Daniel 9 - Herero Revision Bible (HRR)

Daniel ma kumbire otjiwaṋa tje

1 Omumedi Darius ngwa ri omuzandu wa Kerkes wa honaparera ouhona wehi ra Babilon. 2 Mombura ondenga youhona we ami ee rihongo nawa omambo omayapuke nu ee ripura nozombura nḓa omirongo hambombari Jerusalem tji matji rire otjitambatundu otja Muhona pa raerere komuprofete Jeremia. 3 Ami mba kumba nomasa ku Muhona Ndjambi ame riyarikaṋa ku ye, ame ritjaere kovikurya, amba zara ozombanda zomakutu namba haama momutwe. 4 Ami mba kumba ku Muhona, Ndjambi wandje ne hepura ourunde wotjiwaṋa tjandje.

Ami mba tja nai: “Muhona Ndjambi, oove omunene neṱe twe ku yozika. Oove omuṱakame komerikutiropamwe woye, nu u raisa orusuvero orukarerere ku imba mbe ku suvera nu mbe ṱakamisa omatwako woye.

5 “Eṱe twa tjita ourunde, twa tjita ouvi natu tjiti ouhasemba. Eṱe twa nakaura imbi mbi wa rakiza kutja tu vi tjite, nu twa yandja etambo ku imbi mbi we tu raisira kutja ovyo ombi ri ovisemba. 6 Eṱe katu puratenene ko kovakarere voye, imba ovaprofete, mba hungirire mena roye kozombara zetu na kovanane vetu na kootate mukururume na kotjiwaṋa atjihe. 7 Ove, Muhona, aruhe u tjita imbi mbi ri ovisemba, nungwari eṱe oveni twe riyetera ondjambu. Ihi ouatjiri ku eṱe atuhe mbu twa tura mOjuda na mOjerusalem, na kOvaisrael mbu wa rimba momahi wopopezu nowokokure, owo tjinga ave ha ṱakamene move. 8 Ozombara zetu novanane vetu nootate mukururume va tjita oviṋa vyohoṋi nu va tjita ourunde komurungu woye, Muhona. 9 Oove omunatjari nu u tu isira nangarire kutja twe ku pirukira. 10 Katu puratenene ko kove, Muhona, Ndjambi wetu, indu tji we tu raera kutja tu hupe otja komatwako ngu wa yandja ku eṱe novinyo vyovakarere voye, imba ovaprofete. 11 Ovaisrael avehe va katuka omatwako woye nu ave panḓa okupuratena ku imbi mbi wa hungira. Twa tjita ourunde komurungu woye, nove otji wa eta omasengiro nga kombanda yetu nga tjangwa mEmbo rOmatwako ra Moses, omukarere woye. 12 Ove wa yenenisa imbi mbi wa tja mo tjiti ku eṱe na kovanane vetu. Ove wa vera Jerusalem tjinene nai povihuro avihe mouye, 13 amo tu pe omberero aihe ndja tjangwa mEmbo rOmatwako ra Moses. Nungwari nandarire nambano, Muhona, Ndjambi wetu, eṱe katu rorere okukunyandisa omutima mokuisa omauvi wetu na mokukongorera ouatjiri woye. 14 Ove, Muhona, Ndjambi wetu, we rimanena okutuvera, nu wa tjita nao, ove aruhe tjinga au tjita imbi mbi ri ovisemba, neṱe katu puratenene ko kove.

15 “Muhona, Ndjambi wetu, ove wa raisa omasa woye mokupitisa otjiwaṋa tjoye mehi ra Engipte, nomasa woye ingee ye zemburukwa nga mba. Eṱe twa tjita ourunde nu twa tjita ouvi. 16 Ove moruveze ndwa kapita we tu yeura, nu o uhara amo pindikire Jerusalem rukwao. Otjo otjihuro tjoye, indji ondundu yoye ondjapuke. Ovature avehe vomahi omararanganda ve tara nonyengo kOjerusalem na kotjiwaṋa tjoye mena romauvi wetu na mena rourunde mbwa tjitwa i ootate mukururume. 17 Ndjambi, zuva ongumbiro nomeriyarikaṋeno wandje. Yarura ko ondjuwo yoye ndja nyonwa; i yarura ko kokutja auhe a tjiwe kutja oove ngu u ri Ndjambi. 18 Puratena ku eṱe, Ndjambi. Tara ku eṱe nu u mune oumba mu tu ri, nondatumisiro yotjihuro tji tji nena roye. Matu kumbu kove, tjinga au ri omunatjari, nu kamena rokutja eṱe twa tjita ousemba. 19 Muhona, tu zuvira. Muhona, tu isira. Muhona, puratena ku eṱe nu arikana u tjite nao! Kokutja auhe a tjiwe kutja oove ngu u ri Ndjambi, o wombo ko! Otjihuro hi notjiwaṋa hi ovyoye.”

Gabriel ma handjaura imbi mbya ukwa

20 Ami mba kumba komurungu ame hepura ourunde wandje nowotjiwaṋa tjandje tja Israel name riyarikaṋa ku Muhona, Ndjambi wandje kutja a yarure ko ondjuwo ye. 21 Ngunda ame kumbu, Gabriel, ngu mba mwine motjirimunikise ihi otjitenga, otja raukira poṋa pu mba ri. Orwo rwa ri oruveze rwombunguhiro yongurova. 22 Eye wa hungira a tja: “Daniel, ami mbe ya mba okukuvatera kutja u tjiwe inga omaprofetero. 23 Ove tji wa uta okuriyarikaṋa ku Ndjambi, eye we ku zuvira. Eye we ku suvera, nami otji mbe ya okukuraera eziriro. Nambano puratena nawa ami ngunda ame ku handjaurire omaheero wa ihi otjirimunikise.

24 “Ozombura omirongo hambombari povikando hambombari ombu ri oure woruveze Ndjambi ndwa zikamisa kokutja a kuture otjiwaṋa tjeṋu notjihuro tjeṋu otjiyapuke kouvi na kourunde. Ouvi mau isirwa, nousemba waaruhe mau zikamisiwa, kokutja otjirimunikise nomaprofetero vi rire ouatjiri, nokutja ondjuwo ya Muhona i yapurwe rukwao. 25 Tjiwa otjiṋa hi nu u tji zuve nawa: Okuza koruveze ndwi rwomarakiziro wokutungurura Jerusalem tji rwa yandjewa ngandu omunane omutoororwa wa Ndjambi tje ya, mape kapita ozombura hambombari povikando hambombari. Jerusalem matji tungururwa, nomivanda noviyeure ovinamasa wina, nu matji kurama oure wozombura omirongo hamboumwe na mbari povikando hambombari, nungwari orwo maru rire oruveze rwomaumba. 26 Nu komaandero woruveze ndo omunane omutoororwa ma ṱu nokuhinombanguriro osemba. Otjihuro nondjuwo ya Muhona mavi nyonwa i otjimbumba tjovita otjindandi tjomunane omunauvara. Omaandero maye ya otja omupupo mbu mau eta ovita nonyoneno Ndjambi mbya rongerere rukuru. 27 Omunane ngwi ma kara nomazuvasaneno omazikame puna oviwaṋa ovingi oure wozombura hambombari, norumbembera rumwe rworuveze ndwi tji rwa kapita, eye ma yandja ozombunguhiro zovinamuinyo nozovikurya. Otjiyaukise Otjitirise matji zikwa kotjikoro tjotjipunguhiro, notjo matji kara ngo ngandu ingwi ngwe tji zika mbo tja munu omaandero Ndjambi nge mu ṱunina.”