Lukas 2 - Herero Revision Bible (HRR)

Ongwatero ya Jesus

1 Momayuva ngo ombara yokombanda Augustus wa rakizire kutja ovandu avehe mehi arihe rouhonapare wa Roma ve tjangwe. 2 Nomatjangero nga omatenga tji ya utwa tjandje Sirenius onguri ongooneya yehi ra Sirie. 3 Nu avehe va ya okukeritjangisa, auhe kotjihuro tje.

4 Josef wina wa zire motjihuro Nasaret mehi ra Galilea, a i kehi ra Judea kObetlehem, ihi otjihuro tja David, tjinga a zire momuhoko wa David. 5 Eye we keritjangisa puna Maria, omukazendu we omuvarekwa, nu ngwa ri otjingundi. 6 Nowo ngunda averi mObetlehem, omayuva we wombandukiro arire tji ya yenene. 7 Neye wa panduka omuatje omuzandu otjiveri, e mu manga momarapi nu e mu rareke metemba rozonyanda, owo tjinga ave ha ri noruveze mondjuwo yovayenda.

Ovarise novaengeri

8 Nu morukondwa rwehi ndo mwa ri ovarise mokuti, mbaa ve risa ozonḓu zawo ouṱuku. 9 Tjimanga omuengeri wa Muhona wa kuramene pu wo, ouyere wa Muhona we ve kondoroka nondjerera, nowo arire tji va tira nokutira okunene tjinene. 10 Nungwari ingwi omuengeri wa Muhona wa tja nai ku wo: “Amu tira ko! Purateneye, ami mbe mu etere ombuze ombwa ndji mai rire enyando enene kotjiwaṋa atjihe. 11 Ndinondi motjihuro tja David eṋe mwa kwaterwa Omuyame, eye ngu ri Kristus, Muhona! 12 Nu otjizemburukiro ku mamu mu tjivirwa, otjo hi: Mamu kamuna okanatje ku ka mangwa momarapi, nu ku ka rarekwa metemba rozonyanda.”

13 Tjimanga pomuengeri ngwi pa munika otjimbumba otjinene tjovaengeri veyuru tjaa tji tanga Ndjambi ama tji tja:

14 “Ondjozikiro ku Ndjambi mokombandambanda meyuru,

nohange kombanda yehi kovandu eye me nonyuṋe!”

15 Novaengeri tji va zapo pu wo nu ave yaruka keyuru, ovarise otji va raerasana ave tja: “Indjeye tu yende kObetlehem tu kamune otjiṋa hi tji tja tjitwa, nu tji twa raerwa i Muhona.”

16 Nowo otji va ya amave hakahana nave kamuna Maria na Josef nokanatje ku ka rarekwa metemba rozonyanda. 17 Ovarise tji va muna inga okanatje, arire tji ve ve raere imbi omuengeri mbya hungire ohunga nokanatje nga. 18 Avehe mba zuvire omambo nga va himisirwe i oviṋa mbi va raererwe i ovarise. 19 Maria wa ṱakamisa omambo nga aehe ne ripura na wo momutima we. 20 Novarise va yaruka amave tanga nokuhivirika Ndjambi mena roviṋa avihe mbi va zuva na mbi va muna otja punga ava serekarererwa i yomuengeri.

Jesus ma rukwa ena

21 Omayuva hambondatu womasukarekero tjiya yenena, omuatje wa sukarekwa na rukwa ena Jesus, indi ena omuengeri nde mu rukire ngunda ina e hiya rira otjingundi.

Jesus ma raisiwa mondjuwo ya Muhona

22 Nomayuva womakohororero otja komuhingo wOmatwako wa Moses tji ye ya komaandero, Josef na Maria arire tji va twara omuatje kOjerusalem okukemuraisa ku Muhona, 23 otja tji pa tjangwa nai mOmatwako wa Muhona: “Otjirume atjihe tji tja tenge okukwatwa ngatji yapurirwe Muhona.” 24 Owo wina va kapunguha ovingutyona vivari poo ozohanda mbari otja tji pa heewa mOmatwako wa Muhona.

