1 “Tareye, oviṋa avihe mbi mbe vi muna;
nu avihe mbi mamu hungire mbe vi zuva
nu mbe vi konḓonona rukuru.
2 Mbi mamu tjiwa ami wina me vi tjiwa.
Ami hi ri kehi yeṋu.
3 Nungwari ozombata zandje
ze ri kuna Omunamasaaehe,
nungwari ka kuna eṋe;
ami me vanga okupatasana
otjiposa tjandje kuna Ndjambi.
4 Eṋe mamu kutjire okuhatjiwa
kweṋu novizeze;
amuhe mu ri otja ozonganga
nḓe ha sora okuverukisa omundu.
5 Amu hungire ko otjiṋa,
tjapo omundu worive ma
tjangovasi oweṋe ozonongo.
6 “Purateneye ku ami,
ngunda ame tye otjiposa tjandje.
7 Ongwaye tji mamu hungire
ovizeze mena ra Ndjambi,
natji mamu hungire otjiwova mena re?
8 Mamu karere ku Ndjambi are?
Mamu kapatasana otjiposa
tje mombanguriro are?
9 Hapo Ndjambi tje mu
konḓonona nawa,
ma munu otjiṋa otjiwa mu eṋe are?
Mamu tjangovasi
mamu wovisa Ndjambi,
otja tji mamu wovisa ovandu are?
10 Nangarire kutja omendjipanguriro weṋu
wokomurungo ruveze ya horekwa,
eye me mu tena,
11 nounene wouvara we mau
eta ondiriro ku eṋe.
12 Omiano vyeṋu ovyo oviṋa
uriri tjimuna omutwe;
omayeuriro weṋu maye
nyanyauka tjimuna omunoko.
13 Mwineye nu ndji peweye
oruveze rwokuhungira,
nu kombanda yandje ngaku ye
omuhingo auhe
otja pu mape vangwa.
14 “Ami mbe rirongerere nangarire
okutwa omuinyo wandje moumba.
15 Ami hi tji nomaundjiro,
pena tjike Ndjambi tji me ndji zepa?
Ami me keriyeura
motjiposa tjandje ku ye.
16 Ihi matji rire ondjamo ku ami,
omurumendu omurunde tjinga
e hi na maa roro okumunika
komurungu wa Ndjambi.
17 Nambano purateneye
komahandjauriro wandje.
18 Ami mbe rirongerere
okuserekarera otjiposa tjandje,
orondu ami me tjiwa
kutja me rire omuhinandjo.
19 “Ndjambi, ove mo ya okundjipa ondjo?
Tji mo tjiti nai,
ami me mwina ne koka.
20 Ndji esa mbi ningire oviṋa vivari;
nove itavera ku vyo,
nu ami hi nokurihoreka kove:
21 Isa okundjivera,
nu o ndji ṱukuṱura nondirisiro yoye.
22 “Hungira rutenga,
Ndjambi, nu ami me ziri.
Poo ndji esa mbi hungire,
nu ove u ndji zire.
23 Hapo ami mba tjita
ozondataiziro zatjike?
Mba tjita ourunde watjike?
Nami mbe ku pirukira pu tjike?
24 “Ongwaye tji mo ndji nyengwa?
Ongwaye tji mo ndji
zara otja omunavita na ove?
25 Mo vanga okundjitirisa are?
Owami otjiṋa uriri,
otjiyao tji hingwa i ombepo;
Ove mo rwisa otjihozu tji tja kukuta.
26 “Ove mo eta omarondororero
omatetarise ku ami,
nangarire ozongatukiro nḓu
mba tjita ngunda ambi ri omutanda.
27 Ove mo pandeke ozombaze zandje,
mo tjevere omikambo
vyandje avihe mbi me yata,
nu wina mo konḓonona ozondambo zandje.
28 Komuhingo mbwi ami otji me
nyanyauka tjimuna orukuṋe ndwa wora,
tjimuna ombanda ndja riwa i omatoto.
© Herero Revision Bible © Bible Society in Namibia, 2021.
