Jeremia ma toora otjiyoke tjonduwombe
1 Kamanga Josija, omuzandu wa Sidkija, tja za nokurira ombara ya Juda, Muhona arire tje ndji raere 2 kutja mbi riungurire otjiyoke pomuti nomivya nu mbi tji twe kosengo yandje. 3 Tjazumba Muhona otje ndji raera kutja mbi hinde ombuze kombara ya Edom noya Moab noya Amon noya Tirus noya Sidon puna ovakuramenepo vomahi wazo mbe ere kOjerusalem okuyekuhakaena nombara Sidkija. 4 Muhona Omunamasaaehe, Ndjambi wa Israel, we ndji raera kutja mbi ve rakize okukaraera ozombara zawo omambo wa Muhona nga: 5 “Ami mba utire ouye novandu novipuka avihe mbi ri kombanda yehi mouvara na momasa wandje; nu me vi yandja ku ngamwa auhe ngu mba toorora. 6 Nambano owami ngu mba twa oviwaṋa avihe mbi mouvara womukarere wandje Nebukadnesar, ombara ya Babilon, nowami ngu mba twa nangarire ovipuka vyokuti kehi youkarere we. 7 Oviwaṋa avihe mavi mu karere, novyo mavi karere omuzandu we nomuzandu womuzandu we, ngandu oruveze rwokuwa kwotjiwaṋa tje omuini tji rwa yenene. Nu otjiwaṋa tje matji karere oviwaṋa ovinauvara nozombara ozonamasa.
8 “Nungwari omuhoko auhe poo ouhona ngamwa auhe tji u hi nokukara kehi younane wombara Nebukadnesar nokutjinda otjiyoke kosengo yawo, ami me vere omuhoko mbo novita nondjara nomutjise omuzeu, ngandu ndi owo tji wa kara kehi youvara we. 9 Amu puratene ko kovaprofete na kovamune na kovarote veṋu na kozombuke na kozondjai zeṋu. Owo avehe ve mu raera kutja amu ha kara kehi younane wombara ya Babilon. 10 Owo ve mu wovisa, nu ve vanga kutja eṋe mu twarewe kokure nehi reṋu; orondu ami me mu ramba, neṋe mamu yandekwa. 11 Nungwari omuhoko ngamwa auhe tji wa kara kehi yotjiyoke tjombara ya Babilon nau i karere, ami me u kareke mehi rawo ouini okuungura ro nokutura mu ro. Ami, ngu mbi ri Muhona, owami ngu mba hungire.”
12 Ami mba hungira otjiṋa tjingetjo ku Sidkija, ombara ya Juda notjiwaṋa tje, e tja: “Kareye kehi youkarere wombara ya Babilon. Karereye yo notjiwaṋa tjayo, neṋe mamu kara nomuinyo. 13 Okutjavi ove notjiwaṋa tjoye tji mamu ṱu movita nokuṱa i ondjara nomutjise omuzeu? Otjiṋa hi Muhona otja hungira kutja matji tjitwa komuhoko auhe ngamwa mbu hi nokuriwisa kehi younane wombara ya Babilon. 14 Amu puratene ko kovaprofete mbe tja amu riyandja kombara Nebukadnesar. Owo mave mu wovisa. 15 Muhona omuini wa tja eye ke ve hindire, nokutja owo ve mu korera ovizeze mena re. Eye otji me mu ramba neṋe mamu ṱu puna ovaprofete mbe mu ukira ovizeze mbi.”
16 Tjazumba otji mba raera ovapristeri notjiwaṋa atjihe kutja Muhona wa tjere nai: “Amu puratene ko kovaprofete mbe uka kutja oviungurise oviyapuke vyondjuwo ya Muhona mavi kotorwa tjimanga okuza kObabilon. Owo ve mu ukira ovizeze. 17 Amu puratene ko ku wo! Riwiseye kehi yombara ya Babilon, notji mamu kara nomuinyo. Okutjavi otjihuro hi tji matji rire otjitambatundu? 18 Ndoovazu owo ovaprofete vakatjotjiri, nu ndoovazu ve nombuze yandje, atjave ndji ningira, ngu mbi ri Muhona Omunamasaaehe, kutja e ha yandjere oviungurise mbi mbya sewa mondjuwo ondjapuke ya Muhona na mondjuwo youhona, okutwarewa wina kObabilon.”
19-20 Ombara Nebukadnesar tja twara Jekonia, ombara ya Juda, omuzandu wa Jojakim, novarumendu ovatengwandu va Juda nova Jerusalem kObabilon otja ovahuurwa, otja isa ozongunḓe, noruungu rwongoporo, noutemba, noviungurise ovikwao tjiva vyondjuwo ya Muhona mOjerusalem.
21 “Purateneye ku imbi ami, ngu mbi ri Muhona Omunamasaaehe, Ndjambi wa Israel, mbi me hungirire oviungurise oviyapuke mbya sewa mondjuwo ya Muhona na mondjuwo youhona mOjerusalem: 22 Ovyo mavi twarewa kObabilon, nu mavi kakara ngo ngandu ndi ami tji mba kara ko na tja na vyo. Tjazumba otji me vi kotora ne vi ziki rukwao moṋa mwi. Ami, ngu mbi ri Muhona, mba hungire.”
© Herero Revision Bible © Bible Society in Namibia, 2021.
