Esekiel 37 - Herero Revision Bible (HRR)

Otjana tjomaṱupa nga kukuta

1 Ami mba muna kutja omasa wa Muhona ye ri mu ami, nOmbepo ye otji ye ndji toora nai kendjitwa motjana mu mwa rimbarere omaṱupa omengi. 2 Eye we ndji ryangisa kominda avihe, nami mba muna kutja mu tjo mu nomaṱupa omengi tjinene, nowo ya kukutire tjinene. 3 Eye we ndji pura a tja: “Muatje womundu, omaṱupa nga nai maye sora okukotora omuinyo are?”

Ami mba zira e tja: “Muhona Ndjambi, oove erike ngu mo sora okuzira eziriro ndo!”

4 Eye wa tja: “Hungira otja omuprofete komaṱupa nga. Raera omaṱupa, nga kukuta nga kutja ye puratene kembo ra Muhona. 5 Ye raera kutja ami, ngu mbi ri Muhona Ndjambi, me tja nai ku wo: Me suvire omuinyo mu eṋe, neṋe mamu kotora omuinyo. 6 Me mu pe omisepa e hapisa onyama ku eṋe nu etwako omikova ku eṋe. Me suvire mo omuinyo mu eṋe, neṋe mamu kotora omuinyo. Notji mamu tjiwa kutja owami ngu mbi ri Muhona.”

7 Ami otji mba profeta otja pu mba raerwa. Ngunda ame hungire, arire tji mba zuu omaporokotero, nomaṱupa aye utu okuhondja kumwe. 8 Ngunda ame tarere, omaṱupa otji ya hara omisepa nonyama naku tuwa omikova. Nungwari kamwa ri omuinyo mu wo.

9 Muhona wa tja nai ku ami: “Muatje womundu, hungira otja omuprofete kombepo. Raera ombepo kutja Muhona Ndjambi me i rakiza kutja i ze kominda avihe iye okuripepera motutu tu twa koka twi, nu i tu kotore komuinyo rukwao.”

10 Ami arire tji mba profeta otja pu mba raerwa. Omuinyo wa hita motutu, notwo atu kotora omuinyo natu sekama. Otutu twi twa ri otuingi tjinene nga tji twa yenena okutunga otjimbumba otjinene tjovita.

11 Muhona wa tja nai ku ami: “Muatje womundu, Ovaisrael va sana komaṱupa otja inga. Owo ve tja omaṱupa wawo ya kukuta, kave tji nomaundjiro, va yanda okumanuka. 12 Otji mo uku otjiwaṋa tjandje Israel notji raere kutja ami, ngu mbi ri Muhona Ndjambi, me yezurura omaendo watjo. Me tji pitisa mu wo nu e tji yarura kehi ra Israel. 13 Tji mba yezurura omaendo mu mwa pakwa otjiwaṋa tjandje ne tji pitisa mu wo, notji matji tjiwa kutja owami ngu mbi ri Muhona. 14 Ami me suvire mo omuinyo wandje mu wo, e ve kotora komuinyo ne ve turisa mehi rawo oveni. Mave tjiwa kutja owami ngu mbi ri Muhona. Ami mba kwizika kutja me tjiti otjiṋa hi, nu, tjiri, me tji tjiti. Ami, ngu mbi ri Muhona, owami ngu mba hungire.”

Juda na Israel mau rire ouhona umwe

15 Muhona wa hungira ku ami rukwao 16 a tja: “Muatje womundu, toora okati nu u tjange ko omambo nga ‘Ouhona wa Juda’. Tjazumba toora okati okakwao nu u tjange ko omambo nga ‘Ouhona wa Israel’. 17 Nu hondjera outi auyevari mbwi kumwe awe u ṱizire kovikoro vivari meke roye kutja u munike otja okati kemwe. 18 Ovandu voye tji ve ku pura kutja ihi matji hee tjike, 19 ve raera kutja ami, ngu mbi ri Muhona Ndjambi, me kambura okati nga ku ke kuramenapo Israel ne ke twa puna inga ku ke kuramenapo Juda. Pouti uvari mbwi ami me ungura po okati kemwe, nu me ke ṱiza meke randje.

20 “Ṱiza outi uvari mbwi meke roye, novandu ngave u mune. 21 Tjazumba ve raera kutja ami, ngu mbi ri Muhona Ndjambi, me kapitisa ovandu vandje avehe mokati koviwaṋa ku va ya, e keveworonganisa ne kevekotora kehi rawo oveni. 22 Ami meve waneke kutja ve rire otjiwaṋa tjimwe mehi randje na kozondundu za Israel. Mave kara nombara imwe, ndji mai ve honaparere avehe, nu kave tji nokuuhara amave haṋewa moviwaṋa vivari poo okuhaṋika momauhona yevari. 23 Owo kave tji nokuuhara amave riyamburura noviserekarera vyovisenginina oviyaukise rukwao, nokurizunḓa oveni nozondjito zomauvi wawo aehe. Ami meve kutura komauvi aehe ngu va tjita mouhaṱakama wawo. Meve kohorora; owo otji mave rire otjiwaṋa tjandje, nami me rire Ndjambi wawo. 24 Ombara otja omukarere wandje David ondji mai ve honaparere, nowo avehe mave wana kehi yomunane umwe nu mave kara nonḓuviro komatwako wandje nouṱakame. 25 Mave tura mehi, ndi mba yandja komukarere wandje Jakob, indi ehi muyamu turire ooihe mukururume. Owo mave tura mo nga aruhe, novanatje vawo nozondekurona zawo wina mave tura mo nga aruhe. Ombara ndji ri otja omukarere wandje David mai ve honaparere nga aruhe. 26 Ami me tjiti omerikutiropamwe na wo ngu maye zikamisa kutja owo kamaave munu otjipo nga aruhe. Ami meve turisa rukwao, e ve takavarisa ne tungu ondjuwo yandje mehi rawo; noyo mai kara mu ro nga aruhe. 27 Ami me tura mo puna wo; me rire Ndjambi wawo, nowo mave rire otjiwaṋa tjandje. 28 Tji mba tungu ondjuwo yandje mehi ndo kutja i karerere mokati kawo, oviwaṋa mavi tjiwa kutja ami, ngu mbi ri Muhona, owami ngu mba toorora Israel tji rire otjiwaṋa tjandje omuini.”