Eimburiro ra Moses
1 Moruveze ndo Moses nOvaisrael va imbura eimburiro ndi kondjozikiro ya Muhona:
“ami memu imburire Muhona, orondu eye wa tongama kombandambanda.
Oukambe novakavire we ve yumbu momuronga.
2 Muhona Eye omasa wandje netangero randje,
eye we ndji yama.
Eye o Ndjambi wandje, ami memu tanga,
Ndjambi wa tate, ami memu imburire eimburiro rounene we.
3 Muhona eye ependa;
ena re o Muhona.
4 “Omatemba wovita wa Farao we ye yumbu momuronga,
novarwe ve ovatoororwa we ve ṱomwinisa mOmuronga wOtuu.
5 Omipupo vyomeva vye ve vandeka.
Owo va ṱomwine kehi tjimuna omawe.
6 “Eke roye ra raisa omasa, eke roye enene, Muhona,
ra nyanyaura ovanavita.
7 Nu kounene woye wokombanda mo nakaura imba mbu mave ku sekamene.
Ove mo hindi otjiwiyu tjomazenge woye; notjo matji ve ningiririsa tjimuna ehozu.
8 Nu momasuvaneno womauru woye
omeva opu ya sekamene; omipupo vya kurama tjimuna ovikere,
omipupo vya kaha mokati komuronga.
9 Omunavita we ripura nai: ‘ami meve tezere, meve vaza;
me haṋa ovipundwa, nu me kambura oviṋa avihe, mbi me vanga.
Ami me nana engaruvyo randje, eke randje mari ve yandeke.’
10 Ove wa suvire nomuinyo woye, omuronga otji we ve vandeke.
Va ṱomwine tjimuna ohanga momeva omanamasa.
11 “Muhona, owaṋi, ngu ri otja ove mokati koomukuru?
Owaṋi ngu ri otja ove, ngu wa yerisiwa mouyapuke?
Ove ombanḓe movitjitwa, ngu u tjita ovihimise.
12 Ove wa roporora eke roye enene,
ehi otji re ve ṋiṋa.
13 Ove wa ṱika otjiwaṋa tjoye tji wa kutura;
Ove we ve twara nomasa woye komaturiro woye omayapuke.
14 Oviwaṋa vya zuva nai, navi zezera;
omburuma ya kambura Ovafilisti.
15 Ovanane vyomuhoko wa Edom va uruma,
movanamasa va Moab mwa taurire omazezerero.
Ovature avehe va Kanaan va mumapara,
16 okuuruma nokutira tjinga akwa wire kombanda yawo.
Muhona, kounene wokuoko kwoye va
mwina tjimuna ewe,
otjiwaṋa tjoye ngunda ama tji tuurunga,
novandu voye omuini mbu we ritoororera,
ngunda amave tuurunga.
17 Muhona, ove we ve hitisa no ve
twa mehi rozondundu ndi ri ouini woye,
poṋa pu wa ṱuna okurira omaturiro woye,
indji ondjuwo yoye ndji wa tunga nomake woye.
18 Muhona u honapara aruhe nga aruhe.”
Eimburiro ra Miriam
19 Orondu oukambe wa Farao nomatemba we wovita novakavire ve vya ṱomwine momuronga; nu Muhona wa kotora omeva womuronga kombanda yawo. Nungwari imba Ovaisrael va kayenda mokati komuronga mehi nda kaha.
20 Nu Miriam, omuprofete, omuṱena wa Aron, wa toora otjinangoma meke re, novakazendu avehe ve mu kongorere novinangoma nokuimbura amave pundu. 21 Nu Miriam we ve ziri ama imbura nai:
“Imburireye Muhona, orondu tjinga a tongama kombandambanda.
Noukambe novakavire vawo e ve yumbu momeva.”
Omeva omaruru
22 Moses wa tjindisa Ovaisrael okuza pOmuronga wOtuu. Nowo va tjindira kokuti onguza Sur. Va kayenda oure womayuva yetatu mokuti onguza, nu kave munine omeva. 23 Nowo ve ya kOmara; nungwari kaave sora okunwa omeva wa Mara, tjinga aya ri omaruru. Poṋa mbo opu pa za okurukwa Mara. 24 Notjiwaṋa tja unaunina Moses, atji tja: “Matu nu tjike?” 25 Neye wa ura ku Muhona nomasa, nu Muhona we mu urikira orukuṋe; norwo we ru yumba momeva, aye rire omawa.
Poṋa mbo Muhona we ve pa ozondyero nomazikamisiro, nu eye wina we ve rora. 26 Eye wa tja: “Ove tji mo puratene keraka ra Muhona, Ndjambi woye, nouṱakame, no tjiti imbi mbi ri osemba momeho we, no puratene komatwako we, noṱakamisa omazikamisiro we, himee eta omitjise omizeu kove, mbi mba twa kombanda ya Engipte; orondu owami Muhona, ngu me ku verukisa.”
27 Okuzambo otji ve ya kOelim. Imbo pa ri otuharwi twomeva omurongo na tuvari, nomiti vyomavare omirongo hambombari. Nowo va tunga ozondanda meṋe yomeva.
© Herero Revision Bible © Bible Society in Namibia, 2021.
