Omaronga omakwao
1 Muatje wandje, ove wa kwizika okuritwa mondjo yomukweṋu, nu mwa pasana omake nomundu wozonganda are? 2 Ove wa pandekwa i omambo woye omuini, nu wa kamburwa i omakwizikiro woye omuini, 3 nambano muatje wandje kutja uri yame nu uri pitise mouvara womundu ngwi, tjita nai: Hakahana, twende ku ye, u keriyarikaṋe kutja e ku kuture. 4 Ove omuini o rara nu osuva. 5 Rikutura komasa we otja ongoṱu mombate, notja onḓera mongwehe!
6 Munatjirweyo, tara kozombuka nu u rihongere ku zo omuhingo ozo mbu ze hupa, nove mo rire onongo. 7 Ozo kaze nomunane poo omuhona poo omuhongore, 8 nungwari ozo ze pwika ovikurya vyazo mokurooro nokuwonga ombwiko yazo moruveze rwomakondero. 9 Munatjirweyo, motjirwa momara au ri mombete yoye nga ruṋe? Mo penduka ruṋe mozomboṱu? 10 Eye ma ziri a tja: “Ami me sike omeho kaṱiṱi uriri; me nyutu omake wandje nokusuva kaṱiṱi.” 11 Nungwari ove ngunda awa rara, ousyona mau ku yendere tjimuna omupunde ngwe ripangaṋa novirwise.
12 Omundu wa kauriri nomunauvi u ryangisa ovizeze nozohukutu. 13 Eye u ṋanga neho na raisa nozombaze, na tjiti ovisanekero nominwe, 14 oruveze aruhe ngunda ame ripura nouvi mozondunge ze zoposyo, nu ama hohiza oumba poṋa apehe. 15 Mena rotjiṋa hi otjiwonga otji matji mu wire e hiya tjiza, neye ma hihamisiwa na ha munu omberukiro.
16 Oviṋa hambombari Muhona mbya tonda nu mbi mu yaukisa ovyo mbi:
17 Onḓarero yomeritongamisiro,
eraka rovizeze,
omake nge zepa ovandu ovehinandjo,
18 ondunge ndji ripura ouvi,
ozombaze nḓe hakahana okukatjita ouvi,
19 omuhongonone ngu kora ovizeze aruhe,
nomundu ngu hohiza oviposa pokati kovazamumwe.
Omaronga kokuhinokukatuka orukupo
20 Tjita imbi iho mbi me ku raere, muatje wandje nu o zembi ko imbi nyoko mbi me ku hongo. 21 Aruhe patera omambo nga momutima woye nu u ye kute mosengo yoye. 22 Tji mo kaenda, omahongero wawo maye ku hongorere aruhe, uṱuku tji wa rara, maye ku tjevere, nu mutenya maye ku rongo. 23 Omahongero wawo owo emunine ndi yandja ondjerera nu omavyuriro wawo maye ku hongo omuhingo wokuhupa. 24 Owo maye ku tjaere komukazendu omuhahu na komapopa womukazendu womurumendu warwe. 25 O nanukire ouwa we, nu o wovisiwa ko tji me ku papaizire omeho. 26 Omukazendu omukorondu mo sutu otjimariva tjomboroto ombomba, nungwari okukatuka orukupo okwo ma ku kosa omuinyo woye.
27 Hapo ove mo sora okutjinda omuriro kotjari tjoye no ha nyosa ozombanda zoye are? 28 Mo sora okukawondja komakara omapyu no ha pi ozombaze zoye are? 29 Otji mape kara nao nomurumendu ngu ma rara pomukazendu womuraranganda we; auhe ngu ma ṱunu ku ye ma verwa. 30 Ovandu kave nyengwa erunga tji ra vaka ovikurya mena rondjara, 31 nu posi ya tji ra kamburwa mari sutisiwa povikando hambombari, noro mari yandja oviṋa avihe mbi ri na vyo. 32 Nungwari omurumendu ngu katuka orukupo ke nozondunge. Auhe ngu ma tjiti nao me rinyono omuini uriri. 33 Eye ma yambururwa nokutonwa; nu a ṱohoṋi nga aruhe. 34 Orondu oukoze u yandja omazenge komurumendu ngwa kupa; eye ka kara notjari tja toora ongore. 35 Eye ke nokukambura otjisuta kangamwa; kape noviyandjewa vyorive mbi mavi wisa omazenge we pehi.
© Herero Revision Bible © Bible Society in Namibia, 2021.
