EMBO ORITJATANO
Okutanga ouwa wa Ndjambi
1 “Tangeye Muhona, orondu
Eye u nouwa;
orusuvero rwe ru karerera nga aruhe!”
2 Imba mba kuturwa i Muhona
ngave tje nao, imba eye mba
kutura momake wovevetatumise,
3 nu mba wonga momahi wozonganda
okuvekotora okuza komukuma
wokomuhuka nowokongurova,
nokuza komukuma wokeyuva
kokunene nowokeyuva kokumuho.
4 Tjiva va pambauka mokuti
onguza okukombe,
nokuhinokumuna ondjira
ndji yenda kotjihuro okukatura mo.
5 Owo va ṱire ondjara nonyota,
nu va wotama;
6 nungwari moumba wawo owo va
kwa ombatero ku Muhona,
neye we ve yama mombamisiro yawo.
7 Eye we ve twa mondjira osemba,
nu e ve hongorere kotjihuro okukatura mo.
8 Owo ngave tje okuhepa ku Muhona
mena rorusuvero rwe orukarerere,
na mena rovihimise eye mbya tjita ku wo.
9 Eye wa kovisa ovananyota,
nu e kutisa ovanandjara noviṋa oviwa.
10 Tjiva va kara monḓorera na momuzororema,
amave tatumisiwa nokupandekwa nouketanga,
11 owo tjinga ava pirukirire
omarakiza wa Ndjambi, Omunamasaaehe,
nava nakaurire omahongero we.
12 Eye we ve pungarisa noviungura ovizeu,
owo va wotama nu kapa ri
omundu ngwe ve yeura.
13 Nungwari moumba wawo owo va
kwa ombatero ku Muhona,
neye e ve yama mombamisiro yawo.
14 Eye we ve pitisa monḓorera na momuzororema,
nu wa pora omapando ngu va
pandekerwe na wo.
15 Owo ngave tje okuhepa ku Muhona
mena rorusuvero rwe orukarerere,
na mena rovihimise eye mbya tjita ku wo,
16 orondu eye wa teya omivero vyongoporo,
nu wa nyanyaura ovipate vyovitenda.
17 Tjiva va ri omayova,
nu va tatumisiwa mena romauvi
na mena rourunde wawo;
18 owo va yaukisiwa i ovikurya
ngamwa avihe,
nu ave hara okuṱa.
19 Nungwari moumba wawo owo va
kwa ombatero ku Muhona,
neye we ve yama mombamisiro yawo.
20 Eye we ve verukisa nomarakiza we,
nu e ve yama konḓiro.
21 Owo ngave tje okuhepa ku Muhona
mena rorusuvero rwe orukarerere
na mena rovihimise eye mbya tjita ku wo.
22 Ngave punguhe ozombunguhiro
zokutja okuhepa,
nu ve hongonone ovitjitwa vye nenyando.
23 Tjiva va hinga ozondjuwozomomeva mokuvare,
nu va tjita
omarandasaneno momeva kokuvare.
24 Owo va muna oviungura vya Muhona,
imbi ovitjitwa vye ovihimise
mourekoto wokuvare.
25 Eye wa rakiza,
notjivepo otjinamasa otji tja uta okuhinga
natji sekamisa ozongazona.
26 Ozondjuwozomomeva za yumbwa
kombanda meyuru,
nu aze ṱomwinisiwa mourekoto womeva;
moumba mbwi ovandu otji ve rihahiza;
27 owo va putara nave teratera otja
ovandu mba purukisiwa i omavinu,
nounongo wawo auhe kau ve vaterere ko.
28 Nungwari moumba wawo owo va
kwa ombatero ku Muhona,
neye we ve yama mombamisiro yawo.
29 Eye wa porimanisa otjivepo otjindandi,
nozongazona zokuvare za hirimana.
30 Imba mbaa ve ungura mozondjuwozomomeva
va yorokera omaporimaneno wotjivepo hi.
Ndjambi we ve hongorera nokuhinooma
kotjihuro tjokomukuro wokuvare
kuyave vanga okuyenda.
31 Owo ngave tje okuhepa ku
Muhona mena rorusuvero
rwe orukarerere,
na mena rovihimise eye mbya tjita ku wo.
32 Ngave hongonone ounene we
mombongo yotjiwaṋa,
nu ve mu hivirike mombongarero yovanane.
33 Eye wa tjitukisa omakuti,
nga takavarisire omeva,
ye rire onguza,
nomahi wotuharwi ye rire ehi ekukutu.
34 Wa tjita kutja ehi ehapise ri rire
otjongwa porwatjo mena rozondjito
zourunde wa imba mba tura mu ro.
35 Eye wa tjitukisa okuti onguza ku
rire omakuti,
nga takavarisa omeva,
nehi ekukutu ri rire omahi wotuharwi.
36 Wa turisa ovaṱandjara momahi nga
kutja ve tunge ovihuro mu mave tura.
37 Owo va ungura omahi womakunino
nave kunu omivite,
nomahi nga ya eta ovihape ovingi.
38 Eye wa sera otjiwaṋa tje ondaya,
notjo tja kara novanatje ovengi;
nu ka ṱiṱiparisire ovinamuinyo vyatjo motjivaro.
39 Otjiwaṋa tja Ndjambi tji tja
rambwa movita natji susuparisiwa
i omaṋiṋikiziro omatwe nondatumisire,
40 Eye otja nyengura ovanamasa,
nu e ve pambauza mokuti onguza
mu mu hi nondjira.
41 Nungwari imba ovasyona we ve
yama kondatumisire,
nu wa takavarisa ozondekurona zawo
komuhingo wozonyanda.
42 Ovasemba mave munu otjiṋa hi
nave yoroka,
nungwari ovarunde avehe mave mwinisiwa.
43 Imba mbe nozondunge ngave
ṱakamise oviṋa mbi,
nu ve zemburuke orusuvero
rwa Muhona orukarerere.
© Herero Revision Bible © Bible Society in Namibia, 2021.
