Ongumbiro yonguturiro yotjiwaṋa
Omuimbo wa Asaf.
1 Ndjambi, ove we tu nakaurire
tjike nai nga aruhe?
Mo ṱire tjike omazenge notjiwaṋa tjoye?
2 Zemburuka ombongo yoye,
ndji we ritoororera rukuru,
nu ndji wa kutura kouhuura okurira ouini woye.
Zemburuka Ondundu ya Sion ove ku wa turire.
3 Indjo u yekuryanga movitambatundu
mbya haṋika rukuru;
ovanavita na eṱe va hahaura oviṋa
avihe mondjuwo yoye.
4 Ovanavita na ove va rokohera
mondjuwo yoye;
owo va zika omarapi wovihako
ye rire otjiraisiro tjondoṋeno yawo.
5 Owo aave munika otja ovake vomiti,
mbu mave wisire omiti
pehi nomakuva wawo.
6 Omiti avihe mbya hongwa nawa,
va hahaura nomakuva nozongowa.
7 Owo va nyosa ondjuwo yoye,
nu va yamburura poṋa pu u rikotamenenwa.
8 Ve rihungirira nai momitima vyawo:
“Ngatu hahaure oviṋa avihe okumana!”
Owo otji va ningiririsa ozondjuwo azehe
mehi Ndjambi muye rikotamenenwa.
9 Oviungurise vyetu oviyapuke avihe,
imbi oviraisiro vyokutja Ndjambi ope ri,
vya isiwa po;
kape tji novaprofete mba sewapo;
nu kape nomundu ngu ma tjiwa kutja
otjiṋa hi matji kara nai nga ruṋe!
10 Ndjambi, ovanavita na eṱe
mave ku yoro nai nga ruṋe?
Mave yamburura ena roye nai nga aruhe are?
11 Mo hirimanene tjike nokuhinokutjita otjiṋa?
Arikana, uta okutuvatera.
12 Nungwari ove, Ndjambi,
oove ombara yetu okuza korukuru;
Ove wa tjita oviungura ovinene
kombanda yehi.
13 Ove wa haṋene okuvare mokati
nomasa woye omanene,
nonyanyaura oviuru vyovitjupamuriro momeva.
14 Wa ṱukuṱura oviuru vyonyoka onene yokuvare Leviatan,
norutu rwayo ove we ru yandja
okusasaurwa i ovipuka vyokuti onguza.
15 Oove ngu wa topora otuharwi nozonḓizira,
nu wa pwirisa ozonḓonḓu nḓe pupa aruhe.
16 Omutenya owoye nouṱuku wina;
wa zika eyuva nomueze potuveze twavyo.
17 Ove wa zika omiruko vyouye,
wa uta okurooro nokupepera.
18 Nungwari zemburuka, Muhona,
kutja ovanavita na ove ve ku yora,
nokutja otjiwaṋa otjiyova
matji yamburura ena roye.
19 O yandja ko otjiwaṋa tjoye tji tji hi
nomavaterero kovanavita na tjo ovindandi;
nu o zembi ko ominyo vyovaṋiṋikiziwa voye.
20 Zemburuka omerikutiropamwe
ngu wa tjita na eṱe.
Movikoro avihe vyehi vyonḓorera
mu nozondjito zoutwe.
21 Tjaera kutja ovaṋiṋikiziwa ave ha
yaruka amave ṱohoṋi;
ovasyona novahepe ngave tange ena roye.
22 Sekama, Ndjambi, yeura otjiposa tjoye;
zemburuka omayambururiro
ngu mo yambururwa na wo i
omayova eyuva arihe.
23 O zembi ko ondokohero yovekupirukire,
indji ondavaerero yovanavita na ove ndji ha yanda.
© Herero Revision Bible © Bible Society in Namibia, 2021.
