Ehungi oritjavari ra Bildad
1 Bildad, Omusuak, wa zira a tja:
2 “Job, ovandu mbe ri otja ove
kave sora okumwina are?
Ove ko tji mwina u puratene,
eṱe tu sore okuhungira kuna ove.
3 Mo ripurire tjike kutja oweṱe
omayova tjimuna ozongombe?
4 Mo rihihamisa omuini momazenge woye.
Ehi mari sewa ongaango
mena romazenge woye are?
Indu Ndjambi ma isa po ozondundu,
kutja ove u kare nohange are?
5 Ondjerera yomunauvi, tjiri, mai zemisiwa;
orururumo rwayo kamaaru yaka rukwao.
6 Ondjerera mondanda ye kamaai yere;
nemunine ndi mari yaka mari zemi.
7 Omikambo vye vya ri avya zikama,
nungwari nambano eye ma putara;
eye ma u, ma ṱu i omaronga we omuini.
8 Eye ma hiti mombate;
nozombaze ze maze kamburwa.
9 Ombate mai kambura ovipanḓe vye,
nai mu ṱiza.
10 Mehi mwa horekwa ongwehe;
nombate ya tuwa mondjira ye.
11 “Ondiriro ye mu kovere
nu mai mu undjire akuhe,
oyo mai mu kongorere momikambo avihe.
12 Eye aruhe wa ri omutumbe,
nambano ma ṱondjara;
otjiwonga matji mu undjire posi ye.
13 Omutjise omukoze mau rimbara morutu rwe,
nu mau worisa omaoko nomarama we.
14 Eye ma kokozorwa okupitisiwa
mondanda me tura nokuhinatjipo,
nu ma toorwa okukakurama
komurungu wOmbara Nḓiro.
15 Nambano ngamwa auhe
ma yenene okutura mondanda ye,
indu Osulfuri tji ya zu
nokutjatjwa okuikohorora.
16 Neye ma kara tjimuna omuti
mbwa kukuta okuza komize nga kotutavi.
17 Ondangu ye monganda ye
na kwarwe mai yanda;
kape na ngu me tji mu zemburuka rukwao.
18 Eye ma rambwa mehi rovanamuinyo,
ma rambwa mondjerera
na undurirwa monḓorera.
19 Eye ke nozondekurona,
nu ke novandu mba hupa.
20 Okuza komukuma
wokomuhuka nowokongurova,
avehe mba zuva oumba we,
va teratera nave zezerisiwa i ondiriro.
21 Otji mape tjitwa nao komurunde,
na ku ingwi ngu hi na ko na tja na Ndjambi.”
© Herero Revision Bible © Bible Society in Namibia, 2021.
