Ndjambi wa rakiza Josua okuhuura Kanaan
1 Kombunda yonḓiro ya Moses, omukarere wa Muhona, Ndjambi wa tja nai ku Josua, omuzandu wa Nun, nu ngwa ri omuvatere wa Moses: 2 “Omukarere wandje Moses wa koka. Ove nOvaisrael nambano rirongereye mu konde onḓonḓu Jordan nu mu yende kehi, ndi meve pe. 3 Otja punga amba raera ku Moses ami mba yandja indi ehi arihe mu mamu ryanga ku eṋe, otjiwaṋa tjandje. 4 Omiruko vyehi reṋu mavi tandavara okuza kokuti onguza komukuma wokeyuva kokumuho nga kozondundu za Libanon keyuva kokunene, nokuza konḓonḓu onene Eufrat, ndji ri komuhuka, nehi arihe rOvahetite nga kOmuronga Mediterania kongurova. 5 Josua, kape na umwe ngu ma yenene okukuhavera, ngunda au nomuinyo. Ami me kara puna ove otja tji mba kara puna Moses. Aruhe me kara puna ove, nu himee ku esa ko. 6 Yanḓipara nu rira ependa! Orondu mo hongorere otjiwaṋa hi kutja tjikakambure ehi ndi ndi mba kwizikira ooihe mukururume kutja meve pe. 7 Yanḓipara nu rira ependa uriri! Tjita ouatjiri kutja u yenenise omatwako aehe omukarere wandje Moses nge ku pa. O yepe na wo, nove mo ṋingapara akuhe ku mo i. 8 Ngoo zembi Embo ndi rOmatwako. Rihonga ro omutenya nouṱuku, nu u yenenise nouṱakame avihe mbya tjangwa mu ro, mo rire omuindandu, nu mo ṋingapara. 9 Rizemburuka nomarakiza wandje ngu maye tja: ‘Yanḓipara nu rira ependa!’ O tira, nu o mumapara, orondu ami, ngu mbi ri Muhona, Ndjambi woye, mbi ri puna ove ngamwa akuhe ku mo i.”
Josua ma rakiza otjiwaṋa
10 Josua wa rakiza ovanane votjiwaṋa 11 kutja ve ryange mozondanda nu ve raere otjiwaṋa nai: “Ṱuneye ozonguta zeṋu, orondu kombunda yomayuva yetatu mamu kondo onḓonḓu Jordan, mu kakambure ehi Muhona, Ndjambi weṋu, ndi me mu pe ri rire ouini weṋu.”
12 Josua wa tja nai komuhoko wa Ruben nowa Gad, na korumbembera romuhoko wa Manasse: 13 “Rizemburukeye na imbi Moses, omukarere wa Muhona, mbye mu raera, indu tja tja: ‘Muhona, Ndjambi weṋu, me mu pe ehi ndi ri komuhuka wa Jordan ri rire omaturiro weṋu.’ 14 Ovakazendu novanatje veṋu novinamuinyo vyeṋu mavi kara mba mehi Moses nde mu pa, komukuma wokomuhuka wa Jordan; nungwari imba ovarwe wovita mokati keṋu ngave konde hembandina ve kahongorere ovakweṋu nokuvevatera motjirwa. 15 Nowo wina tji va kambura ehi Muhona, Ndjambi weṋu, nde ve pa ri rire ouini wawo, mamu kotoka namu tura mehi omukarere wa Muhona, Moses nde mu pa, imba komukuma wokomuhuka wa Jordan.”
16 Nowo va zira ku Josua ave tja: “Eṱe matu tjiti avihe, mbi we tu raere, nu matu i akuhe ku mo tu hindi. 17 Matu kara nonḓuviro kove otja tji twa kara nonḓuviro aruhe ku Moses; Muhona, Ndjambi woye nga kare puna ove otja tjinga a kara puna Moses. 18 Ngamwa auhe ngu me ku sekamene nu ngu hi nokukara nonḓuviro komaraerero woye ngamwa aehe, ma ṱu. Yanḓipara nu rira ependa!”
© Herero Revision Bible © Bible Society in Namibia, 2021.
