Markus 1 - Herero Revision Bible (HRR)

Omazuvarisiro wa Johanes Omupapitise

1 Indji Ombuze Ombwa ohunga na Jesus Kristus, Omuna wa Ndjambi. Oyo ya uta nai: 2 Otja tji pa tjangwa membo romuprofete Jesaja:

“Ndjambi wa tja:

‘Tara, ami me hindi omuhindwa wandje

komurungu woye me kekuṱunine ondjira.’

3 Eraka romuravaere mokuti onguza mari tja:

‘Ṱunineye Muhona ondjira,

mu sembamisireye omirari vye!’”

4 Johanes wa ri mokuti onguza, ama zuvarisa ombapitisimo yondanaukiro kondjesiro yourunde. 5 Ovandu ovengi mba zire korukondwa rwehi ra Judea novature va Jerusalem va ya okuka puratena. Owo ve rihepura ourunde wawo, neye e ve papitisire monḓonḓu Jordan.

6 Johanes wa zarere ombanda ndja ungurirwe pomainya wongamero, nu wa kutire ekwamo romukova pehuri, eye aa ri ozombahu nouitji wokuti. 7 Neye wa zuvarisa kovandu na tja: “Ingwi ngu meya kombunda yandje eye omunene pu ami. Ami hi nokuyenena nangarire ingwi okurikota nokukutura ozongute kozongaku ze. 8 Ami mbi mu papitisa nomeva, nungwari eye me mu papitisa nOmbepo Ondjapuke.”

Ombapitisimo ya Jesus nokurorwa kwe

(Mt 3:13—4:11Lk 3:21-22Lk 4:1-13)

9 Moruveze tjingero ndo Jesus weya okuza kOnasaret, morukondwa rwehi rwa Galilea, neye wa papitisiwa i Johanes mOjordan. 10 Nu tjimanga Jesus tja pita momeva, wa muna eyuru ara paturuka, nu Ombepo Ondjapuke ye ya kombanda ye mombunikiro yonguti. 11 Wina pa zuvaka eraka nda za meyuru nari tja: “Ove oove Omuna wandje omusuverwa. Ami mu mbi nonyuṋe.”

12 Tjazumba Ombepo ye mu twara mokuti onguza, 13 ka kara oure womayuva omirongo vine, ama rorwa i Satan. Eye wa ri ngo puna ovipuka vyokuti, novaengeri ve ya nave mu karere.

Jesus ma isana ovapate vane wozohi

(Mt 4:12-22Lk 4:14-15Lk 5:1-11)

14 Johanes tja za nokupaterwa motjovakamburwa, Jesus wa ya kOgalilea na kazuvarisa Ombuze Ombwa ya Ndjambi, 15 na tja: “Omayuva ya yenene, nouhona wa Ndjambi weya; ritanaureye nu mu kambure mOmbuze Ombwa!”

16 Jesus ngunda ama ka wondja meṋe yomukuro wOmuronga wa Galilea, wa muna ovapate vevari wozohi, ooSimon nomuangu we Andreas, amave kambura ozohi momuronga. 17 Jesus wa tjere ku wo: “Ndji kongorereye, nami me mu tjiti kutja mu rire ovapate wovandu.” 18 Nowo va isa ozombate zawo tjimanga nu ave mu kongorere.

19 Nu Jesus wa ryama komurungu kaṱiṱi narire tja munu Jakobus nomuangu we Johanes, ovazandu va Sebedeus. Owo va ri mokayaha amave ṱunu ozombate zawo. 20 Nu Jesus tje ve muna, we ve isana; nowo va isa ihe Sebedeus mokayaha puna ovaungure nave i puna Jesus.

Omundu ngwa ri nombepo ohakohoke

(Lk 4:31-37)

21 Jesus novahongewa ve ve ere motjirongo Kapernaum, nu esabata tji re ya otja hita mosinagoge na utu okuhonga ovandu. 22 Ovandu va himisirwe i omahongero we, orondu eye kaa hongo otja ozonongo zomambo, nungwari aa hongo otja umwe ngu nouvara.

