Jeremia 25 - Herero Revision Bible (HRR)

Omunavita ngu ma zu komukuma wokokunene kweyuva

1 Mombura oitjaine Jojakim, omuzandu wa Josija, tja ri ombara ya Juda, ami, Jeremia, mba pewa ombuze ya Muhona ndji mba sokuzuvarisa kotjiwaṋa atjihe tja Juda. Indji ya ri ombura ondenga Nebukadnesar tja ri ombara ya Babilon. 2 Ami mba tja nai kotjiwaṋa atjihe tja Juda notja Jerusalem: 3 “Oure wozombura omirongo vivari nandatu, okuza kombura oitjamurongo nandatu, Josija, omuzandu wa Amon, tja ri ombara nga ku ndinondi, Muhona wa hungira ku ami, nami mba raera eṋe nawa imbi eye mbya hungira. Nungwari eṋe kamu karere ko na tja. 4 Eṋe kamu vangere okuzuva nokupuratena, nandarire kutja Muhona aruhe wa ramanga okumutumina ovakarere ve, imba ovaprofete. 5 Owo ve mu raera kutja mu ze ko kozondjira zeṋu zouvi na kozondjito zeṋu ozombi, kokutja mu ture mehi Muhona nda yandja ku eṋe nooiho mukururume ri rire ouini weṋu oukarerere. 6 Owo ve mu raera kutja amu he rikotamene nokukarera oomukuru varwe, nokutja amu ha pindikisa Muhona mokukarera oviserekarera vyovisenginina, mbi mwa ungura oveni. Andakuzu mwa kara nonḓuviro ku Muhona, eye ketje mu vera. 7 Nungwari Muhona omuini ma tja eṋe mwa panḓa okupuratena ku ye. Moruveze rwanao mwe mu pindikisa noviserekarera vyovisenginina vyeṋu, notji mwe riyetera oveni omberero.

8 “Eṋe tjinga amu ha puratenene ku ye, Muhona Omunamasaaehe opu ma tjere nai: 9 ‘Ami me kapaha omihoko avihe komukuma wokeyuva kokunene, nomukarere wandje Nebukadnesar, ombara ya Babilon, wina. Me kevieta vi yekurwisa ehi ra Juda novature varo noviwaṋa avihe vyopopezu. Ami me kanyona otjiwaṋa hi, nu e ketjiesa momatundu nga aruhe, tji rire ombunikiro ondirise nomburumise. Ami, ngu mbi ri Muhona, owami ngu mba hungire. 10 Ami me mwinisa ozondokohero zawo zenyando nozondjoroka nozombosiro zenyando pomikandi vyotukupo. Owo kave nokukara nomaze womamunine wawo, nu kamu tji nokukara ovikokotwa movitondero. 11 Ehi arihe ndi mari isiwa etundu, nu mari rire ombunikiro ondirise, noviwaṋa vyopopezu mavi karere ombara ya Babilon oure wozombura omirongo hambombari. 12 Nungwari kombunda yozombura omirongo hambombari nḓa ami me vere oBabilon nombara yatjo mena romauvi wawo. Ami me nyono ehi ra Babilon, e ri esa etundu nga aruhe, 13 ne vere ro noviwonga avihe, mbi mba tanda okueta ku ro na koviwaṋa, nu mbi mba hungira notjinyo tja Jeremia, okutja oviwonga mbi avihe mbya tjangwa membo ndi. 14 Me sutisa Ovababilon mena raimbi mbi va tjita; noviwaṋa ovingi nozombara ozonene maze ve isa po ovakarere.’ ”

Ombanguriro ya Ndjambi koviwaṋa

15 Muhona, Ndjambi wa Israel, wa tja nai ku ami: “Otjinwino tjomavinu tji tje ura nomazenge wandje, otjo hi. Kambura nu u tji tware koviwaṋa avihe ku me ku tumu, nu u ketjiyandje ku vyo. 16 Tji vya nu ku wo, ovyo mavi teratera nu mavi puruka ozondunge mena rovita ami mbi me hindi ku vyo.”

17 Ami otji mba kambura otjinwino hi meke ra Muhona ne ketjiyandja koviwaṋa avihe Muhona ke ndji tuma kutja vi kanwe ko komavinu nga. 18 Jerusalem novihuro avihe vya Juda puna ozombara zavyo novanane vavyo va tjitwa kutja ve nwe ku tjo, kokutja vi rire okuti onguza, ombunikiro ondirise nomburumise, nokutja ovandu ve ungurise omana wavyo otja osengiro, otja tji ve tjita nga nai.

