Eimburiro rokutja okuhepa ku Ndjambi
1 Tangeye Muhona, orondu
eye tjinga e ri omuwa;
orusuvero rwe ru karerera nga aruhe.
2 Tangeye Ndjambi ngu ri omunene
tjinene poomukuru avehe;
orusuvero rwe ru karerera nga aruhe.
3 Tangeye Muhona ngu ri
omunamasa tjinene povanauvara avehe;
orusuvero rwe ru karerera nga aruhe.
4 Eye porwe u tjita oviṋa ovihimise;
orusuvero rwe ru karerera nga aruhe.
5 Nounongo we eye wa utire eyuru;
orusuvero rwe ru karerera nga aruhe.
6 Eye wa zikamisa ehi kombanda
yomeva omakoto;
orusuvero rwe ru karerera nga aruhe.
7 Eye wa ungura eyuva nomueze;
orusuvero rwe ru karerera nga aruhe;
8 eyuva kutja ri honapare mutenya;
orusuvero rwe ru karerera nga aruhe;
9 nomueze nozonyose kutja vi honapare uṱuku;
orusuvero rwe ru karerera nga aruhe.
10 Eye wa zepa omaveri omavena wOvaengipte;
orusuvero rwe ru karerera nga aruhe.
11 Eye wa pitisa otjiwaṋa tja Israel mOengipte;
orusuvero rwe ru karerera nga aruhe;
12 nomasa nouvara we ounene;
orusuvero rwe ru karerera nga aruhe.
13 Eye wa haṋa Omuronga wOtuu mokati;
orusuvero rwe ru karera nga aruhe;
14 nu wa kondisa otjiwaṋa tje;
orusuvero rwe ru karerera nga aruhe;
15 nungwari wa ṱomwinisa ombara
ya Engipte notjimbumba tjayo tjovita;
orusuvero rwe ru karerera nga aruhe.
16 Eye wa hongorera otjiwaṋa tje
okutjituurungisa mokuti onguza;
orusuvero rwe ru karerera nga aruhe.
17 Eye wa havera ozombara ozonamasa;
orusuvero rwe ru karerera nga aruhe;
18 nu wa zepa ozombara ozondjuukwa;
orusuvero rwe ru karerera nga aruhe;
19 okutja oSihon, ombara yOvaamori;
orusuvero rwe ru karerera nga aruhe;
20 na Og, ombara ya Basan;
orusuvero rwe ru karerera nga aruhe.
21 Eye wa yandja omahi wazo kotjiwaṋa tje;
orusuvero rwe ru karerera nga aruhe.
22 Eye we ye yandja ku Israel, omukarere we;
orusuvero rwe ru karerera nga aruhe.
23 Eye we tu zemburuka,
indu tji twa havererwe;
orusuvero rwe ru karerera nga aruhe;
24 nu we tu kutura komasa wovanavita na eṱe;
orusuvero rwe ru karerera nga aruhe.
25 Eye u parura oviutwa avihe;
orusuvero rwe ru karerera nga aruhe.
26 Tangeye Ndjambi weyuru!
Orusuvero rwe ru karerera nga aruhe.
© Herero Revision Bible © Bible Society in Namibia, 2021.