25 Nu momayuva ngo mwa ri omurumendu wena Simeon, ngwa turire mOjerusalem. Eye wa ri omurumendu omusemba nomupyuke mokuṱiza omatwako wa Ndjambi, nu ngu ya undju Israel kutja tji yamwe. NOmbepo Ondjapuke ya ri mu ye, 26 notji ye mu tjivisa kutja eye kamaa ṱu nga tja munu Omutwirisiwa wa Muhona. 27 Simeon wa twarewa i Ombepo kondjuwo ya Muhona. Novanene vokanatje Jesus tji ve ke eta kondjuwo ya Muhona kutja ve ke yenenisire imbi mbya tjangwa mOmatwako, 28 Simeon otja pukata inga okanatje nu a tanga Ndjambi a tja:

29 “Muhona, ove nambano wa yenenisa omakwizikiro woye,

isa omukarere woye a yende mohange,

30 omeho wandje tjinga aya munu ondjamo yoye,

31 indji ndji wa ṱunina momurungu woviwaṋa avihe:

32 Ondjerera yomavandururiro ku imba mbe he ri Ovajuda,

nu ndji mai eta ondjozikiro kotjiwaṋa tjoye Israel.”

33 Nu ina na ihe yomuatje va himisirwe i omambo Simeon nga hungirira ye. 34 Simeon we ve sera ondaya na tja ku Maria, ina yomuatje: “Tara, omuatje ngwi wa toororwa i Ndjambi a rire omawiro nomayeuriro wovengi mOisrael, nu a rire otjiraisiro tji matji pirukirwa, 35 kokutja omeripuriro wawo womongumumu ye horoke. Nomutima woye mau tuvakaṋewa i engaruvyo.”

36 Wina pa ri omukazendu omuprofete ngwa kurupire tjinene wena Ana, omusuko wa Fanuel, womuhoko wa Aser. Eye tjandje nao tja ri omutanda wa kupirwe oure wozombura hambombari uriri omurumendu a koka. 37 Eye wa kara omuhepundu nga tja tjita ozombura omirongo hambondatu na ine. Eye aa karere Ndjambi omutenya nouṱuku ame ritjaere kovikurya nu ama kumbu mondjuwo ya Muhona. 38 Ana wina we ere moiri tjingeyo ndjo, a hivirike Ndjambi na serekarere ohunga na ingwi omuatje ku imba avehe mbaa ve undju onguturiro ya Jerusalem.

Okuyaruka kOnasaret

39 Josef na Maria tji va za nokumana oviṋa avihe otja tji pa heewa i Omatwako wa Muhona, va yaruka kotjihuro tjawo Nasaret kehi ra Galilea. 40 Ingwi omuatje we kura, na hara omasa, tjandje we ura nounongo, nondjingonekero ya Ndjambi ai ri puna ye.

Omuzandu Jesus mondjuwo ya Muhona

41 Ombura aihe ovanene va Jesus aave i kOjerusalem komukandi wOpaska. 42 Jesus tja ri nozombura omurongo na mbari, owo wina ve ere komukandi wOpaska otja tjinga iyape tjitwa aruhe. 43 Nu indi eyuva romukandi tji ra kapita, ovanene va Jesus otji ve rirongera okuyaruka konganda, nungwari ingwi omuatje Jesus wa sewa kombunda mOjerusalem, ovanene ve ave hi nokutjiwa. 44 Owo va tjongovasi eye u ri mokati kombunga, notji va ka wondja oure weyuva arihe; tjazumba ave utu okumupaha mokati kovazamumwe novatjiwasane. 45 Nu tji ve he mu mwine, arire tji va yaruka kOjerusalem amave mu paha. 46 Kombunda yomayuva yetatu owo ve mu vaza mondjuwo ya Muhona a haama puna ovahonge vOvajuda nu ama puratene ku wo nokuvepura omapuriro. 47 Avehe mbe mu zuvire va himisirwe i ozondunge ze nomaziriro we. 48 Ovanene ve tji ve mu muna, arire tji va kumwa. Nu ina wa tja ku ye: “Muatje wandje, okutjavi tji we tu tjiti nao? Tara, iho na ami twe ku paha tjinene ama turikende.”

49 Eye wa zira a tja: “Eṋe ongwaye tji ma muso ku ndji paha? Kamu nokutjiwa kutja ami mbi sokukara mondjuwo ya Tate are?” 50 Nungwari owo kave zuvire nawa inga omaziriro womambo we.

51 Jesus otja yaruka puna wo kOnasaret nu a kakara nonḓuviro ku wo. Ina wa ṱakamisa oviṋa avihe mbi momutima we. 52 Nu Jesus we kura mozondunge na momuseka, Ndjambi novandu ave nonyuṋe mu ye.