23 Moruveze tjingero ndo mosinagoge otji mwa hita omundu ngwa ri nombepo ohakohoke; neye wa ravaera 24 a tja: “Ove u na tjike na eṱe, Jesus wa Nasaret? Ove weya okutuyandeka are? Ami mbi ku i kutja oovyaṋi; oove omuhindwa omuyapuke wa Ndjambi!”

25 Nungwari Jesus wa rakiza indji ombepo a tja: “Mwina! Nu pita mu ye!”

26 Ombepo ohakohoke otji ye mu zunga nomasa, ai uru neraka enene nai piti mu ye. 27 Ovandu avehe va himwa tjinene nga tji va uta okupurasana nai: “Ihi otjikwatjike? Hapo inga omahongero omape? Omurumendu ngwi u nouvara okurakiza ozombepo ozohakohoke, nozo ze nonḓuviro ku ye!”

28 Ombuze ohunga na Jesus arire tji ya handjauka tjimanga morukondwa aruhe rwa Galilea.

Jesus ma verukisa ovandu ovengi

(Mt 8:14-17Lk 4:38-41)

29 Jesus wa pita mosinagoge nai osemba kondjuwo ya Simon na Andreas, puna Jakobus na Johanes. 30 Ina yomukazendu wa Simon wa ri momara e notjindjumba, nu Jesus tje ya mbo arire tji ve mu hepurire omukazendu ngwi. 31 Jesus weya ku ye, ne mu kambura keke, e mu sekamisa. Otjindjumba atji piti mu ye, neye arire tje ve ṱunine omariro.

32 Ngurova, ovandu va eta ovavere avehe na imba mba ri nozombepo ozohakohoke ku Jesus. 33 Ovature avehe votjirongo va woronganena pomuvero wondjuwo. 34 Nu Jesus wa verukisa ovengi mba ri nomitjise pekepeke na pitisa ozombepo ozengi ozohakohoke. Eye ke ze pere kutja ze hungire, orondu ozo aaze mu tjiwa kutja eye ouṋe.

Jesus ma zuvarisa mOgalilea

(Lk 4:42-44)

35 Nu omuhuka omunene, ngunda ape hiya tja, Jesus wa penduka, a piti mondjuwo, a i pendje yotjirongo poṋa pa kakara erike okukakumba. 36 Simon na imba mba ri puna ye va paha Jesus, 37 nu tji ve mu muna, va tja ku ye: “Ovandu avehe mave ku paha.”

38 Nungwari Jesus wa zira a tja: “Ngatu yende kovirongo vyarwe vyopopezu kutja mbi kazuvarise koṋa ngo wina, orondu ootjiṋa tji mbe era.”

39 Jesus otja ryanga mehi arihe ra Galilea ama zuvarisa mozosinagoge nama pitisa ozombepo ozohakohoke movandu.

Jesus ma verukisa omurumendu ngwa ri nomutjise wongana

(Mt 8:1-4Lk 5:12-16)

40 Omurumendu ngwa ri nomutjise wongana weya ku Jesus, a wora ozongoro ame riyarikaṋa ku ye na tja: “Tji movanga, ove mo sora okundjiverukisa.”

41 Jesus we mu ṱira ondjenda, a roporora okuoko kwe na ṱunu ku ye a tja: “Ami me vanga, veruka!” 42 Tjimanga omutjise wongana arire tji wa piti momurumendu ngwi, neye a veruka. 43 Nu Jesus wa hungira oukukutu ku ye, nu emwesa kutja a yende tjimanga, 44 atja: “Puratena! Ngoo raere omundu otjiṋa hi. Nungwari twende osemba komupristeri u keriraise ku ye; tjazumba u kapunguhire omakohororero woye ombunguhiro Moses ndja rakizire.”

45 Omurumendu ngwi wa ya, a kazuvarisa nokuhandjaura otjiṋa hi koṋa akuhe. Jesus ope ha sorere okuhita motjihuro ama munika, neye wa kakara poruveze rwa peke kourike, nu ovandu ve ya ku ye okuza komikuma avihe.