Omapsalme 60 - Herero Revision Bible (HRR)

Ongumbiro yonguturiro

Komuimburise otja kombosiro Susan Edut. Epsalme ra David rokuhonga ovandu, eye tja rwisa Ovaaramei va Mesopotamie nova Soba, na Joab tja kotoka na zepa Ovaedom 12,000 mOtjana tjOmongwa.

1 Ndjambi, ove we tu nakaura,

nu we tu havera; wa pindika na eṱe,

nungwari nambano vingurukira ku eṱe.

2 Ove wa zezerisa ehi, nu wa pamburura ro.

Nambano verukisa omiṱa vyaro,

orondu oro mari teratera.

3 Ove wa munisa otjiwaṋa tjoye ouzeu;

we tu hira omavinu nge tu purukisa.

4 Nungwari ku imba mbe nondira kove,

ove we ve raisira erapi

rotjihako ku mave taurire

kutja ave ha yahwa i outa noviku.

5 Tu vatera momasa woye;

zuvira ongumbiro yetu,

kokutja otjiwaṋa tji wa suvera tji yamwe.

6 Ndjambi wa hungirira motjouyapuke tje, a tja:

“Ami me yoroka; me haṋa Sikem,

nu me sanekere otjiwaṋa

tjandje otjana tja Sukot.

7 Gilead orandje, Manasse owandje wina,

nu Efraim eye omasa wandje omanene;

Juda eye okati kandje kouhona.

8 Moab eye otjiyaha tjandje tjomerikohero;

nu me yumbu orukaku rwandje ku Edom

otja otjiraisiro tjokutja eye owandje omuini.

Ami me yorokere Filisti otja ngu mbi ri omutoṋe.”

9 Ndjambi, owaṋi ngu me ndji

hongorere motjihuro otjizeu?

Owaṋi ngu me ndji ṱike kOedom?

10 Kaove, Ndjambi, are, ngu we tu nakaurire?

Kaove are, ngu mo kayenda puna

ovimbumba vyetu vyovita?

11 Tu vatera komunavita,

orondu ombatero yovandu oyo omungandjo.

12 Ndjambi tje ri puna eṱe, matu toṋa;

eye omuini ongu ma

tombo omunavita na eṱe.