Okutanga Omuute waavihe
1 Tanga Muhona, muinyo wandje!
Muhona, Ndjambi wandje,
oove omunene tjinene!
Wa zarekwa nounene nongeṋangeṋeno,
2 nu we rikutjira ondjerera.
Ove wa nyaturura omayuru
tjimuna erapi rondanda,
3 nu wa tunga omaturiro woye
kombanda yomeva mevaverwa.
Ovikamba ove we vi isa po etemba roye,
nu u kavira kovivava vyombepo.
4 U tjita kutja ovivepo vi rire ovahindwa voye,
nokutja otutjeno twombura tu
rire ovakarere voye.
5 Ove wa zikamisa ehi nomasa
komazikameno waro,
noro kamaari teratera ko.
6 Rukuru omipupo vyomeva vya
vandekere ehi tjimuna ombanda,
nomeva ya kutjirire ozondomba zozondundu.
7 Nungwari ove tji wa vera omeva,
owo ya taura,
nowo ya hakahana okupupa tji ya
zuva omasa weraka roye.
8 Owo ya rauka kozondundu
naye pupire moviana,
koṋa ove ku we ye tyera okukara.
9 Ove we ye twira po omuruko mbu
ye ha sora okutanana,
kokutja aye ha vandeke ehi rukwao.
10 Wa pamuna otuharwi moviana,
nu we tu pupisira pokati kozondundu.
11 Ovipuka vyokuti vi ya okunwa mu two,
nozongoro ze ya okukowa mo wina.
12 Ozonḓera ze tunga oviruwo vyazo
momiti mbi hapa meṋe yomeva,
naze imburire motutavi twavyo.
13 Ove u rokisa ombura kozondundu
okuza meyuru, nehi ri kovisiwa
i ombura ndji u yandja.
14 U hapisira ovinamuinyo ehozu,
nu u yandja ozondwi komundu okukuna
kutja a mune ovihape vyehi,
15 okutja omavinu nge nyandisa
omitima vyovandu,
nomaze womiṋinga nge keṋakeṋisa
omirungu vyovandu,
novikurya mbi yandja omasa kovandu.
16 Omiti vya Muhona mavi munu
ombura ndja yenene,
okutja itwi otupapa twa
Libanon eye twa kuna.
17 Mu vyo ozonḓera omu ze tunga
oviruwo vyazo,
nomandongo wina ye tunga oviruwo
vyawo kozondomba zomiti.
18 Ozondundu ozonde onḓe ri
omaturiro wozongorowe,
notuuwa otutu ri omaṱarero wozohere.
19 Ove wa uta omueze kutja u raise
omieze pekepeke,
neyuva ri tjiwa omahitiro waro.
20 Wa twa po ouṱuku, nu tji kwa zorere,
ovipuka avihe vyokuti otji vi ryanga.
21 Ozongeyama ze tya ovimboro
amaze paha oviriwa,
ze ningira ovikurya vyazo ku Ndjambi.
22 Eyuva tji ra piti, ozo tjandje za
kaṱara nokukarara motuuto twazo.
23 Ovandu otji mave piti
okukaungura oviungura vyawo,
nu ave ungura nga tji ratoko.
24 Muhona, oviungura vyoye,
tjiri, ovingi tjinene!
Ove wa uta avihe nounongo.
Ehi re ura noviutwa vyoye.
25 Tara, okuvare oko ngo,
okunene nokuparanga;
mu kwo mu nyangatara ovipuka,
mbi hi notjivaro, ovinene noviṱiṱi.
26 Mu kwo omu mu ryanga
ozondjuwozomomeva,
nomu mu nyandera otjitjupamuriro,
indji onyoka onene ndji wa uta.
27 Oviutwa avihe vi yama kove
kutja u vi pe ovikurya moruveze orusemba.
28 Ove u vi pa, novyo avi ri;
u paturura eke roye, novyo avi kuta.
29 Tji wa horeke omurungu woye ku vyo,
ovyo tjandje vya uruma;
tji wa isa mo ominyo vyavyo,
ovyo mavi koka navi yaruka
koruuma ku vya za.
30 Nungwari tji we vi pe osuvaneno,
ovyo otji vi kara nomuinyo;
nombunikiro yehi ove u i yarura koupe.
31 Ondangu ya Muhona ngai
karerere nga aruhe!
Noviungura vya Muhona
ngavi mu pe enyando!
32 Eye u tara kehi, noro ari zezera;
u ṱuna kozondundu,
nozo aze twimisa omuise.
33 Ami me imburire Muhona
ngunda ambi nomuinyo;
me hivirike Ndjambi wandje
neimburiro ngunda ambi ri po.
34 Eye nga kare nonyuṋe meimburiro randje,
orondu ondjorokero
yandje i za ku Muhona.
35 Ovanauvi ngave zengisiwe kombanda yehi,
novarunde ave kara ko rukwao.
Tanga Muhona, muinyo wandje.
Tanga Muhona!
© Herero Revision Bible © Bible Society in Namibia, 2021.
