Ondjamo onene
1 Eṱe opu twa sokukakatera nomasa komauatjiri ngu twa zuva, kokutja atu ha undurirwa kwarwe. 2 Nu indji ombuze ndja yandjerwe kootate mukururume i ovaengeri ya raisire kutja oyo ouatjiri, nu auhe ngwe i katukire nu ngu ha ri nonḓuviro ku yo wa vererwe pu pa yenena. 3 Neṱe matu yenene vi okutaurira omberero tji tu hi nokukara ko na tja nondjamo onene otja indji? Muhona omuini rutenga ongwa zuvarisa ondjamo ndji, nu imba mbe mu zuva ve tu raisira kutja oyo ouatjiri. 4 Ndjambi wina wa zeuparisa omahongononeno wawo mokutjita ovizemburukiro novihimise vyomasa pekepeke, na mokuhaṋa oviyandjewa vyOmbepo Ondjapuke otja punga a vanga.
Ingwi Umwe ngu tu hongorera kondjamo
5 Ndjambi ka zikire ovaengeri okuhonaparera ouye mbu mau ya, nu mbu tu hungira. 6 Nungwari moruveze rwanao porive momatjangwa mwa tjangwa nai:
“Omundu u nonḓengu yatjike kutja u mu zemburuka,
omuatje womundu kutja u rikendera ye?
7 Ove we mu uta kehi yovaengeri kaṱiṱi;
we mu hareka nondatero nondjozikiro,
8 nu we mu zika okuhonaparera oviṋa avihe.”
Omambo nga maye tja: Ndjambi wa uta omundu okuhonaparera avihe, nu kape notjiṋa tja sya pehi. Nungwari eṱe katu munu kutja omundu nambano u honaparera oviṋa avihe. 9 Nungwari eṱe tu muna Jesus a zarekwa nondatero nondjozikiro motjimbe tjomihihamo nonḓiro ye. Eye wa susuparisiwa kehi yovaengeri oruveze orusupi, kokutja motjari tja Ndjambi eye a ṱire ovandu avehe. 10 Nu a ri osemba kutja Ndjambi, ngwa uta oviṋa avihe nu ngu ṱakamisa avihe, u sokusorisira ko Jesus momihihamo, kokutja a vasise ovanatje ovengi kondjozikiro ye. Orondu Jesus eye ongu ve hongorera kondjamo.
11 Eye ngu yapura ovandu, na wina imba ovandu mbe yapurwa, owo avehe ova Ihe imwe. Komuhingo mbwi Jesus otje ha ṱohoṋi okuveisana kutja ovangu ve. 12 Eye ma tja ku Ndjambi:
“Ami me serekarere ena roye kovangu vandje,
nu me ku hivirike mokati kombongo.”
13 Wina eye ma tja: “Ami aruhe me riyameke ku Ndjambi.” Norukwao ma tja: “Owami ngwi novanatje Ndjambi mbe ndji pa.”
14 Novantje mba tjinga averi ovandu wonyama nombinḓu, Jesus omuini otjinga a rira omundu otja wo. Ihi wa tjitira kutja monḓiro ye eye a yandeke ingwi ngu nomasa okuzepa ovandu, okutja eye ngwi Satan, 15 nu a kuture imba mba kara mouhuura ngunda ave nomuinyo, mena rokutira onḓiro. 16 Nu ongahukiro kutja kavaengeri eye mbe vatera, nungwari otja tji pa tjangwa momatjangwa: Eye u vatera ozondekurona za Abraham. 17 Eye opa sere okusana kovangu ve momuhingo ngamwa auhe, kokutja a rire Omupristeri wawo Otjiuru omuṱakame nomunatjari komurungu wa Ndjambi okuisira ovandu ourunde wawo. 18 Eye omuini tjinga a rorwa nokuhihamisiwa, otjinga ama sora okuvatera imba mbe rorwa.
© Herero Revision Bible © Bible Society in Namibia, 2021.
