zikamisa omiruko vyomihoko

otja kotjivaro tjovanatje va Israel.

9 Nungwari inḓa ozondekurona

za Jakob onḓe ritoororera omuini.”

10 “Eye we ze vaza mokuti onguza,

na mouye mbu ri tjo,

mbwe ura nombosiro yovipuka vyokuti.

Eye we ze yama ne rikendere zo,

ne ze ṱakamisa omuini otja onḓoromwina.

11 Otja onguvi, ndji mai hongo ouzerona wayo okutuka,

nai kambura wo nawa kovivava mbya nyaturura,

Muhona otjinga a ṱiza Israel kutja a hau.

12 Muhona erike wa hongorera ovandu ve,

nokuhinombatero yoomukuru varwe.

13 “Eye we ve kavirisa kombanda yozondongamo zehi,

nowo va rya ovihape vyokuti.

Nowo va muna ouitji wozonyutji motuuwa;

nomaze womiṋinga motuuwa otukukutu;

14 Ozongombe nozongombo

zawo zaeta omaere omengi;

nowo vari nozonḓu, nozongombo

nozongombe ozombwazombwa,

ovikokotwa ovisemba,

nomavinu omawamawa okunuwa.

15 “Otjiwaṋa tja Muhona tja

rira otjitumbe, notjihinonḓuviro;

otjo tja ṋuna nu tje kutisiwa i ovikurya.

Notjo tja imbirahi Ndjambi ngwe tji mema,

na tji humbu omuyame watjo omunamasa.

16 Noomukuru varwe va tjita

kutja Muhona a ṱoukoze,

nouvi mbu va tjita we mu pindikisa.

17 Owo va punguhira oomukuru

varwe mbe he ri Ndjambi,

oomukuru ovape ooihe mukururume

mbu ve hi naa va tjivirwe,

oomukuru Ovaisrael mbu ve hi

naa va karere nonḓuviro kuwo.

18 Owo va zemba Ndjambi wawo,

omuyame wawo omunamasa,

ingwi ngwe ve pa omuinyo.

19 “Muhona tja muna otjiṋa hi, wa ṱomazenge

na imbirahi ovazandu novasuko ve.

20 Neye wa tja: Ami hi nokuvevatera rukwao;

me tarere kutja ma ku tjitwa tjike kuwo,

imbo mbe nomikukututima, novahaṱakama.

21 Owo va pendura oukoze mu

ami na ihi tji tji he ri Ndjambi,

owo ve ndji pindikisa noomukuru vovisenginina.

Nambano ami me pendura eruru

mu wo na ihi tji tji he ri otjiwaṋa,

ne ve pindikisa nomuhoko omuyova.

22 Omazenge wandje maye yaka otja omuriro

nowo maye nyosa avihe kombanda yehi

owo mau vaza ouye wokehi,

nau nyosa omazikameno wozondundu.

23 “ ‘Ami me eta oviwonga kombanda yawo,

noviku vyandje avihe meve yaha na vyo.

24 Owo mave ṱondjara notjindjumba;

nave ṱu i omitjise ominaumba.

Ami me hindi ovipuka vyokuti vi ve nyondorore,

nozonyoka zouzuwo okuve rumata.

25 Ovita mavi eta onḓiro momivanda,

nomburuma mai ve zepere mozondjuwo,

ovazandu novasuko omitanda mave koka,

nangarire ovanyame

novakururume kave nokuyamwa.

26 Ami etje ve nyona oparukaze

kutja ape ha ningi umwe ngu meve zemburuka.

27 Ami hi nakutarera ovanavita na

wo amave rihivi nokutja nai:

Omasa wetu onge ve toṋa,

nungwari ngunda eri ami ngwa tjita avihe mbi.’

28 “Israel otjiwaṋa otjihinameripuriro,

katji nounongo.

29 Andakuzu va ri nounongo,

atjave tjiwa kutja ongwaye tjiva nyonwa;

owo kave nokutjiwa nu kave

nakuzuva kutja pakaenda tjike.

30 Umwe ma yenene vi okuramba eyovi rimwe,

nu vevari mave yenene vi

okutaurisa omayovi omurongo?

Muhona, Ndjambi wawo, we ve esa;

Ndjambi omunamasa wawo we ve

yandja momake wawo oveni.

