Levitikus 12 - Herero Revision Bible (HRR)

Omatwako womakohorero wovakazendu kombunda yombandukiro

1 Muhona wa yandja omazikamisiro nga ku Moses na tja ku ye: 2 “Otjiwaṋa tjOvaisrael tji raera nai: ‘Omukazendu ngwa panduka omuatje omuzandu, omuhakohoke oure womayuva hambombari tjimuna momayuva we nga woukazendu. 3 Meyuva oritjahambondatu okanatje make sukarekwa. 4 Tjazumba nga kare oure womayuva omirongo vitatu na yetatu mondjuwo youari. Eye ngaa ṱunu kotjiṋa ngamwa otjiyapuke, nu ngaa hiti moruveze romerikotameneno, nga omayuva we womakohororero tji ya kapita.

5 “ ‘Nungwari tja panduka omukazona ma rire omuhakohoke oure womayuva omurongo na yane tjimuna momayuva we nga woukazendu. Nu nga kare oure womayuva omirongo hamboumwe na hamboumwe mondjuwo yomakohororero.

6 “ ‘Nomayuva we womakohororero tji ya kapita, tja zu nokupanduka omuzandu poo omukazona, nga ete ondjona yombura imwe komupristeri pomahitiro wOndanda yOmahakaeneno i rire ombunguhiro oningiririsiwa, notjingutyona poo ohanda i rire ombunguhiro yokuisapo ourunde. 7 Nomupristeri nge vi punguhire Muhona e mu tjitire ombunguhiro yomakohororero; nungwari otji ma rire omukohoke otja komazikamisiro nga tuwa po. Indi ondi ri etwako komukazendu omupanduke tja zu nokupanduka.

8 “ ‘Nungwari tje hi nokuyenena okueta ondjona, nga ete ovingutyona vivari poo ozohanda mbari, imwe i rire ombunguhiro oningiririsiwa, nongwao i rire ombunguhiro yokuisapo ourunde. Nomupristeri otji me mu tjitire ombunguhiro yomakohororero; neye otji ma rire omukohoke.’ ”