Okuyarurwa ko koupe kwomuhoko wa Benjamin
1 Ovaisrael, mba woronganene mOmispa, va tjitire omakwizikiro ku Muhona ave tja: “Kape na umwe wetu, ngu ma yenene okukupisa omusuko we kOmubenjamin.” 2 Nokuzambo Ovaisrael va ya kObetel nave kakara ngo komurungu wa Ndjambi nga kongurova. Nowo va rira tjinene, 3 ave tja: “Muhona, Ndjambi wa Israel, pa tjitirwa tjike nai kutja pe kaere omuhoko umwe wOvaisrael ndindondi?”
4 Nu omuhuka omunene wependukirwa raindo otjiwaṋa tja sekama, atji tungu otjipunguhiro mbo natji punguha ozombunguhiro ozoningiririsiwa nozohange. 5 Tjazumba Ovaisrael arire tji va pura nave tja: “Omuhoko uṋe momihoko vya Israel mbu he ere kombongarero komurungu wa Muhona?” Orondu pa tjitirwe oruyano rwakatjotjiri kutja auhe ngu he ere ku Muhona mOmispa ma sokuṱa. 6 Nungwari Ovaisrael va ṱondjenda nomuhoko wawo Ovabenjamin nave tja: “Israel ndinondi tja pandjarisa umwe womihoko vyatjo. 7 Nambano matu tjiti vi kutja tu mune ovakazendu okukupisa kOvabenjamin mba sewa po? Orondu twa tjita oruyano ku Muhona kutja katu nokuvepa ovasuko vetu.”
8 Nowo tji va pura ave tja: “Omuhoko uṋe momihoko vya Israel mbu he ere komurungu wa Muhona kOmispa?” Pa munika kutja kape na umwe okuza kOjabes mOgilead ngwe ere kozondanda okukara pombongarero ndjo. 9 Notjiwaṋa tji tja varwa pa munika kutja kapa ri umwe wovature va Jabes mOgilead. 10 Ombongarero otji ya tuma ovarumendu omayovi omurongo na yevari, ovarwe ozombangaṋe, nomarakiza nga: “Twendeye mu kazepe ovature avehe va Jabes mOgilead, novakazendu novanatje wina. 11 Ihi tji mamu sokutjita, otjo hi: Zepeye ovarumendu avehe, nomukazendu ngamwa auhe ngwa rara puna omurumendu wina.” 12 Nu mokati kovature va Jabes mOgilead va kavaza mo ovasuko omasere yane mbe hiya rara puna ovarumendu. Nowo va etwa kozondanda kOsilo tji tji ri mehi ra Kanaan.
13 Nombongarero aihe ya tuma ovahindwa okukahungira kuna Ovabenjamin, mba ri pOruuwa rwa Rimon nave ningire okutjita ohange. 14 Ovabenjamin opu va kotokera, nave pewa ovasuko imba mba hupisirwe movakazendu va Jabes mOgilead; nungwari otjivaro tjovasuko mba katja yenenene ku wo.
15 Otjiwaṋa tja ṱondjenda nOvabenjamin, Muhona tjinga a haṋene omihoko vya Israel. 16 Novanane wombongo arire tji va tja: “Matu sokutjita vi na imba mba hupu kutja ve mune ovakazendu wina, imba ovakazendu vOvabenjamin tjinga ava nyonwa?” 17 Nu komurungu owo va tja nai: “Otjiwaṋa tjOvaisrael katji sokupandjarisa omuhoko umwe waimbi omurongo na vivari vyatjo. Ngatu pahe omuhingo wokutja omuhoko wa Benjamin au ha yanda. 18 Nungwari eṱe oveni kamaatu kupisa ovasuko vetu ku wo, Ovaisrael tjinga ava tjitire oruyano ave tja: ‘Nga sengwe ingwi ngu ma kupisa omusuko we kOmubenjamin.’ ”
19 Nowo opu va tjera nai: “Tara, pena omukandi wa Muhona, mbu tjitwa ombura aihe mOsilo.” Silo tji ri komukuma wokeyuva kokunene kwa Betel, komuhuka wondjira onene ndji ronda okuza kObetel okuyenda kOsikem, na komukuma wokeyuva kokumuho kwa Lebona. 20 Nowo va raera Ovabenjamin ave tja: “Twendeye mu kaṱare movikunino vyomivite, 21 nu mu katjevere nawa. Ovasuko va Silo tji mave tukuruka okupunda outjina motuteto, piteye momivite, nu auhe nge rikamburire omukazendu movasuko va Silo ne mu tware kehi rOvabenjamin. 22 Nu ndoovazu ooihe poo ovaṱena kwawo mave ya ku eṋe okutjita otjiposa, otji mamu tja nai ku wo: ‘Ve yandjeye ku eṱe, orondu katu ve kamburire ku eṋe movita kutja ve rire ovakazendu vetu. Nu tjinga amu he ve yandjere ku eṱe otji mu hi nokutura ondjo yokuteya omakwizikiro weṋu.’ ”
23 NOvabenjamin va tjita nao; auhe we ritoororera omukazendu movasuko imba mbaa ve pundu na twara. Owo va yaruka komahi wawo oveni, ave katungurura ovirongo vyawo nave tura mu vyo. 24 Nu moruveze tjingero ndo Ovaisrael va ya, nu auhe wa yaruka komuhoko we na keṱunḓu re, na kehi nda ri otjirumatwa tje omuini.
25 Nu moruveze tjingero ndo kamwa ri ombara mOisrael, auhe aa tjiti otja kombango ye.
© Herero Revision Bible © Bible Society in Namibia, 2021.
