1 Nomakwizikiro wokuhita morusuvo rwe ngunda aye ri po, ngatu ṱakamise kutja kombunda ape ha kamunika aayo umwe mokati keṋu wa kaere omakwizikiro nga. 2 Eṱe twa zuva Ombuze Ombwa ndji otja wo; owo va zuva inga omazuvarisiro, nungwari kaye ve vaterere ko, tjinga ave ha kamburire mu imbi mbi va zuva. 3 Neṱe mbu twa kambura matu hiti morusuvo Ndjambi ndwa kwizika otja punga a tja:
“Momazenge wandje mba yana e tja:
‘Owo kamaave hiti mehi ami metje keve pa orusuvo!’ ”
Eye wa hungira omambo nga, nandarire kutja imbi oviungura vye vya ri avya manuka okuza kombutiro youye. 4 Orondu porive momatjangwa wa tja nai ohunga neyuva oritjahambombari: “Nu Ndjambi wa suva meyuva oritjahambombari koviungura vye avihe.” 5 Nu poṋa parwe ma tja nai: “Owo kamaave hiti mehi ami metje keve pa orusuvo.” 6 Nu imba mba tenga po okuzuva Ombuze Ombwa kave hitire morusuvo ndwi, tjinga ave ha ri nonḓuviro. Nungwari pena tjiva varwe mbu mave yenene okuhita mu rwo. 7 Ndjambi wa zika rukwao eyuva, ndi ku za “ondinondi”. Nu ozombura ozengi kombunda yanao eye wa hungira ro notjinyo tja David otja tjinga apa heerwe rukuru:
“Tji mwa zuu imbi Ndjambi mbi ma hungire ndinondi,
amu kukutisa ko omitima vyeṋu.”
8 Andakuzu Josua we ve hitisire morusuvo Ndjambi ndwa kwizikire, Ndjambi katja hungira eyuva rarwe kombunda yanao. 9 Nu ingee pe nomasuviro kotjiwaṋa tja Ndjambi otja inga owa Ndjambi meyuva oritjahambombari. 10 Orondu auhe ngu ma hiti morusuvo Ndjambi ndwa kwizika ma suva kotjiungura tje otja Ndjambi tja suva ku ihi otje. 11 Nu nambano eṱe ngatu kondje okuhita morusuvo ndwi, kokutja ape ha ningi umwe mokati ketu ngu ma kapandjara otja wo motjimbe tjokuhazuva kwawo.
12 Embo ra Ndjambi ri nomuinyo nu ri nomasa. Oro etwe okukapita engaruvyo ngamwa arihe, ndi konda kuvari, nu ri tuvakaṋa nga omuinyo nombepo pu vi hakaenena, nu nga omaṱupa nomongo pu vi hakaenena. Oro ri sosonona omeripura nomerizemburukiro womutima. 13 Nu kape notjiutwa tji tji undikwa komurungu wa Ndjambi; avihe vi munika nu vi ri poruhaera komurungu we. Neṱe tu sokuyandja omerizirira wovitjitwa vyetu ku Ndjambi.
Jesus eye Omupristeri Otjiuru omunene
14 Nu ngunda nambano atu nOmupristeri Otjiuru omunene ngwa kakurama komurungu wa Ndjambi, okutja oJesus, Omuna wa Ndjambi, ngatu kakatere kongamburiro, ndji tu hongonona. 15 Omupristeri Otjiuru ngu tu na ye kaye ngwi ngu ha sora okuṱondjenda nomaungundi wetu; eye wa rorwa momuhingo ngamwa auhe otja eṱe, nungwari eye ka tjitire ourunde. 16 Nu ngatu ye noupandi kotjihavero tjouhona tja Ndjambi tjotjari, kokutja tu kapewe orusuvero nu tu kamune otjari okuvaterwa moruveze orusemba.
© Herero Revision Bible © Bible Society in Namibia, 2021.
