Josua ma rire omupingene wa Moses
(Num 27:12-23)1 Moses wa hungira kOvaisrael komurungu 2 a tja: “Ami nambano mbi nozombura esere nomirongo vivari nu hi tji nokuyenena okukara omuhongore weṋu. Nu posi yanao, Muhona wa tja nai ku ami: ‘Ove ko nakukonda onḓonḓu Jordan.’ 3 Muhona, Ndjambi woye, ongu me i kondo komurungu woye; eye ma nyono oviwaṋa mbi komurungu woye, nove mo vi ramba okuviisa mo mouini wavyo; nu Josua ongu ma rire omunane woye otja Muhona pa heya. 4 Nu Muhona me vi nyono otja tja nyonene Sihon na Og, ozombara zOvaamori, na yandeke ehi rawo. 5 Muhona me vi yandja mouvara weṋu, nu eṋe tjiteye ku vyo nawanawa otja tji mbe mu rakiza. 6 Kareye nomasa nouvanḓe; amu vi tira, nu amu mumapara! Orondu Muhona, Ndjambi weṋu, omuini ma kayenda puna eṋe, eye me ku tjevere, nu ke nakukuesa ko.”
7 Moses wa isana Josua na tja nai ku ye momurungu wOvaisrael avehe: “Kara nomasa nouvanḓe; oove ngu mo hongorere otjiwaṋa hi kehi Muhona nda kwizikira ooihe mukururume noruyano okuvepa; noove ngu mo keverumatisa ro. 8 Muhona omuini ongu me ku hongorere; eye ma kara puna ove; eye me ku tjevere, nu ke nakukuesa ko; o tira nu o mumapara.”
Etwako, ndi mari resewa kombunda yombura oitjahambombari aihe
9 Nu Moses wa tjanga etwako ndi, ne ri yandja kovapristeri, imba ovazandu va Levi, mbaa ve tjindi Otjipwikiro tjOmerikutiropamwe wa Muhona, na kovanane avehe vOvaisrael. 10 Neye we ve rakiza a tja: “Aruhe kombunda yozombura hambombari, ombura yongutukiro tji ye ya, resa etwako indi pOmukandi wOviranda vyOmaso. 11 Ri resera Ovaisrael avehe tji mave ya okurikotamena komurungu wa Muhona, Ndjambi woye, poṋa Muhona pu me ritoororere. 12 Woronganisa ovarumendu novakazendu novanatje avehe, na wina ovozonganda mbe tura movirongo vyoye, auhe nga zuve etwako ndi ne rihonge okutira Muhona, Ndjambi weṋu, nokuṱakamisa nawa inga omambo we aehe. 13 Komuhingo mbwi imba ovanatje vawo mbe hi na va zuvire indi etwako ra Muhona, Ndjambi woye, mave ri zuu. Nowo otji mave rihongo okumutira ngunda amu nomuinyo mehi, ndi mamu kakambura ri rire ouini weṋu munda mbwina na Jordan.”
Omazikiro wa Josua motjiungura tje
14 Muhona wa tja ku Moses: “Tara, omayuva woye wokukoka ye ri popezu. Kaisane Josua, nu kakurameye mOndanda yOmahakaeneno kutja ami mbi mu zike motjiungura tje.” Moses na Josua otji va kakurama mOndanda yOmahakaeneno. 15 Nu Muhona we rimunikisa ku wo mOndanda motjikamba otjinene; notjikamba hi tja kurama pomuvero wOndanda.
16 Muhona wa tja ku Moses: “Tara, ove u ri pokukoka, nu kombunda yonḓiro yoye otjiwaṋa hi matji kara nokuhinangamburiro mu ami, natji karere oomukuru vovisenginina vehi, ndi tji ri pokukakambura. 17 Nu meyuva ndo omazenge wandje maye ya kombanda yawo; nu ami meve esa ne horeke omurungu wandje ku wo, kokutja ve yandekwe. Noviwonga ovingi nomauzeu mavi ya kombanda yawo. Nu meyuva ndo mave tja nai: ‘Oviwonga mbi kavi ere kombanda yetu mena rokutja Ndjambi ke tji ri mokati ketu are?’ 18 Nungwari meyuva ndo ami me horeke omurungu wandje ku wo oparukaze mena romauvi aehe ngu va tjita, owo tjinga ava yepera koomukuru varwe.
19 “Ritjangereye eimburiro ndi, nu hongeye ro kOvaisrael, nu ngave imbure ro kutja ri ndji hongononene po ondjo yOvaisrael! 20 Ami meve hitisa mehi nde ura nomaihi nouitji wokuti otja tji mba kwizikira ooihe mukururume noruyano. Nawo mave ri nave kuta nave nu; tjazumba otji mave yepere koomukuru varwe nave ve karere, nowo mave ndji nyengura nave teya omerikutiropamwe wandje. 21 Oviwonga ovingi nomauzeu mavi ya kombanda yawo. Tjazumba eimburiro ndi mari ndji hongononene po ondjo yawo, orondu oro tjinga amari imburwa i ozondekurona zawo. Nangarire ngunda ambi hiye ve hitisa mehi, ndi mbe ve kwizikira noruyano, tjandje mba tjiwa omeripuriro wawo wandinondi.”
22 Nu meyuva tjingero ndo Moses wa tjanga eimburiro ndi ne ri hongo kOvaisrael.
23 Nu Muhona wa rakiza nai ku Josua, omuzandu wa Nun: “Kara nomasa nouvanḓe! Ove tjinga amo hitisa Ovaisrael mehi, ndi mbe ve kwizikira noruyano; nu ami me kara puna ove.”
24 Nu Moses tja za nokumana okutjanga omambo wetwako ndi membo, 25 otja rakiza kOvalevi mbaa ve tjindi Otjipwikiro tjOmerikutiropamwe wa Muhona, a tja: 26 “Tooreye embo ndi romatwako, nu ri tweye meṋe yOtjipwikiro tjOmerikutiropamwe wa Muhona, Ndjambi weṋu, kutja ri kare mbo otja ehongonone rondjo yotjiwaṋa tje. 27 Orondu ami tjinga ame tjiwa omapirukiro nourangaranga watjo. Ami ngunda ambi nomuinyo mokati keṋu, tjandje mu pirukira Muhona, nu mape kara vi komurungu kombunda yonḓiro yandje! 28 Woronganisireye ovanane avehe vomihoko vyeṋu novatjevere komurungu wandje kutja mbi ve raere omambo nga aehe; nu ami me isana eyuru nehi vi rire ovihongonone vyondjo yawo. 29 Ami me tjiwa kutja kombunda yonḓiro yandje otjiwaṋa ma tji rire otjivi nu ma tji humbu omarakiza wandje. Nu momayuva wokombunda eṋe mamu hakaene noviwonga, tjinga amwa pindikisa Muhona mokutjita imbi eye mbya tjaera.”
30 Tjazumba Moses otja tangununa omambo weimburiro arihe ngunda Ovaisrael amave puratene:
© Herero Revision Bible © Bible Society in Namibia, 2021.
