Omiano 24 - Herero Revision Bible (HRR)

Omuano Outjamurongo na Muvyu

1 O ṱeruru novandu ovarunde, nu o kondjo okutjita oupanga kuna wo, 2 omitima vyawo tjinga avi ripura noutwe, nomiṋa vyawo avi hungira oumba.

Omuano Outjamirongo Vivari

3 Onganda i tungwa mounongo nu i zikamisiwa nawa nozondunge. 4 Nu mondjiviro omatuwo wondjuwo ye urisiwa noviṋa ngamwa avihe ovinanḓengu novihuze.

Omuano Outjamirongo Vivari na Umwe

5 Okokuwa okurira onongo komeho yokurira omunamasa; ondjiviro onanḓengu pokurira omutjiukwa. 6 Orondu ovita vi haverwa nomeripura omawa, noutoṋi u tyewa i ovayandjandunge ovengi.

Omuano Outjamirongo Vivari na Vivari

7 Ounongo kamaau vazewa i omundu eyova; eye ka nyamukura tji mape hungirwa oviṋa ovinanḓengu motjira.

Omuano Outjamirongo Vivari na Vitatu

8 Omundu ngu ripura nouvi aruhe, u isanewa kutja omunatjitandi. 9 Eyova ri ripura nouvi porwe; omunyekerere u yaukisa ovandu.

Omuano Outjamirongo Vivari na Vine

10 Tji mo riraisa kutja oove otjingundi moruveze rwouzeu, okutja, tjiri, oove otjingundingundi.

Omuano Outjamirongo Vivari na Vitano

11 Yama imba mbu mave twarewa konḓiro ave hi nondjo, nu kotora imba mbu mave kaṱa. 12 Tji motja nai: “Tara, eṱe katu tjivirwe”, Ndjambi ngu rora omitima vyovandu kee vi konḓonona are? Eye ngwi ngu tjevera omuinyo woye, me tji tjiwa. Eye u sutisa omundu otja kozondjito ze.

Omuano Outjamirongo Vivari na Hamboumwe

13 Muatje wandje, ryaa ouitji wozonyutji tjinga au ri ouwa. Oruaze rwouitji mbwi ru tjata omuzeze moruramwa. 14 Nounongo u ri nao, tjiri, komuinyo woye; tji we u munu, mo kara nomahupiro komurungu, nomaundjiro woye kaye nokurira omungandjo.

Omuano Outjamirongo Vivari na Hambombari

15 Munauvi, o natere momaturiro womusemba, o nyono ondjuwo ye. 16 Nandarire kutja omusemba ma u potuingi, eye ma sekama rukwao; nungwari ovanauvi mave putara moviwonga.

Omuano Outjamirongo Vivari na Hambondatu

17 O yoroka, omunavita na ove tja u, nu o nyanda omutima eye tja putara, 18 poo Muhona ma munu nanyengwa, nu e he mu pindikire.

Omuano Outjamirongo Vivari na Muvyu

19 O pindikire ovatjite vouvi, nu o ṱeruru novarunde; 20 orondu omunauvi ke nomaundjiro, nemunine romurunde ri zema.

Omuano Outjamirongo Vitatu

21 Muatje wandje, kara nondira ku Muhona na kombara wina. O rikutu kuna ovandu mbe ve pirukira. 22 Ovandu otja imba mave yenene okuyandekwa kamanga. Nu owaṋi ngu ma tjiwa kutja otjingee tjiwonga Muhona nombara tji mave hindi?

Omiano omikwao vyozonongo

23 Ozonongo wina za hungira omiano mbi:

Okokuvi okutjita ombangu mombanguriro. 24 Ngu ma tja komunandjo: “Ove ko nondjo”, ma sengwa i ovandu nu ma tondwa i otjiwaṋa. 25 Nungwari ovapangure mbe vera omunandjo, mave serwa ondaya nu ave ṋingapara.

26 Ngu yandja omaziriro omasemba u raisa oupanga watjiri.

27 Ungura oviungura vyoye nawa pendje, nu ṱuna ehi roye romakunino; tjazumba ritungira onganda yoye.

28 O hongononene omukweṋu ovizeze nokuhinomeripuriro omasemba, nu o mu hungirire oviṋa vyoposyo. 29 O ha tja nai: “Ami me tjiti ku ye otja eye tja tjiti ku ami! Me sutisa omundu auhe otja kozondjito ze!”

30 Ami mba varama ehi romakunino romunatjirweyo, na meṋe yotjikunino tjomivite tjomundu eyova. 31 Nu tara, ovyo vye ura nomakuiya nu mwa hapa ozohongwe; orumbo rwomawe ndwe vi kondoroka tjandje rwa wa. 32 Mba tara koviṋa mbi, e ripura na vyo ne rihongo omahongero mu vyo: 33 Tji wa koṱura kaṱiṱi, tji wa rara kaṱiṱi nokuhuta omaoko kaṱiṱi kutja u suve, 34 ousyona woye mau ku kambura hakahana, nouhepe otji mau ku hakana otja omupunde omunavirwise.