Omayapuriro womaveri
1 Muhona wa hungira ku Moses a tja: 2 “Ndji yapurira ngamwa otjiveri atjihe. Atjihe tji tja tenga okukwatwa motjiina mokati kOvaisrael, indu kutja otjovandu poo otjovinamuinyo, ovyo ovyandje.”
Omukandi wOzomboroto nḓe hi nosurise
3 Rukwao Moses wa tja kotjiwaṋa: “Rizemburukeye neyuva ndi eṋe mu mwa pitire mOengipte mouhuura, orondu Muhona we mu pitisire nomasa we. Amu ri omboroto, ndji nosurise. 4 Ndinondi, momueze omutenga Abib, otji mamu tjindi. 5 Nu Muhona tje ku vasisa mehi rOvakanaan norOvahetite norOvaamori norOvahevi norOvajebusi, ehi nda yandja kooiho mukururume noruyano, nu nde ura nomaihi nouitji wokuti, ove tjita omukandi mbwi momueze mbunombwi. 6 Oure womayuva hambombari ryee ozombororoto nḓe hi nosurise, nu eyuva oritjahambombari ngari rire eyuva romukandi wondjozikiro ku Muhona. 7 Ozomboroto nḓe hi nosurise ngaze riwe momayuva hambombari; ape munika omboroto ndji nosurise poo osurise oini, pove na mehi roye arihe. 8 Neyuva romukandi tji reya, seturura kovazandu woye kutja ove mo tjiti otjiṋa hi motjimbe tjaimbi Muhona mbya tjita tji wa tjindire mOengipte. 9 Nu oukarere mbwi ouyapuke ngau kare kove otja otjisanekero keke roye notjizemburukiro kotjipara tjoye kutja inga Omatwako wa Muhona ye kare motjinyo tjoye. Orondu Muhona we ku pitisa neke enamasa mehi ra Engipte. 10 Nove ṱakamisa omazikamisiro womukandi nga moruveze ndwa tuwa po, ombura aihe.
Omaveri
11 “Nu Muhona tje ku vasisa mehi rOvakanaan otja tje ku yanena nooiho mukururume, ne ri yandja kove, 12 nu omaveri aehe yandja ku Muhona; wina otjiveri otjirume atjihe tjovinamuinyo otja Muhona. 13 Nungwari otjiveri atjihe tjokasino mo tji randurura nombunguhiro yondjona moruveze rwako. Nu tji u hi nokutjirandurura, teya engoti ratjo. Nungwari inga omaveri aehe wovanatje voye ovazandu ye randurura. 14 Nu kombunda omuzandu woye tji me ku pura kutja ihi matji hee tjike, ove mu zira nai: ‘Muhona we tu pitisa mOengipte mouhuura, neke enamasa. 15 Orondu Farao tja panḓa okututjindisa, Muhona otja zepa inga omaveri aehe mehi ra Engipte, okutja owovandu nowovinamuinvo. Opu me zu okupunguhira Muhona otjiveri atjihe otjirume. Nungwari omaveri aehe movazandu vandje me ye randurura. 16 Nomuano mbwi ngau kare otja otjisanekero keke roye notjizemburukiro kotjipara tjoye. Orondu Muhona we tu pitisa neke enamasa mOengipte.’ ”
Ouyenda kOmuronga wOtuu
17 Nu Ombara ya Engipte tja yandjera ovandu okutja ve yende, Ndjambi ke ve yandjerere okukayenda mondjira ndji yenda kehi rOvafilisti, nangarire kutja ondjira ndji ondja ri okasupi. Orondu Ndjambi tje ripura kutja ovandu tji mave munu ovita, ngahino mave mumapara momeripuriro wawo nave yaruka kOengipte. 18 Ndjambi opa tumburira otjiwaṋa okuhungama okuti onguza, kuṱa kOmuronga wOtuu. NOvaisrael ve ripangaṋa nawa novirwise okuza kehi ra Engipte.
19 Nu Moses wa twaerera omaṱupa wa Josef. Orondu Josef tjinga a yanisa Ovaisrael okutjita nai, indu tja tja ku wo: “Tjinangara Ndjambi me mu vatere tjiri, twaerereye omaṱupa wandje okuisa muno.”
20 Nowo otji va womboroka mOsukot nave katunga ozondanda mOetam, komukuro wokuti onguza. 21 Nu Muhona we ve hongorera notjikamba tjaa tji zorere mutenya, nouṱuku we ve hongorera notjikamba tjomuriro okuyerisa komurungu wawo kutja ve sore okukayenda omutenya nouṱuku. 22 Otjikamba tjaa tji zorere mutenya, notjikamba tjaa tji yaka omuriro uṱuku kavina pu vya zapo potjiwaṋa.
© Herero Revision Bible © Bible Society in Namibia, 2021.
