Omakwizikiro wa Muhona kotjiwaṋa tje
1 Muhona, Ndjambi wa Israel, 2 wa tja nai ku ami: “Tjanga membo inga omambo aehe ngu mbe ku raera, 3 orondu omayuva maye ya ami mu me yarura ko otjiwaṋa tjandje tja Israel notja Juda. Ami meve yarura kehi, ndi mba yandja kooihe mukururume, nowo mave ri kambura ri rire ouini wawo rukwao. Ami, ngu mbi ri Muhona, owami ngu mba hungire.”
4 Muhona wa tja nai kotjiwaṋa tja Israel notja Juda: 5 “Ami mba zuva ondavaerero yondirisiro, ondavaerero yemuma, nu ndji he ri yohange. 6 Nambano mwineye mu ripure! Omurumendu u panduka omuatje are? Nu okutjavi tji me munu omurumendu auhe a twa omake kezumo re tjimuna omukazendu mombandukiro? Okutjavi ovandu avehe tji va tjituka omirungu nai? 7 Tjiri, eyuva ndi ndi mari ya, etirise; kape neyuva rarwe, ndi mari sasanekwa na ro orwo maru rire oruveze rwombamisiro kotjiwaṋa tjandje, nungwari otjo matji yamwa.”
8 Muhona Omunamasaaehe ma tja nai: “Eyuva ndo tji re ya, ami me teya otjiyoke tji tji ri kozosengo zawo, nu me pora ouketanga wawo, nowo kave nokuuhara amave rire ovakarere vovandu wozonganda. 9 Moruveze rwanao owo mave karere ami, Muhona, Ndjambi wawo, nondekurona ya David wina ami ndji me ziki okurira ombara.
10 “Tjiwaṋa tjandje, o tira;
tjiwaṋa tja Israel, o mumapara.
Ami me ku yama kehi rokokure ndo,
kehi ove ku u ri omuhuurwa.
Mo yaruka konganda, nu mo katura mohange;
mo kakara nokuhinatjipo,
nu kape na ngu me ku tirisa.
11 Orondu ami mbi ri puna ove nu me ku yama.
Me yandeke oviwaṋa avihe akuhe ami ku mbe ku rimbira,
nungwari ove hi nokukuyandeka ko.
Ami hi nokukuesa nokuhaverwa;
nungwari tji me ku vere, me ku vere osemba.
Ami, ngu mbi ri Muhona, owami ngu mba hungire.”
12 Muhona ma tja nai kotjiwaṋa tje:
“Ovirwaro vyoye ovihaveruka,
ovito vyoye kavi nokusora okuverukisiwa.
13 Kape nomundu ngu ma kara ko na tja na ove,
kape nomuti omupange womazeze woye,
kape nomaundjiro womberukiro kove.
14 Omapanga woye aehe ye ku zemba;
owo kaye tji na ko na tja na ove.
Orondu ami mbe ku rwisa otja omunavita;
omberero yoye ya ri onḓeu,
orondu omauvi woye omengi
nourunde woye ounene.
15 O unaunine ovito vyoye rukwao;
kape nomberukiro kove.
Ami mbe ku vera komuhingo mbo,
orondu omauvi woye omengi,
nourunde woye ounene.
16 Nungwari nambano avehe mbu
mave ku sasaura mave sasaurwa,
novanavita na ove avehe mave twarewa otja ovahuurwa.
Avehe mbu mave ku ṋiṋikiza mave ṋiṋikiziwa,
navehe mbu mave ku pundu mave pundwa.
17 Ami me ku verukisa rukwao;
me verukisa ovirwaro vyoye,
nangarire kutja ovanavita na ove mave tja nai:
‘Sion tja imbirahiwa;
kape na ngu na ko na tja na tjo.’
Ami, ngu mbi ri Muhona,
owami ngu mba hungire.”
18 Muhona ma tja nai:
“Ami me yarura ko otjiwaṋa tjandje mehi ratjo,
nu me tjariparere eṱunḓu arihe;
Jerusalem matji tungururwa,
nondjuwo yatjo youhona mai
zikamisiwa poṋa payo opakuru.
19 Ovandu mbe tura mu tjo mave imbura omatangero;
mave ravaere nondjoroka.
Owo mave takavarere ko mondaya
yandje nokuhinokuhenuka;
ondaya yandje mai ve etere ondjozikiro,
nungwari kai nokuveetera omanyenguriro.
20 Ami me yarura ko ouvara oukuru wotjiwaṋa,
nu me u zikamisa nomasa rukwao;
nungwari me vere avehe mbu mave ve ṋiṋikiza.
21-22 Omunane wawo ma zu momuhoko wawo oveni,
nohivirikwa mai zu motjiwaṋa tjawo oveni.
Ami tji me mu ṋanga ma ryama,
orondu owaṋi ngu yenena
okuya ngunda e hiya ṋangwa?
Owo mave rire otjiwaṋa tjandje,
nami me rire Ndjambi wawo.
Ami, ngu mbi ri Muhona,
owami ngu mba hungire.”
23-24 Omazenge wa Muhona otjipukupuku, owo ombepo otjindandi, ndji taurira moviuru vyovanauvi. Omazenge nga kamaaye yanda, ngandu ndi eye tja tjiti avihe mbye vanga okutjita. Momayuva ngu maye ya, otjiwaṋa tje matji zuu otjiṋa hi nawa.
© Herero Revision Bible © Bible Society in Namibia, 2021.