31 Oruuwa rwawo karu nakusasanekwa nOruuwa rwetu;

ovanavita na eṱe owo oveni mave tjiwa.

32 Orondu omuvite wawo tjinga awa za

momuvite wa Sodom na Gomora;

omandjembere wawo omunauzuwo,

nomivite vi tjinda omapunda omaruru.

33 Omavinu wawo ye ri tjimuna

ouzuwo wonyoka, nouzuwo wesu endandi.

34 “Muhona u zemburuka avihe

ovanavita mbi va tjita;

neye undja oruveze orusemba okuvepa omberero.

35 Muhona meve sutisa ne ve vere;

oruveze maru ya owo mu mave u;

eyuva ronyonokero yawo tjinga ari ri popezu.

36 Muhona ma yama otjiwaṋa tje,

eye tja munu kutja omasa aehe ya manuka

nu ma tjariparere imba mbe mu karera,

eye tja munu kutja kave nokurivatera.

37 Eye ma pura nai:

‘Imba oomukuru vawo,

indwi oruuwa ku va taurira, ve ri pi?

38 Ve ri pi imba mba rya ozonḓura

zozombunguhiro zovinamuinyo,

nu mba nwa omavinu

wombunguhiro yomanuwa?

Ngave sekame ve mu vatere,

kutja pe kare ondjamo kombanda yeṋu!’

39 “ ‘Ami, owami erike, ngu mbi ri Ndjambi,

nu kape na Ndjambi warwe posi yandje;

ami mbi zepa nu mbi yandja omuinyo,

mbi harisa ovirwaro, nu mbi verukisa,

nu kape nomundu ngu

ma pirukire imbi mbi me tjiti.

40 Ami otja tji mbi ri Ndjambi omunamuinyo,

me yere eke randje keyuru ne tja nai:

41 me upike engaruvyo randje ekeṋakeṋe,

neṋe mamu munu ousemba awa tjitwa.

Ami me kara nongore novanavita na ami

nu me yandja omberero

ku imba mbe ndji tonda!

42 Oviku vyandje mavi tirahi

ombinḓu yawo onyingi,

nengaruvyo randje mari

zepa avehe mbu mave ndji pirukire.

Ami hi nakuhupisa ngamwa

ngu me ndji rwisa,

nangarire ozondjahe na

mbe ri momapando mave ṱu.’

43 “Yorokereye otjiwaṋa tja Muhona viwaṋa,

tjinga ama vere imba mbe mu zepa.

Eye ma toorere ovanavita na ye ongore

nu ma isire ourunde wovandu ve.”

44 Nu Moses na Josua, ngu ri, omuzandu wa Nun, va hungira omambo nga aehe weimburiro ndi kutja otjiwaṋa tji zuve.

Omahongero omasenina wa Moses

45 Nu Moses tja za nokuhungira omahongero wa Ndjambi aehe okumana kOvaisrael avehe, 46 arire tja tja ku wo: “Kareye nonḓuviro komambo nga aehe ngu me mu rongo ndinondi. Ye rakizeye kovanatje veṋu kokutja nouṱakame ve kare nonḓuviro komahongero wa Ndjambi. 47 Orondu omambo nga tjinga ayehe ri owomungandjo ku eṋe, nungwari owo omuinyo weṋu; nu mokuṱakamisa omambo nga mamu kahupa orure mehi, ndi mamu kakambura ri rire ouini weṋu, tji mwa zu nokukakonda onḓonḓu Jordan.”

48 Meyuva tjingero ndo Muhona wa hungira ku Moses a tja: 49 “Twende kozondundu Abarim, mehi ra Moab, omuhunga wotjihuro Jeriko; karonde kondundu Nebo, nu kaṱarere ko ehi ra Kanaan, ndi me yandja kOvaisrael ri rire ouini wawo. 50 Nu mo kakokera kondundu ndjo ku mo karonda, no kawongerwa pomuhoko woye tjimuna erumbi roye Aron tja kokera kondundu Hor na kawongerwa pomuhoko we, 51 eṋe tjinga amu ha ri nouṱakame ku ami, momurungu wOvaisrael. Tji mwa ri pomeva wa Meriba, popezu notjirongo Kades, mokuti onguza Sin, mwe ndji nyengurira momurungu wOvaisrael. 52 Nu ehi ndo ndi me yandja kOvaisrael mo rimwine kokure, nungwari komoo kahita mu ro.”