Ovapangure 17 - Herero Revision Bible (HRR)

Ovisenginina vya Mika

1 Mehi rozondundu ra Efraim mwa turire omurumendu ngwa ri nena Mika. 2 Neye wa tja ku ina: “Ovimariva ovisilveri 1 100 mbya vakwa pove, nu mbi wa tjitira po osengiro, ndji mba zuva omuini, ovyo mbi vi na ami; owami omuini ngu mbe vi toora.”

Nu ina wa zira a tja: “Ngo serwe ondaya i Muhona, muatje wandje.” 3 Mika wa yarura ovimariva mbi ovisilveri 1 100 ku ina. Nu ina wa tja ku ye: “Ami me yapurire Muhona ovisilveri mbi kutja mbi tjurure osengiro komuatje wandje. Ovyo mavi sokuungurisiwa okutunga otjiserekarera tjotjisenginina tji tja hongwa nu ku kwa tuwa osilveri. Nambano ovimariva ovisilveri mbi me vi kotora kove.” 4 Mika wa yarura ovimariva mbi ku ina. Nu ina wa toora ovimariva ovisilveri omasere yevari ne vi yandja komuhambure. Omuhambure ngwi wa ungura po otjiserekarera tjotjisenginina tji tja hongwa nu ku kwa tuwa osilveri; notjo tja kazikwa mondjuwo ya Mika.

5 Komuhingo mbwi Mika otja ri nondjuwo ye omuini yomerikotameneno kovisenginina. Eye wa ungura ombanda yokoviṱuve noviserekarera tjiva vyomukuru wotjisenginina, na ziki omuzandu we umwe a rire omupristeri we. 6 Momayuva ngo kamwa ri ombara mOisrael, nu auhe aa tjiti otja kombango ye.

7 Nu oruveze tjingero ndo pa ri omurumendu omutanda ngwa turire mObetlehem mehi ra Juda, ngwa zire momuhoko wa Juda. Eye wa ri Omulevi ngwa turire mo otja owozonganda. 8 Omurumendu ngwi wa tjinda okuza mObetlehem mehi ra Juda okukapaha poṋa puma munu omaturiro. Nu mouyenda we mbwi eye weya kehi rozondundu ra Efraim nga pondjuwo ya Mika. 9 Mika we mu pura a tja: “Ove mo zu pi?”

Neye we mu zira nai: “Owami Omulevi, me zu kObetlehem kehi ra Juda. Mbi ri mouyenda wokupaha pu me munu omaturiro!”

10 Nu Mika wa tja ku ye: “Kara puna ami mba, nu u rire tate omuyandjandunge nomupristeri ku ami; ombura aihe me ku pe ovisilveri omurongo, nozombanda novikurya.” 11 NOmulevi omutanda ngwi wa itavera okukara mondjuwo ya Mika; neye wa kara otja omuatje we. 12 Nu Mika wa zika Omulevi ngwi a rire omupristeri we, neye wa tura monganda ya Mika. 13 Mika wa tja nai: “Nambano me tjiwa kutja Muhona me ndji ṋingaparisa, tjinga ambi nOmulevi ngwi okurira omupristeri wandje.”