Okutanga ounongo
1 “Mu nomoṋa mu mu sosurwa osilveri;
pe nopoṋa pu pe kohororerwa ongoldo.
2 Ovitenda vi za mehi,
nongoporo i zuzurwa pomawe.
3 Ovandu ve konḓonona ourekoto wonḓorera.
Owo ve paha oukoto wehi,
nu ve sa otuuwa monḓorera.
4 Ovandu ve sa ozondjira mourekoto wehi,
kokure na ku ku tura ovandu,
poo ku ku ryanga ovandu.
Ingo ve ungura aveyerike ava kakatere
kozongoze mourekoto wehi.
5 Ovikurya vi hapa mehi,
nungwari mehi kehi yehi tjingero avihe
vi taurwa nomasa womuriro.
6 Momawe wehi mu na osafira,
nu moruuma rwawo mu na ongoldo wina.
7 Kape norukoze ndu muna ozondjira
zokupunda mourekoto wehi,
nu kape nonguvi,
ndji tuka kombanda yourekoto mbwi.
8 Kape nongeyama poo
otjipuka tjarwe otjindandi
tji tji ryanga mozondjira nḓo.
9 “Ovandu ve ka otuuwa otukukutu tjinene,
ve sa ozondundu kehi.
10 Tji mave topora otuhito
twomehi okutuurunga otuuwa,
ve kamuna mo omawe omahuze.
11 Ve sa nga kozomburo zozonḓonḓu;
nave eta kondjerera imbi mbya horekwa.
12 Nungwari ounongo mau vazewa pi?
Nondjiviro mai munika pi?
13 “Ondjira ndji twara kounongo,
kai tjiukwa i omundu.
Owo kau munika mehi rovanamuinyo.
14 Ourekoto wokuvare mau tja:
‘Ounongo kau ri mu ami!’
Nomuronga mau tja:
‘Ounongo kau ri pu ami!’
15 Owo kau randwa nongoldo
nu kau sutwa nosilveri.
16 Ongoldo ongohoke tjinene nomawe
omahuze kavinanḓengu imwe.
17 Ounongo u nonḓengu pongoldo,
u nonḓengu potjitjuma tjongoldo
nekende ekeṋakeṋe.
18 Onḓengu younongo i kapita omawe
omahuze womosengo noundjendje.
19 Otopas ya Kus nongoldo ongohoke
tjinene kavi ṱeki ponḓengu younongo.
20 “Nu ounongo, hapo mau vazewa pi?
Nondjiviro mai munika pi?
21 Kape notjiutwa otjinamuinyo tji matji u munu,
nandarire ozonḓera nḓu maze tuka meyuru.
22 Nangarire otjovakoke nonḓiro mavi
itavere kutja ovyo vya zuva
onḓuvarero younongo porwayo.
23 “Ndjambi erike ongu tjiwa ondjira,
nongu tjiwa poṋa pu pe vazewa ounongo,
24 eye tjinga e muna nga komayandero wouye,
noviṋa avihe mbi ri kehi yevaverwa,
eye u vi muna.
25 Ndjambi tja yandja kombepo omasa wayo,
na zikamisa omiruko vyokuvare,
26 na tye poṋa pu mape sokuroka ombura,
nondjira ovikamba vyotuṱuṱumo
mu mavi sokuryanga,
27 eye otja muna ounongo ne u zuvarisa;
neye we u zikamisa ne u konḓonona wina.
28 “Ndjambi wa tja nai komundu:
‘Ondira ku Muhona oyo ounongo;
nokutonda ouvi oko ondjiviro.’ ”
© Herero Revision Bible © Bible Society in Namibia, 2021.
