Okutanga oviungura ovinene vya Muhona
1 Tanga Muhona!
Ami me hivirike Muhona
nomutima wandje auhe mombongo
yotjiwaṋa tje.
2 Oviungura vya Muhona, tjiri, ovinene!
Avehe mbe norutjato mu vyo,
ve ripura na vyo.
3 Avihe eye mbye tjita,
vye ura nounene nongeṋangeṋeno;
ouṱakame we u karerera nga aruhe.
4 Muhona aruhe u tu zemburukisa
oviungura vye ovihimise.
Eye u nomutima omuwa nu unotjari.
5 Eye u parura imba mbe mu yozika,
nu u zemburuka omerikutiropamwe
we nga aruhe.
6 Wa raisa omasa we kotjiwaṋa tje
mokutjipa omahi wovandu wozonganda.
7 Avihe eye mbye tjita, vi hongonona
ouṱakame nousemba we;
omarakiza we aehe ya zikama.
8 Owo ya zikama aruhe nga aruhe,
nu ya yandjewa mouatjiri na mousemba.
9 Eye wa kutura otjiwaṋa tje,
nu wa tjita omerikutiropamwe
omakarerere na tjo.
Ena re eyapuke netirise.
10 Ondira ku Muhona oyo ombutiro younongo;
avehe mbe nonḓuviro komarakiza we,
ve nozondunge ozombwa.
Ondangero ya Muhona i karerera nga aruhe.
© Herero Revision Bible © Bible Society in Namibia, 2021.
