Nehemia ma i kOjerusalem
1 Eyuva rimwe momueze Nisan wombura oitjamirongo vivari youhona wombara Artakerkes, eye ngunda ama ri ami mbe mu etera omavinu. Eye ke na pe ndji munine amba yumana nai. 2 Ombara arire tji ye ndji pura ai tja: “Okutjavi tji wa yumana nai au haverere? Ngahino u nongendo momutima.”
Ami mba uruma, 3 ne ziri nai: “Omuhona wandje ombara nga hupe orure! Hi nokukara vi nondjenda, otjihuro mu mwa pakwa ootate mukururume ngunda atja nyonoka, nomivero vyatjo avya sesetwa i omuriro?”
4 Ombara arire tji ye ndji pura ai tja: “Otjikeṋa tji movanga?”
Nu ami mba kumba ku Ndjambi weyuru, 5 nu tjazumba e tja nai kombara: “Omuhona ombara tje nonyuṋe mu ami, nu tji ma vanga okundjipa imbi mbi me ningire, nge ndji ese mbi yende kehi ra Juda, kotjihuro ku kwa pakwa ootate mukururume, kokutja mbi ketjitungurure.”
6 Ombara ya zira komaningiriro wandje, oserekaze ngunda aya haama posi yayo. Oyo ye ndji pura kutja me kakara oure mbu ṱa pi, nu me kotoka ruṋe. Ami otji mba raera ombara oruveze ndwa pu ku yo; noyo arire tji ye ndji yandjere okuyenda.
7 Ami mba ningira kombara kutja tji ma vanga me ndji pe otutuu okutwara kozongooneya morukondwa rokongurova kwa Eufrat kutja ve ndji pe ousemba wokuyenda kOjuda. 8 Ami wina mba ningira orutuu okutwara ku Asaf, omuṱakamise wehwa rouhona, ndu maru mu raere kutja e ndji pe omiti vyomivero vyotjiṱunga tji tji tjevera ondjuwo ya Muhona, novyorumbo rwotjihuro, novyondjuwo mu me kakara. Ombara ye ndji pa avihe, mbi mba ningira, Ndjambi tjinga a ri puna ami.
9 Ombara ya hinda ovahongore tjiva votjimbumba tjovita notjira tjovakavire puna ami, nami mba ya kehi rokongurova kwa Eufrat. Ingo oku mba kayandjera otutuu twombara kozongooneya. 10 Nungwari Sanbalat ngwa zire kotjihuro Horon, na Tobija, Omuamoni, omuungurire wouhona, va zuva kutja kwe ya umwe ngu ma ungurire otjiwaṋa tjOvaisrael ouwa. Nowo arire tji va nyengwa tjinene.
11 Ami mba vaza kOjerusalem, ne kakara ngo oure womayuva yetatu. 12 Hi na umwe ku mba raera otjiṋa Ndjambi tje ndji pa momutima okutjitira Jerusalem. Nu mokati kouṱuku mba penduka e toora ovarumendu tjiva mba ri puna ami. Otjinamuinyo tji twa ri na tjo porwatjo tja ri okasino ku mba kavirire. 13 Ngunda e ri ouṱuku arire tji mba zu motjihuro e pitire mOmuvero wOmukutu mbwa ri kuṱa kongurova, ne i komukuma wokeyuva kokumuho okuvarama Oruharwi rwa Dragon nga kOmuvero wOviyaya. Nu ngunda ame kayenda, tjandje me konḓonona orumbo rwotjihuro ndwa haṋika, nomivero mbya sesetwa i omuriro. 14 Okuzambo otji mba ya kOmuvero wOruharwi na kErindi rOmbara. Okasino ku mba kavirire kaake sora okumuna ondjira mokati komawe wotjitambatundu. 15 Otji mba varama oruronḓu Kidron ame konḓonona orumbo. Tjazumba e kotoka nondjira, ndji mbe ya na yo, ne yaruka motjihuro ame hitire mOmuvero wOmukutu.
16 Kapa ri umwe wovahongore votjihuro ngwaa tjiwa koṋa ku mba ire, noviṋa mbi mba katjitire. Nga nai ami hi na pu mba hungira otjiṋa ku ngamwa Ovajuda ovakwetu, imba ovapristeri novanane novahongore poo ku ngamwa auhe ngwaa yenene okuvatera moviungura. 17 Nungwari ami mba tja nai ku wo: “Tareye oumba mu tu ri mbwi! Jerusalem tja nyonwa, nomivero vya haṋewa. Ngatu tungurure orumbo rwotjihuro, tu yandise ohoṋi yetu.” 18 Ami mbe ve raera kutja Ndjambi wa kara puna ami, nokutja we ndji vatera; nu wina mbe ve raera imbi ombara mbi ya hungira ku ami.
Owo va zira ave tja: “Ngatu ute okutungurura.” Nowo ve rirongerera okuuta oviungura.
19 Nu ooSanbalat na Tobija nOmuraba wena Gesem tji va zuva imbi mbi twe ripura okutjita, ve tu yora ave tja: “Mamu ripura okuungura tjike? Mamu vanga okupirukira ombara are?”
20 Ami mba zira nai: “Ndjambi weyuru me tu pe outoṋi. Oweṱe ovakarere ve, nu matu utu okutunga. Nungwari eṋe kamu nousemba nouini mOjerusalem, nu kamu norupa mongaro novitjitwa vyomuhoko!”
© Herero Revision Bible © Bible Society in Namibia, 2021.
