Ongumbiro mombamisiro
Epsalme ra David otja otjiyandjewa tjoruhoze.
1 Muhona, o ndji vere
momazenge woye;
nu o ndji tono momapindi woye.
2 Oviku vyoye vye ndji yaha,
neke roye re ndji havera.
3 Mena romazenge woye ami
mbi nomihihamo omizeu,
orutu rwandje aruhe rwa vera
mena rourunde wandje.
4 Ami mba ṱomwine momupupo
womauvi wandje;
ya karira otja omutwaro omuzeu
ku ami okuutjinda.
5 Ovirwaro vyandje vya wora nu mavi ṋuka navi,
mena rouyova wandje.
6 Ami mba petwa nu mba ṋiṋikizirwa pehi,
me ryanga ame riri eyuva arihe.
7 Orutu rwandje rwe ura notjipyu tjotjindjumba,
nu kape na pu pe ri nawa morutu rwandje.
8 Ami mba wotama, nu mba ṱukara tjinene;
me tjemisiwa i omihihamo momutima wandje.
9 Muhona, ove mo tjiwa
ozonḓero zandje nozondjemeno
zandje azehe kaze horekerwe kove.
10 Omutima wandje mau tono tjinene,
hi tji nomasa;
nomeho wandje kaye tji nondjerera.
11 Omapanga novararanganda
vandje kave nokuya popezu na ami
mena rovirwaro vyandje;
nandarire movazamumwe vandje
ve kurama kokure na ami.
12 Imba mbe vanga okundjizepa ve
ndji twira po ozombate,
nu imba mbe paha okundjitjita
otjipo ve tanda okundjiyandeka;
owo ve uhara amave ripura
okundjitjita ovineya.
13 Ami mbi ri otja omboro ndji ha zuu,
notja omusete weraka
ngu ha nyamukura ko.
14 Tjiri, ami mbi ri otja
omundu ngu hi nokuzira,
tjinga e hi nokuzuva.
15 Nungwari ami mbe riyameka
kove, Muhona;
nove, Muhona, Ndjambi wandje,
mo ndji zuvire.
16 Ihi tji me ningire kove, otjo hi:
O isa ovanavita na ami kutja ve
nyandere ombamisiro yandje;
o tarere amave rihivire omawiro wandje.
17 Ami mbi ri pokuwa,
nu aruhe mbi kara momahihamisiro.
18 Ami me rihepura ourunde wandje;
owo we ndji kurungisa.
19 Nungwari ovanavita na ami
ovaveruke nu ve nomasa;
nu imba mbe ndji tonda wina, va takavara.
20 Imba mbe yarura ouvi mouwa
ve ndji kuramena momurungu
tjinga ambi paha ouwa.
21 O ndji esa, Muhona,
nu o kara kokure na ami, Ndjambi wandje!
22 Hakahana okundjivatera, Muhona,
ngu u ri omuyame wandje!
© Herero Revision Bible © Bible Society in Namibia, 2021.
