Lukas 3 - Herero Revision Bible (HRR)

Omazuvarisiro wa Johanes Omupapitise

1 Mombura oitjamurongo nandano youhona wombara yokombanda Tiberius, Pontius Pilatus tja ri omunane wOrukondwa rwehi ra Judea, na Herodes tja ri ongooneya yOrukondwa rwa Galilea, na Filipus, omuangu we, tja ri omunane wOrukondwa rwehi ra Iturea nora Tragonitis, na Lisanias tja ri omunane wOrukondwa rwehi ra Abilene, 2 nu Anas na Kajafas tji va ri Ovapristeri Oviuru, embo ra Ndjambi otji re ya ku Johanes, omuzandu wa Sakaria, mokuti onguza. 3 Nu Johanes wa ryangere mehi arihe ronḓonḓu Jordan ama zuvarisa: “Ritanaureye kourunde weṋu, nu papitisiweye, nu Ndjambi me mu isire ourunde weṋu.”

4 Otja tji pa tjangwa nai membo romuprofete Jesaja:

“Eraka rangu ma ravaere mokuti onguza mari tja:

‘Ṱunineye Muhona ondjira;

Mu sembamisireye omirari.

5 Sireye otupoko atuhe,

ozondundu azehe novivanda ngaze ṱekisiwe pamwe.

Ozondjira ozongoto ngaze sembamisiwe,

nomirari vyovitumbehi nga vi serurwe.

6 Nu ovandu avehe mave munu ondjamo ya Ndjambi!’ ”

7 Ovimbumba vyovandu vye ya ku Johanes okuyekupapitisiwa i ye. Eye wa tja nai ku vyo: “Zonyoka eṋe, owaṋi ngwe mu raera kutja mu taurire omberero Ndjambi ndje ri pokuhinda? 8 Tjiteye imbi mbi mavi raisa kutja eṋe mwe ritanaura. Nu amu rihungirire momitima vyeṋu kutja Abraham oiho mukururume; orondu ami me mu raere kutja Ndjambi u nomasa okutjitira Abraham ovanatje pomawe nga! 9 Ekuva ra tuwa pomize vyomiti; nomuti auhe mbu hi nokutwa ko ovihape oviwa mau kewa nau yumbwa momuriro.”

10 Nu ovimbumba vye mu pura avi tja: “Neṱe ngatu tjite vi?”

11 Eye wa zira a tja: “Ngamwa auhe ngu nozombanda mbari nga yandje imwe ku ingwi ngu hi nombanda, nu ingwi ngu novikurya nga tjite omuhingo tjingewo.”

12 Nu ovasutise tjiva votjisuta tjouhona ve ya okupapitisiwa nave mu pura nai: “Muhonge, eṱe ngatu tjite vi?”

13 Eye we ve zira a tja: “Amu sutisa ovandu otjimariva otjingi kombanda yaihi tji mwa raerwa!”

14 Ovarwe tjiva wovita wina ve mu pura ave tja: “Nu eṱe ngatu tjite vi?”

Eye wa tja ku wo: “Amu kambura ovimariva vyovandu komasa, nu amu kuminine omundu, nungwari kareye nohange nondjambi yeṋu.”

15 Ovandu va ri nomaundjiro omanene, nopu ve ripurira momitima vyawo kutja ngahino Johanes onguri Omutwirisiwa. 16 Johanes opa tjera nai ku wo avehe: “Ami me mu papitisa nomeva, nungwari ingwi ngu meya, eye omunene pu ami. Ami hi nokuyenena nangarire ingwi okukutura ozongute kozongaku ze. Eye me mu papitisa nOmbepo Ondjapuke nomuriro. 17 Eye u notjisise meke okukombozora na tjo oruveze romasisiro we, nu ma wongere ovikokotwa motjipwikiro tje, nungwari imbi oviyaya eye me vi nyosa nomuriro mbu ha zemi.”

18 Johanes wa hungirire omaronga omengi pekepeke kotjiwaṋa nu e tji zuvarisire Ombuze Ombwa. 19 Nungwari Johanes wa tena Herodes, ongooneya yOrukondwa, nomasa tjinene, eye tjinga a kupa Herodias, omukazendu womuangu we, nu noho wa tjita oviṋa vyarwe ovingi ovivi. 20 Nu kombanda yaavihe Herodes wa tjita otjiṋa otjivi tjinene indu tja patera Johanes motjovakamburwa.

Ombapitisimo ya Jesus

(Mt 3:13-17Mk 1:9-11)

21 Ovandu avehe tji va za nokupapitisiwa, Jesus wina wa papitisiwa. Nu eye ngunda ama kumbu, eyuru arire tji ra paturuka, 22 nOmbepo Ondjapuke ai raukire kombanda ye mombunikiro yonguti. Neraka nda za meyuru ra tja: “Oove Omuna wandje omusuverwa. Ami mbi nonyuṋe move.”

Ooihe mukururume va Jesus

(Mt 1:1-17)

23 Jesus tja uta oviungura vye tjandje u nozombura omirongo vitatu, neye aa varwa otja omuzandu wa Josef. Josef wa ri omuzandu wa Eli, 24 ngwa ri owa Matat, ngwa ri owa Levi, ngwa ri owa Melki, ngwa ri owa Janai, ngwa ri owa Josef, 25 ngwa ri owa Matatias, ngwa ri owa Amos, ngwa ri owa Nahum, ngwa ri owa Esli, ngwa ri owa Nakai, 26 ngwa ri owa Mahat, ngwa ri owa Matatias, ngwa ri owa Semeina, ngwa ri owa Josek, ngwa ri owa Joda, 27 ngwa ri owa Johanan, ngwa ri owa Resa, ngwa ri owa Serubabel, ngwa ri owa Sealtiel, ngwa ri owa Neri, 28 ngwa ri owa Melki, ngwa ri owa Adi, ngwa ri owa Kosam, ngwa ri owa Elmadam, ngwa ri owa Er, 29 ngwa ri owa Josua, ngwa ri owa Elieser, ngwa ri owa Jorim, ngwa ri owa Matat, ngwa ri owa Levi, 30 ngwa ri owa Simeon, ngwa ri owa Juda, ngwa ri owa Josef, ngwa ri owa Jonam, ngwa ri owa Eljakim, 31 ngwa ri owa Melea, ngwa ri owa Mena, ngwa ri owa Matata, ngwa ri owa Natan, ngwa ri owa David, 32 ngwa ri owa Isai, ngwa ri owa Obed, ngwa ri owa Boas, ngwa ri owa Sala, ngwa ri owa Nakson, 33 ngwa ri owa Aminadab, ngwa ri owa Admin, ngwa ri owa Arni, ngwa ri owa Hesron, ngwa ri owa Peres, ngwa ri owa Juda, 34 ngwa ri owa Jakob, ngwa ri owa Isak, ngwa ri owa Abraham, ngwa ri owa Tera, ngwa ri owa Nahor, 35 ngwa ri owa Seruk, ngwa ri owa Rehu, ngwa ri owa Pelek, ngwa ri owa Heber, ngwa ri owa Sala, 36 ngwa ri owa Kenan, ngwa ri owa Arpagsad, ngwa ri owa Sem, ngwa ri owa Noa, ngwa ri owa Lamek, 37 ngwa ri owa Metusalak, ngwa ri owa Enok, ngwa ri owa Jered, ngwa ri owa Mahalalel, ngwa ri owa Kenan, 38 ngwa ri owa Enos, ngwa ri owa Set, ngwa ri owa Adam, ngwa ri owa Ndjambi.