1 Eyuva ndo tji reya, Muhona ma vere Leviatan, nengaruvyo re enamasa nezepe, indi enyoka enene enatjikara netirise ndi kara mokuvare.
2 Meyuva ndo Muhona ma tja nai: “Imburireye otjikunino otjimanise tjomivite! 3 Ami omuini, ngu mbi ri Muhona, me tji tjevere, nu me tji tjatja oruveze aruhe. Me tji tjevere omutenya nouṱuku kutja ape ha ningi omundu ngu me tji tjiti otjipo. 4 Ami hi tji nomazenge notjikunino tjomivite hi. Andakuzu mu tjo mu nomakuiya nominanyiva etje vi zukura ne vi nyosa nomuriro okuningirira. 5 Nungwari ovanavita notjiwaṋa tjandje tji mave vanga ondjamo yandje ngave tjite ohange na ami! Ii, ngave tjite ohange na ami!”
6 Omayuva ngu maye ya, Ovaisrael, ozondekurona za Jakob, mave hara omize otja outi, nowo mave nyomoka nave twako ozongara. Ouye mau ura novihape owo mbi mave eta.
7 Otjiwaṋa tja Israel katji vererwe i Muhona tjinene pu pe ṱeki ovanavita na tjo, nu wina eye ke tji zepere pu pe ṱeki mba pa zepa imba mbe tji zepa. 8 Muhona wa vera otjiwaṋa tje mokutjitwara mouhuura. Eye we tji hinga nombepo otjindandi yokomuhuka. 9 Nungwari ourunde wOvaisrael mau isirwa, nu Jakob ma kuturwa, indu owo tji mave kweye omawe wovipunguhiro vyovisenginina okusanisa korunḓunḓura rwomawe wovikango, nu tji pe he tji nokusewa ovipunguhiro vyomatwimisiro noviserekarera vyomukuru wotjisenginina oserekaze Asera.
10 Otjihuro tji tja zeuparisiwa tja rira etundu. Otjo tja isiwa tjo tjimuna okuti onguza, nu tja rira omaryo wozongombe, mu ze womba nokurya. 11 Otutavi twomiti twa kukuta nu twa teka, novakazendu ve tu tyora otja ozonguṋe. Otjiwaṋa tjinga atji ha ri nozondunge, Ndjambi, Omuute watjo, otjinga e hi nokutjiṱira ondjenda poo otjari.
12 Meyuva ndo Muhona ma woronganisa otjiwaṋa tje koumweumwe okuza konḓonḓu Eufrat nga komukuro wa Engipte otja omundu ngu ma sisa ovirya kovisisiro tje tjita.
13 Eyuva ndo tji re ya, ohiva mai posisiwa okuisana Ovaisrael avehe mbe ri mouhuura mehi ra Asirie, nu mba rimbara mehi ra Engipte kutja ve kotoke. Owo mave ya nave rikotamene ku Muhona mOjerusalem kondundu ye ondjapuke.
© Herero Revision Bible © Bible Society in Namibia, 2021.
