Ombamisiro nondangero
Komuimburise otja kombosiro yOngoṱu yOmuhuka. Epsalme ra David.
1 Ndjambi wandje, Ndjambi wandje,
ove we ndji esire tjike?
Ami mba kwa ombatero mokuyaraara,
nungwari oyo ingee kaiye ya.
2 Ndjambi wandje, omutenya mbi
uhara ame ku isana,
nungwari ove ko ndji ziri.
Ouṱuku wina mbi rara ame ku isana,
nungwari hiya muna orusuvo.
3 Nungwari oove Omuyapuke,
ngu u honaparerera
kotjihavero tjoye tjouhona,
nu ngu tangwa i otjiwaṋa tjoye Israel.
4 Ootate mukururume ve riyamekere kove,
ve riyamekere kove, nove arire tji we ve yama.
5 Owo va kwire kove, nove yama koumba;
ve riyamekere kove, no he ve ṱisa ohoṋi.
6 Nungwari ami kawami omundu rukwao; owami etiva,
mbi nyekererwa i ovandu,
nu mbi nyengewa i omundu ngamwa auhe.
7 Auhe ngu me ndji munu, me ndji yoro,
me ndji ropororere eraka,
na taka otjiuru na tja nai:
8 “Ove we riyameka ku Muhona,
okutjavi eye tje hi nokukuyama?
Muhona tje ku suvera,
okutjavi tje hi nokukuvatera?”
9 Oove ngu we ndji isa mezumo
ra mama nokuhinatjipo,
noove ngu we ndji nyamisisa
komavere wamama nokuhinatjipo.
10 Ami mba rekareka kove
okuza kongwatero yandje,
nove oove Ndjambi wandje
okuza mezumo ra mama.
11 O kara kokure na ami,
orondu ombamisiro i ri popezu,
nu kape na ngu me ndji vatere.
12 Ovanavita na ami ovengi ve ndji
kovera otja ozondwezu zozongombe;
ve ndji kovera ominda avihe
otja ozondwezu zozongombe
ovindandi zehi ra Basan.
13 Owo ve ndji mwahururira ovinyo
vyawo tjimuna ozongeyama
nḓu maze tye ovimboro,
amaze nyondorora otjipuka tji za zepa.
14 Omasa wandje ya manuka
tjimuna omeva nga tirahirwa mehi.
Omaṱupa wandje aehe ya pihuka;
omutima wandje wa zuzuka tjimuna erose.
15 Omuriu wandje wa kaha tjimuna oruuma,
neraka randje ra kakatera koruramwa rwandje.
Ove we ndji rangavarisa moruuma aayo mba koka.
16 Otjira tjovanauvi tje ndji kovere;
otjo tja wire kombanda yandje
tjimuna orumbunda rwozombwa;
tja pandeke omake nozombaze zandje.
17 Omaṱupa wandje aehe me sora okuyevara.
Ovanavita na ami mave ndji
munu nave ndji tara ava nongwa.
18 Mave haṋasana ozombanda zandje,
nu mave yumbire ongwava yandje ozohanga.
19 Muhona, o kara kokure na ami!
Oove ngu u ri omasa wandje.
Hakahana okundjivatera!
20 Ndji yama kengaruvyo rovanavita na ami;
yama omuinyo wandje kozombwa nḓa.
21 Ndji hakana motjinyo tjongeyama;
ndji yama kozonya zonyati nḓa.
22 Ami me serekarerere ovandu vandje imbi mbi wa tjita;
mokati kombongo me ku hivirike.
23 “Eṋe mbu mu nondira ku Muhona, Mu hivirikeye!
Zondekurona za Jakob,
mu peye ondjozikiro!
Vaisrael amuhe, rikotameneye ku ye.
24 Eye aruhe u rikendera ovasyona,
nu ka yandja etambo kouzeu wawo,
eye kahoreke omurungu we ku wo,
nungwari eye,
u ve zuvira tji mave ku ombatero ku ye.”
25 Mombongo aihe ami me ku tanga;
momurungu wa imba mbe rikotamena kove
nami me punguha ozombunguhiro
nḓu mba kwizika.
26 Ovasyona mave ri atjihe ngamwa tji mave vanga,
nu mave kuta;
nu imba mbe paha Muhona ngave mu tange.
Nowo ngave ṋingapare nga aruhe.
27 Oviwaṋa avihe mavi rizemburuka na Muhona.
Okuza kovikoro avihe vyouye
ovyo mavi ritanaurire ku ye;
omihoko avihe mavi rikotamene ku ye.
28 Orondu Muhona eye ombara;
neye u honaparera oviwaṋa avihe.
29 Ovanauvara avehe mouye mave rikoto komurungu we;
avehe mbe ṱa mave woro ozongoro komurungu we.
30 Ozondekurona maze mu karere;
ovandu mave serekarere Muhona
kovanatje vovanatje vawo.
31 Otjiwaṋa tji maatji ka kwatwa matji serekarererwa nai:
“Muhona wa yamene otjiwaṋa tje.”
© Herero Revision Bible © Bible Society in Namibia, 2021.
