Job 21 - Herero Revision Bible (HRR)

Job ma ziri Sofar

1 Job wa zira a tja:

2 “Purateneye ku imbi mbi me hungire;

okupuratena nai owo omahuhumiṋino ngu me ningire ku eṋe.

3 Ndji peweye oruveze okuhungira,

nu tji mba zu nokuhungira, nga rire tji mwe ndji hembe, tji mamu vanga.

4 “Ami hi notjiposa nomundu;

hi nousemba okukara nokuhinomuretima are?

5 Tareye ku ami!

Nu hapo kapuwo ku eṋe okukumwa nokumwina?

6 Ami tji me ripura na imbi mbya tjitwa ku ami,

mba temwa nu me zezera nokuteratera.

7 “Ongwaye Ndjambi tje yandjera ovandu ovanauvi ve hupe,

nu tji meve esa ve kurupe nu ve kare nomasa?

8 Owo ve novanatje, novanatje vovanatje vawo,

nu ve hupira kutja ve ve tjevere nga tji ve kuru avehe.

9 Ndjambi kaeta onyoneno kozonganda zawo;

nomberero ye kai nokuya kombanda yawo.

10 Ii, ozondwezu zawo zozongombe ze ronda naze kwatisa,

nu inḓa ozonḓenḓu ze kwata nokuhinoumba.

11 Ovanatje vawo ve tupuka nave tuka

ovindondooro tjimuna ozondjona,

12 owo ve imbura nokupunda otja

kombosiro noyoviharpe noyozohiva.

13 Owo ve hupa mohange,

nu ve koka moupore nokuhinomihihamo.

14 “Imba ovarunde ve raera Ndjambi kutja

e ve ese ve rikarere ku wo oveni;

owo kave vanga okutjiwa ombango ye

ohunga nominyo vyawo.

15 Owo ve ripura kutja ouṋe

ngu ri Omunamasaaehe,

ngu matu sokukarera,

neye u nombatero ya

tjike okukumba ku ye?

16 Owo ve tja, ve muna ouṋingandu

momasa wawo oveni,

nungwari omeripuriro

wawo ami hi ye yakura ko.

17 “Ondjerera yomunauvi i

na pu ya zemisiwa are?

Pena umwe wawo ngwa

hakaena noviwonga are?

Ndjambi u na pa verere

ovanauvi momazenge we,

18 nokuvehinga otja oviyaya mombepo,

poo otja oruuma ndu

maru piziwa i otjivepo are?

19 “Eṋe mu tja Ndjambi ma vere

omuatje mena rozongatukiro za ihe.

Kako, Ndjambi nga vere ovanauvi oveni;

Neye nge ve raere kutja me

ve verere ozongatukiro zawo.

20 Ovanauvi ngave tjinde

omberero yawo oveni,

ngave mune omazenge

wa Ndjambi Omunamasaaehe.

21 Omuinyo womundu tji wa zu po,

eye, tjiri, ma kara ko na tja

kutja ovanatje ve ovaṋingandu are?

22 Omundu ma yenene okuhonga Ndjambi

ngu pangura nangarire imba

mbe ri kombanda meyuru are?

23 “Ovandu tjiva ve kara

mouveruke na mohange

nga keyuva ndi mave koka,

24 owo ve koka mondjoroka na moupore,

ave notutu tu twa parurwa nawa.

25 Imba ovarwe kave nondjoroka;

owo ve hupa nave koka

nomatetarero womitima.

26 Nungwari owo avehe ve koka

omuhingo umwe nave pakwa;

avehe ve vandekwa i omativa.

27 “Tareye, ami me tjiwa omeripuriro weṋu,

nozondunge zeṋu

nḓu mu ndji sekamena na zo moutwe.

28 Eṋe mu pura amu tja: ‘Ondjuwo yovandu

ovanauvara nambano i ri pi,

imba mbe tjita ouvi?’

29 Kamu na pu mwa hungira

novandu mbe ryanga are?

Kamu nokutjiwa omahongonona

ngu ve serekarera are?

30 Meyuva Ndjambi nda ṱomazenge,

omurunde ongu ma kara nokuhinatjipo;

nu meyuva Ndjambi ndu ma vere ovandu,

omurunde aruhe ongu ma yamwa.

31 Kape na ngu ma yandja ondjo komurunde;

poo okumusutisa imbi mbya tjita?

32 Eye tji ma twarewa komaendo,

keyendo re nda tjeverwa nawa,

33 omayovi maye mu kongorere mombakero,

nandarire indi ehi ri rara nawa korutu rwe.

34 “Neṋe mu kondja okundjihuhumiṋa noviporoporo.

Eziriro arihe ndi mamu yandja oro ovizeze.”