19 Omana wa imba mba sere okunwa kotjinwino hi, owo nga:

Ombara ya Engipte novahongore novanane vayo,

20 nOvaengipte avehe novozonganda avehe mbe ri mOengipte,

nozombara azehe zehi ra Us,

nozombara azehe zovihuro vyOvafilisti mbi, okutja Askelon na Gasa na Ekron, novature ovakwao va Asdod.

21 Wina pa ri ovandu avehe va Edom na Moab na Amon,

22 nozombara azehe za Tirus na kOsidon,

nozombara azehe zomakoverwa nge ri munda mbwina yOmuronga Mediterania,

23 novature vovihuro ooDedan na Tema na Bus, novandu avehe mbe henya ozondjise zawo,

24 nozombara azehe zehi ra Araba, nozombara zomihoko vyokuti onguza,

25 nozombara azehe za Simri noza Elam noza Medie.

26 Nozombara azehe zokomukuma wokeyuva kokunene kokure nopopezu koumweumwe.

Oviwaṋa avihe kombanda yehi mavi sokunwa kotjinwino hi. Korusenina ombara ya Babilon ondji mai nu ku tjo.

27 Muhona wa tja nai ku ami: “Raera koviwaṋa avihe mbi kutja ami, ngu mbi ri Muhona Omunamasaaehe, Ndjambi wa Israel, me vi rakiza kutja vi nwe nga tji vya pyaruka nokukunga, nu nga tji vya u nokuhinokusora okusekama mena rovita, mbi me hindi ku vyo. 28 Nu tji mavi panḓa okukambura otjinwino meke roye nokunwa ko, vi raera kutja Muhona Omunamasaaehe wa tja ovyo mavi sokunwa ko. 29 Ami me utu oviungura vyandje vyomanyoneno motjihuro tjandje omuini. Mavi tjangovasi mavi kara nokuhinokuverwa are? Ayee, kako, ovyo mavi verwa, orondu ami me hindi ovita kovature avehe vehi. Ami, ngu mbi ri Muhona Omunamasaaehe, owami ngu mba hungire.

30 “Ove, Jeremia, mo sokuzuvarisa omambo aehe ngu mba hungira. Raera ovandu mba nai:

‘Muhona ma tye ovimboro meyuru,

nu ma ṱuṱuma kombanda momaturiro we.

Eye ma tyere otjiwaṋa tje ovimboro;

eye ma ravaere otja ovarumendu mbu

mave yata omandjembere.

Omundu auhe kombanda yehi me mu zuu,

31 nombosiro yeraka re mai zuvaka

nga komaandero wehi.

Muhona u notjiposa noviwaṋa.

Eye ma eta oviwaṋa avihe kombanguriro,

nu ma zepa ovanauvi.

Muhona wa hungire.’ ”

32 Muhona Omunamasaaehe ma tja otjiwonga matji ya okuza komuhoko nga komuhoko, notjivepo otjinamasa matji tukuruka kokure komaandero wehi. 33 Meyuva ndo oturova twaimba mba ṱa i Muhona matu rimbara akuhe okuza kotjikoro tjimwe tjehi nga kotjikwao. Kape na ngu meve tjitire omutambo, notwo katu nokutoorwa okukapakwa. Otwo matu tendekwa kumwe otja ondundu yombumbi.

34 Rireye, oweṋe vanane, na eṋe mbu mu ri ovarise votjiwaṋa tjandje, ureye amamu riri! Kareye noruhoze, nu mu rangere moruuma! Orondu oruveze rwokuṱa kweṋu rwa yenene, neṋe mamu nyanyaurwa tjimuna ovitjuma ovihuze. 35 Kape nokukara ondauriro kovarise vozonyanda nomaheneno kovahona votupanda twozonyanda. 36 Purateneye omaravaerero wovarise vozonyanda nomaririro wovahona votupanda twozonyanda, orondu Muhona ma yandeke omaryo wawo!

37 Omaryo wohange maye nyonwa mena romazenge omandandi wa Muhona. 38 Muhona wa isa otjiwaṋa tje tjimuna ongeyama amai isa ondimba yayo. Outwe wovita nomazenge omandandi wa Muhona onga tjitukisa ehi okurira ongaango.