Embo ra Ndjambi mOmuna we
1 Rukuru Ndjambi wa hungirire kootate mukururume potuingi na momihingo omingi pekepeke novinyo vyovaprofete, 2 nungwari momayuva omasenina nga eye wa hungira ku eṱe mOmuna we. Eye onguri ngwi Ndjambi ma uta ouye, nu onguri ngwi Ndjambi ngwa toorora okurira omurumate waavihe. 3 Mu ye omu mu keṋakeṋa ongeṋangeṋeno ya Ndjambi, neye osaneno yongaro ya Ndjambi. Eye u ṱakamisira ouye auhe kumwe nembo re enamasa. Nu tja za nokukutura ovandu kourunde wawo, otja kakara pehi meyuru kokunene kwa Ndjambi, Omunamasaaehe.
Ounene wOmuna wa Ndjambi
4 Omuna wa utwa omunene kombanda yovaengeri otja ena nda pewa i Ndjambi punga ari ri enene kombanda yomana wawo. 5 Orondu Ndjambi ke na pa tjere ku ngamwa omuengeri:
“Oove Omuna wandje;
ndinondi ami ondi mbe ku kwata.”
Nu wina ke na pa tjere:
“Ami me rire Ihe,
neye ma rire Omuna wandje.”
6 Nu Ndjambi tja ri pokuhinda Omuna we omukwatwaerike mouye, wa tjere:
“Ovaengeri avehe va Ndjambi ngave rikotamene ku ye.”
7 Nungwari imba ovaengeri Ndjambi we ve tja:
“Ndjambi ma tjiti ovaengeri ve ve rire ovivepo,
novakarere ve ve rire otururumo tomuriro”
8 Nungwari ingwi Omuna Ndjambi we mu tja:
“Ouhona woye, Ndjambi, mau karerere nga ko nga aruhe.
Ove u honaparera otjiwaṋa tjoye nousemba.
9 Ove wa suvera ousemba, nu wa tonda ourunde.
Opu wa zokutoororwa i Ndjambi, Ndjambi woye,
neye ope ku pera enyando nondjozikiro
povakweṋu avehe.”
10 Nu rukwao wa tja:
“Ove, Muhona, kombutiro wa utire ehi,
nu wa utire omayuru nomake woye omuini.
11 Eyuru nehi maye yanda, nungwari ove mo karerere;
owo aehe maye kurupa otja ozombanda.
12 Ove mo ye yanga otja ongwava,
nowo maye tjituka otja ozombanda,
nungwari ove aruhe otjinga au ri otja tji wa ri,
nozombura zoye kamaaze yanda ko.”
13 Ndjambi ke na pa tjere ku ngamwa omuengeri:
“Kara pehi kokunene kwandje
nga ami tji mba twa ovanavita na ove
kehi yozombaze zoye.”
14 Nu ovaengeri hapo ovakwatjike? Owo avehe ozombepo nde karera Ndjambi, nu nde hindwa i ye okuyekuvatera imba mbu mave rumata ombwiro yomuinyo.
© Herero Revision Bible © Bible Society in Namibia, 2021.
