Ehungi oritjavari ra Elihu
1 Elihu wa hungira komurungu a tja:
2 “Eṋe, varumendu ovanaunongo
novanazondunge,
nambano purateneye ku
imbi mbi me hungire.
3 Omatwi ye rora omambo
kutja omanazondunge,
tjimuna eraka tji ri rora ovikurya.
4 Ihi tji ri ku eṱe okupangura otjiposa,
kutja tji ri osemba.
5 Job u hungira kutja eye omuhinandjo,
nungwari Ndjambi u
panḓa okumupa ousemba.
6 Eye u pura a tja: ‘Me sora vi okukora ovizeze,
ne tja ami mbi ri posyo?
Orutu rwandje aruhe rwaihamwa,
nungwari hi tjitire ouvi.’
7 “Mu na pu mwa muna ngamwa omundu,
ngu ri otja Job are?
Eye u yamburura Ndjambi tjinene nai.
8 Eye wa suvera okukara puna ovatjite vouvi,
nu u ryanga puna ovarunde.
9 Eye u tja kahepero omundu
okukondja okutjita ombango ya Ndjambi.
10 “Purateneye ku ami, eṋe varumendu,
mbu mu nozondunge!
Ndjambi Omunamasaaehe ka
tjiti ouvi nouhasemba;
11 Eye u yandja ondjambi kovandu
ku imbi mbi mave tjiti,
nu u ve ṱuna otja kongaro ndje ve pwire.
12 Ndjambi Omunamasaaehe, tjiri, ka tjiti ouvi,
eye ka tjiti ouhasemba ku ngamwa auhe.
13 Ndjambi hapo omasa we u pewa
i ngamwa omundu are?
Pe nomundu umwe ngwe mu zika
motjiungura tjokutjevera ouye are?
14 Andakuzu Ndjambi u yarura omuinyo
mbwa suvira momundu,
15 auhe ngu nomuinyo, atja koka
na yaruka koruuma rukwao.
16 “Nambano puratena ku ami, tji u nounongo!
17 Mo pangura Ndjambi omunausemba are?
Mo tjangovasi ingwi ngu nyengwa
ousemba ma yenene okuhonapara are?
18 Ndjambi ma pangura
ozombara novahongore,
owo tji ve ri ovandu
oviporoporo poo ovanauvi.
19 Eye ka karere kovahongore,
wina kasuvere ovatumbe povasyona,
eye tjinga e ri ngwa utire avehe.
20 Owo avehe rumwe mave
koka tjimanga mouṱuku.
Ndjambi u tona ovandu, nowo mave ṱu;
eye ma zepa omunamasa
nokuhinongondjero oparukaze.
21 Eye u tjevera ozondjira zovandu
nomakayendero wawo.
22 Kape nonḓorera yomuzororema ndja yenena
okuhoreka omunauvi ku Ndjambi.
23 Ndjambi ka hepa oruveze
okukonḓonona omundu
kutja e ye komurungu we mombanguriro.
24 Eye ka hepa omakonḓononeno
okuyandeka ovanauvara nokutwa
mo varwe motuveze twawo.
25 Eye tjinga e tjiwa imbi mbi ve tjita,
eye meve natere pehi ne ve ṱukuṱura mouṱuku.
26 Eye ma vere ovanauvi momurungu waavehe,
27 owo tjinga ava isa okumukongorera
nave ha ningire ko na tja nomatwako we aehe.
28 Owo ve ṋiṋikiza ovasyona nga tji
mave uru ku Ndjambi,
neye u zuva ozondjemeno zawo.
29 “Ndjambi tje rimana okuhinokutjita otjiṋa,
kape na ngu me mu kwekurura.
Eye tja horeke omurungu we,
kape na ngu me mu munu,
30 kokutja eye a tjevere otjiwaṋa novandu,
kovarunde mbu mave rire ombate
kotjiwaṋa ave ha honapara.
31 “Job, ove hapo wa hepura
omauvi woye ku Ndjambi,
no yana kutja ko nokutjita ko ouvi rukwao are?
32 Ove wa ningira Ndjambi kutja e
ku raisire ozondataiziro zoye,
nu wa itavera kutja mo yandisa ourunde are?
33 Ove tjinga au nakaura imbi Ndjambi mbye tjita,
mo undju kutja a yenenise
imbi ove mbi movanga are?
Nambano tji ri kove kutja mo tjiti vi,
katji ri ku ami!
Tu raera nambano imbi mbi mo ripura.
34 “Omundu auhe omunazondunge,
nomundu auhe omunaunongo
ngu me ndji zuu, ma tja nai:
35 Job ma hungire nokuhinondjiviro,
nu momambo we kamu nozondunge.
36 Ripureye noviṋa avihe Job mbi ma hungire,
neṋe mamu munu kutja eye
u hungira tjimuna omunauvi.
37 Kourunde we eye u
weza ko okuhinonḓuviro;
eye u hemba Ndjambi
momurungu wetu atuhe.”
© Herero Revision Bible © Bible Society in Namibia, 2021.
