Jeremia 33 - Herero Revision Bible (HRR)

Omakwizikiro omakwao womaundjiro

1 Ami ngunda ambi ri motjovakamburwa morupanda rwondjuwo youhona, ombuze ya Muhona otji ye ya ku ami rukwao. 2 Muhona ngwa ungura ehi, nu ngwe ri zezenga ne ri zikamisa, wa hungira ku ami. Eye, wena Muhona, wa tja nai: 3 “Kwa ku ami, nami me itavere; ami me ku raere oviṋa ovihimise mbi u he i. 4 Ami, ngu mbi ri Muhona, Ndjambi wa Israel, me tja ozondjuwo za Jerusalem na inḓa zouhona za Juda maze haṋewa. Kahepero okukarwisa ozondunduvahi nḓa tungwa i Ovababilon. 5 Okutjita nao oko maku urisa otjihuro uriri noturova twaimba mbu me tono momazenge na momapindi wandje. Ami mba yandja etambo kotjihuro hi mena romaurunde ovandu vatjo ngu va tjita. 6 Nungwari, tara, ami me verukisa otjihuro hi novandu vatjo, nu meve pe omberukiro rukwao. Ami meve raisire ohange nombwiro onyingi. 7 Me ṋingaparisa otjiwaṋa tja Juda notja Israel, nu me vi tungurura otja tji vya ri rutenga. 8 Me vi kohorora kourunde wavyo auhe, nu me vi isire omauvi nomapirukiro wavyo. 9 Jerusalem matji rire omburo yondjoroka nondjozikiro nohivo ku ami moviwaṋa avihe mouye; ovyo mavi tira navi zezera tji vya zuu ouwa mbu mbi tjita kovandu va Jerusalem, nouṋingandu mbu mba eta kotjihuro hi.”

10 Muhona wa tja nai: “Ovandu ve tja otjirongo hi tji ri otja okuti onguza, kamu novandu poo ovinamuinyo. Nowo ve ri osemba; ovihuro vya Juda nomivanda vya Jerusalem vi ri tjo, kamu novandu novinamuinyo. Nungwari movirongo mbi mo zuu mo rukwao 11 ozondavaerero zenyando nozondjoroka, nozombosiro ozombwa zomikandi vyotukupo. Mo zuu ovandu amave imbura, tji mave punguhire ozombunguhiro zokutja okuhepa mondjuwo yandje; owo mave tja:

‘Itjeye okuhepa ku Muhona Omunamasaaehe,

eye tjinga e ri omuwa,

norusuvero rwe orukarerere.’

Ami me yarura ko ehi ndi kutja ri ṋingapare otja tji ra ri rutenga. Ami, ngu mbi ri Muhona, owami ngu mba hungire.”

12 Muhona Omunamasaaehe wa tja nai: “Mehi ndi ndi ri otja okuti onguza, nu mu mu hi novandu novipuka, na movihuro avihe vyaro mamu kara omaryo rukwao ovarise ku mave twara ozonḓu zawo. 13 Movihuro, mbi ri mehi rozondunda na movivanda, na mehi rokomukuma wokeyuva kokumuho kwa Juda, na mehi ra Benjamin, na movihuro mbya kondoroka Jerusalem, na movihuro vya Juda, ovarise mave vara ozonḓu zawo rukwao. Ami, ngu mbi ri Muhona, owami ngu mba hungire.”

14 Muhona wa tja nai: “Tara, omayuva maye ya ami mu me yenenisa omakwizikiro wandje ngu mba tjita kotjiwaṋa tja Israel notja Juda. 15 Momayuva ngo ami me toorora ondekurona osemba ya David okurira ombara. Ombara ndji mai tjiti ousemba nouatjiri mehi arihe. 16 Otjiwaṋa tja Juda matji yamwa, novature va Jerusalem mave tura mouyara. Otjihuro matji isanewa kutja ‘Muhona Ondjamo yetu’. 17 Ami, ngu mbi ri Muhona, mba kwizika kutja aruhe mape kara ondekurona ya David, ndji mai rire ombara mOisrael, 18 nokutja wina aruhe mape kara ovapristeri momuhoko wa Levi mbu mave ndji karere nokundjipunguhira ozombunguhiro ozoningiririsiwa nozovikurya nozovinamuinyo.”

19 Muhona wa tja nai ku ami: 20 “Ami mba tjita omerikutiropamwe puna omutenya nouṱuku, kokutja aruhe ovyo vi kare po motuveze twavyo otusemba; omerikutiropamwe nga kamaaye teyewa ko. 21 Momuhingo tjingewo ami mba tjita omerikutiropamwe nomukarere wandje David kutja eye aruhe ma kara nondekurona, ndji mai rire ombara; nu wina mba tjita omerikutiropamwe novapristeri vomuhoko wa Levi kutja aruhe mave ndji karere; nomerikutiropamwe nga kamaaye teyewa ko. 22 Ami me takavarisa otjivaro tjozondekurona zomukarere wandje David, notjivaro tjovapristeri vomuhoko wa Levi kokutja ave ha yenene okuvarwa tjimuna ozonyose keyuru poo eheke pomukuro wokuvare tji vi ha sora okuvarwa.”

23 Muhona wa tja nai ku ami: 24 “U tjiwa kutja nai ovandu ve tja ami mba nakaura Israel na Juda, inga omaṱunḓu yevari ngu mba toorora are? Nowo ve tara nonyengo kotjiwaṋa tjandje, nu kave uhara amave tji vara otja otjiwaṋa rukwao. 25 Nungwari ami, ngu mbi ri Muhona, mbi nomerikutiropamwe puna omutenya nouṱuku, nu mba twa po omazikamisiro nge tjevera ehi neyuru. 26 Nu, tjiri, otja tjinga amba tjita nai, otjinga ame ṱakamisa omakwizikiro wandje ngu mba tjita kozondekurona za Jakob nozomukarere wandje David. Ami me toorora ovanane mozondekurona za David okuhonaparera ozondekurona za Abraham noza Isak noza Jakob. Ami me ṱotjari notjiwaṋa tjandje, nu me tji ṋingaparisa rukwao.”