1 “Nambano, Job, puratena nawa
ku imbi avihe mbi me hungire.
2 Ami mbe rirongerere okuhungira
imbi mbi me ripura.
3 Omambo wandje aehe omasemba,
nowo ouatjiri.
4 Ombepo ya Ndjambi ye ndji uta,
nomasuvaneno wOmunamasaaehe
ye ndji pa omuinyo.
5 “Ndji zira tji mo sora.
Rirongerisa nu twa omambo woye
mongongorasaneno nu u ndji hungame.
6 Tara, eṱe na ove tuvemwe
komurungu wa Ndjambi,
atuyevari twa zezengwa pomunoko.
7 Ove otji u hi nokusokundjitira.
Ami hi nokukuṋiṋikizira pehi.
8 “Nambano ami mbe ku zuu amo tja nai:
9 ‘Owami omukohoke nu hi nondjo;
hi notjipo nu hi nondataiziro ndji mba tjita.
10 Nungwari Ndjambi u paha
omihingo vyokundjirwisa,
nu u ndji vara otja omunavita.
11 Eye we ndji pandeka nouketanga
kozombaze zandje,
neye u tjevera omikambo
avihe mbi me toora.’
12 “Nungwari ami me ku raere,
Job, ove u ri posyo.
Ndjambi omunene pomundu ngamwa auhe.
13 Ongwaye tji mo yandja ondjo ku Ndjambi,
tje hi nokuzira ko omaunaunino womundu.
14 Nandarire kutja Ndjambi ma
hungire povikando ovingi,
kape na ngu ma puratene komambo we.
15 Mouṱuku ovandu tji va rara
ozomboṱu ozonḓeu,
Ndjambi u hungira moturoto
na movirimunikise.
16 Eye u tjita kutja owo ve puratene
ku imbi mbi ma hungire,
nowo ve tirisiwa i omaronga we.
17 Ndjambi u hungira kutja ve
ise okutjita ouvi kwawo,
nokuveyama komeritongamisiro wawo.
18 Eye ke nokuvetarera amave yandekwa,
neye meve yama konḓiro oini.
19 Ndjambi u vyura omundu
mokumuvera nomitjise
nokuurisa orutu rwe nomihihamo.
20 Omuvere ke nokukara nomuhoro wovikurya,
nu nangarire kutja ovikurya oviwa
novitjate mavi mu yaukisa,
21 neye maṱerambu nga omaṱupa we tjiya munika.
22 Neye u ri pokuyenda konḓiro;
omuinyo we mau pundu motjovakoke.
23 “Ngahino omuengeri meya okumuvatera,
umwe wovaengeri omayovi va Ndjambi,
ngu zemburukisa omundu otjiungura tje.
24 Motjari omuengeri ma tja nai:
‘Mu kutura kutja a ha pundu motjovakoke!
Indjo ondji ri ondjambi yokumukutura.’
25 Orutu rwe maru rire orumutanda
norunamasa rukwao;
26 eye tji ma kumbu, Ndjambi me mu zuvire;
eye me rikotamene ku Ndjambi nondjoroka;
Ndjambi ma tjiti kutja oviṋa
vi kare osemba rukwao.
27 Neye ma hungire mokati kovandu a tja:
‘Ami mba tjita ourunde.
Hi tjitire ousemba,
nungwari Ndjambi ke ndji verere,
otja pu mba sokuvererwa ouvi wandje.
28 Eye we ndji ṱakamisa kutja
e ha pundu motjovakoke,
nu ingee ami mbi nomuinyo.’
29 “Ndjambi u tjita avihe mbi povikando ovingi,
30 kutja a yame omuinyo womundu,
nokutja e mu pe ondjerera yomuinyo.
31 “Nambano, Job, puratena ku
imbi mbi me hungire;
mwina nu ndjesa mbi hungire!
32 Nungwari ove tji u notjiṋa okuhungira,
hungira mbi tji zuve;
nami mbi nonḓero okukuzira kutja u ri osemba.
33 Nungwari tje he ri nao, ove mwina,
nu puratene ku ami,
nami me ku hongo ounongo.”
© Herero Revision Bible © Bible Society in Namibia, 2021.
