Judas 1 - Herero Revision Bible (HRR)

1 Okuza ku Judas, omukarere wa Jesus Kristus, nomuangu wa Jakobus. Me tjanga ku imba mba isanewa i Ndjambi, mbe ri morusuvero rwa Ndjambi Ihe nu mbe tjeverwa i Jesus Kristus:

2 Otjari nohange norusuvero ngavi rire ovyeṋu okuura.

Ovahonge woposyo

3 Vakwetu ovasuverwa, ami mba kondja tjinene okumutjangera ondjamo eṱe atuhe mu tu norupa. Nungwari ami me munu kutja mbi sokumutjangera tjimanga okumuyanḓiparisa kutja mu rwire ongamburiro indji Ndjambi hapo ndja yandja kotjiwaṋa tje. 4 Orondu ovandu tjiva mbe ha tjiwa Ndjambi ve ya mokati ketu mongumumu. Owo va zunḓa otjari tja Ndjambi wetu kokutja ve riise mo mongarero yawo ombi, nu va imbirahi Omunauvara erike noMuhona wetu Jesus Kristus. Omatjangwa ya ukire rukuru hapo indji omberero ndji va muna.

5 Nandarire kutja mamu tjiwa oviṋa avihe mbi, ami me vanga okumuzemburukisa omuhingo Muhona otjikando tjimwe mbwa yamene na wo otjiwaṋa tja Israel kOvaengipte, nu tjazumba kombunda a kanyona imba mbe ha kamburire. 6 Wina zemburukeye imbi mbya tjitirwe kovaengeri mba mbe ha karere pu pa yandera ouvara wawo, nungwari mba isa omaturiro wawo. Ndjambi we ve pandekere nomapando nge ha timbauka, nu u ve ṱizira mourekoto womuzororema mu mave undjire ombanguriro yawo mEyuva ndi enene. 7 Zemburukeye Sodom na Gomora novirongo mbya ri popezu na vyo. Ovature vavyo aave tjiti otja ovaengeri mbo, notji ve ritwa mozondjito ozohakohoke nave tjiti oviṋa oviyaukise. Notja omaronga kovandu avehe owo ve ri momuriro waaruhe otja omberero yawo.

8 Nu momuhingo tjingewo owo movirimunikise vyawo vyomoturoto ve katuka notutu twawo oveni, nowo ve nyengura ouvara wa Ndjambi nave yamburura oviutwa oviingona vyeyuru. 9 Nandarire ingwi omuengeri otjiuru Mikael ka tjitire otjiṋa hi. Eye tja patasana na Satan kutja owaṋi ngu ma pewa orutu rwa Moses, Mikael ka rorere okuyambururire Satan nu ke mu pangurire, nungwari wa tjere ku ye: “Muhona nge ku vere!” 10 Nungwari ovandu mba ve yamburura oviṋa avihe, mbi ve hi nokutjiwa; nu imbi mbi ve tjiwa nokuhinouripura, tjimuna ovipuka vyokuti, ombi ri oviṋa mbi ve nyona. 11 Owee ku wo, tjinga ava twara ondjira ndji Kain ndja twarere. Nu motjimbe tjotjimariva owo va tjita ovineya mbi Balaam mbya tjitire. Owo va tjita ezunganeno otja Kora tjinga a tjitire, narire tji va yandekwa. 12 Owo ve mu yaukisa pomariro weṋu worusuvero mokurya neraru nokuhinohoṋi, nu ve na ko na tja na wo oveni porwe. Owo ve ri otja ovikamba mbi ha roko nu mbi mavi hingwa i ombepo. Ve ri otja omiti mbi ha ruku ovihape nandarire moruteṋi, mbya zukurwa nomize avihe, nu mbya koka okuyanda. 13 Owo ve ri otja ozongazona ovindandi zokuvare nḓe eta esuzu rozondjito zazo zohoṋi. Ve ri otja ozonyose nḓa pita momirari vyazo. Ndjambi we ve ṱunina oruveze mourekoto womuzororema mu mave karerere nga aruhe.

14 Nu Enok, indji ondekurona oitjahambombari ya Adam, we ve profeta rukuru a tja: “Muhona meya novaengeri ve ovayapuke omayovi omengi, 15 okuyekupangura ovandu avehe. Eye avehe meve verere ozondjito zourunde ndu va tjita, nu imba ovarunde meve verere omambo omayaukise ngu va hungirira ye!”

16 Ovandu mba aruhe ve unaunina ovakwao nokuvekuminina; ve hupa otja kozonḓero zawo zouvi. Owo ve rihiva oveni nu ve popa ovakwao kokutja ve ritumbise oveni.

Omaronga nomayanḓiparisiro

17 Nungwari eṋe, vakwetu, zemburukeye imbi mbi mwa raerwa i ovaapostele va Muhona wetu Jesus Kristus moruveze ndwa kapita. 18 Owo va tjere ku eṋe: “Omayuva omasenina tji ye ya, mape kara ovandu mbu mave mu nyekerere, nu mbu mave hupu otja kozonḓero zawo zouvi.” 19 Ovandu mba ve eta ohaṋi; owo ve hingwa i ozonḓuma zawo, nu mu wo kamu nOmbepo ya Ndjambi. 20 Nungwari eṋe vakwetu, panḓereye pongamburiro yeṋu ondjapuke tjinene nu mu zikame mu yo! Kumbeye aruhe momasa wOmbepo Ondjapuke. 21 Kareye morusuvero rwa Ndjambi amamu undju ku Muhona wetu Jesus Kristus kutja e mu pe omuinyo waaruhe motjari tje.

22 Tjariparereye imba mbe ripura pevari. 23 Yameye ovakweṋu varwe nokuvehakana momuriro. Nu varwe ve ṱireye otjari, nungwari tondeye nangarire inḓa ozombanda zawo nḓa ṱundwa i ozonḓuma zawo zouvi.

Ongumbiro yondangero

24 Ku ye ngu nomasa okumuyama kombutarero nokumueta nokuhinatjipo nondjorokero komurungu wongeṋangeṋeno ye, 25 ku ingwi Ndjambi porwe Omuyame wetu mu Muhona wetu Jesus Kristus, eye ongu nongeṋangeṋeno nounene nomasa nouvara okuza korukuru nga konambano nga ko nga aruhe! Amen.