Ongumbiro yombatero kovanavita
(Psa 57:7-11Psa 60:5-12)Epsalme ra David. Eimburiro.
1 Omutima wandje we riyameke kove, Ndjambi!
Ami me imbura nokukutanga!
Penduka, muinyo wandje!
2 Pendukeye, ngoma notjiharpe tjandje!
Ami me pendura enyunguhuka pe tje,
3 Muhona, ami me ku tanga
mokati koviwaṋa,
nu me ku imburire mokati komihoko.
4 Orusuvero rwoye orukarerere rwa
kavaza nga komayuru,
nouṱakame woye wa kaṱuna nga kevaverwa.
5 Raisa ounene woye meyuru, Ndjambi,
nouvara woye kombanda yehi arihe.
6 Tu vatera momasa woye;
zuvira ongumbiro yandje,
kokutja otjiwaṋa tji wa suvera tji yamwe.
7 Ndjambi wa hungirira motjouyapuke tje a tja:
“Mondoṋeno yandje ami me haṋa Sikem,
nu me sanekere otjiwaṋa tjandje
otjana tja Sukot.
8 Gilead orandje, Manasse owandje wina,
nu Efraim eye ekori randje rovita;
Juda eye okati kandje kouhona.
9 Moab eye otjiyaha tjandje tjomerikohero;
nu me yumbu orukaku rwandje kOedom,
otja otjiraisiro tjokutja eye owandje omuini.
Ami me yorokere Filisti otja ngu mbi ri omutoṋe.”
10 Owaṋi, Ndjambi, ngu me ndji
hongorere motjihuro otjizeu?
Owaṋi ngu me ndji ṱike kOedom?
11 Kaove, Ndjambi, are ngu we tu nakaurire?
Kaove are ngu mo kayenda puna
ovimbumba vyetu vyovita?
12 Tu vatera komunavita,
orondu ombatero yovandu oyo omungandjo.
13 Ndjambi tje ri puna eṱe, matu toṋa;
eye omuini ongu ma tombo ovanavita na eṱe.
© Herero Revision Bible © Bible Society in Namibia, 2021.
