Ozombunguhiro zOmerikutiropamwe omakuru
1 Omatwako wOvajuda owo ye ri tjimuna otjizire tjoviṋa oviwa, mbi mavi ya kombunda, owo katjiserekarerwa tjatjiri tjoviṋa mbi. Ozombunguhiro tjingezo ze punguhwa aruhe, ombura aihe. Nu inga omatwako kaye sora okukutura pu pa yenene imba mbe eta oviyandjewa vyozombunguhiro mena rourunde. 2 Imba mbe eta oviyandjewa vyozombunguhiro andakuzu va kohororwa kourunde wawo nambano na aruhe nave he tji kara nomeritjiviro wourunde nga, nu atjave isa okueta oviyandjewa vyozombunguhiro. 3 Nungwari otja tjinga ape ri nambano, ozombunguhiro ze punguhwa ombura aihe okuzemburukisa ovandu ourunde wawo. 4 Orondu ombinḓu yozondwezu zozongombe noyozongombo kamaai sora okuisapo ourunde.
5 Kristus opa zire okutja nai, indu tje ere mouye:
“Ove ko vanga ozombunguhiro noviyandjewa,
nungwari u vanga orutu ndu we ndji pa.
6 Ove ko nonyuṋe movinamuinyo
mbya ningiririsiwa kotjipunguhiro,
na mozombunguhiro zokuisapo ourunde.
7 Nami mba tjere: ‘Owami ngwi,
Ndjambi, mbi nonḓero okuyenenisa ombango yoye,
otja tji ya tjangerwa ami mEmbo rOmatwako.’ ”
8 Rutenga eye ma tja: “Ozombunguhiro noviyandjewa, ovinamuinyo mbya ningiririsirwa kotjipunguhiro nozombunguhiro zokuisapo ourunde ko nakuzevanga, nu ko nonyuṋe mu zo.” Eye ma tja nao nandarire kutja ozombunguhiro azehe nḓa maze punguhwa otja kOmatwako wa Moses. 9 Tjazumba eye ma tja: “Owami ngwi, Ndjambi, mbi nonḓero okuyenenisa ombango yoye.” Ndjambi otji ma isa po ozombunguhiro azehe ozonguru na yarura mo ombunguhiro ya Kristus moruveze rwazo. 10 Jesus Kristus tjinga a tjita imbi Ndjambi mbya vanga, eṱe atuhe otjinga atwa kohororwa kourunde i ombunguhiro yorutu rwe omuini, nambano na aruhe.
Ombunguhiro ya Jesus Kristus
11 Nomupristeri auhe u ungura otjiungura tje eyuva arihe, nu u punguha ozombunguhiro tjingezo potuingi, nungwari ozombunguhiro nḓa kamaaze sora okuisapo ourunde. 12 Nungwari Kristus wa punguhira ourunde ombunguhiro imwe na kakara pehi kokunene kwa Ndjambi nga aruhe. 13 Nambano eye ma undjire ngo, nga Ndjambi tja twa ovanavita na ye kehi yozombaze ze. 14 Nu nombunguhiro imwe ndji eye wa pwisa okumana imba mba kohororwa kourunde.
15 NOmbepo Ondjapuke wina ma hongonona ku eṱe. Rutenga eye ma tja:
16 “Inga onge ri omerikutiropamwe ami ngu me tjiti na wo
momayuva ngu maye ya, Muhona ma tja nai:
Ami me twa mo omatwako wandje momitima vyawo,
nu me ye tjanga momeripura wawo.”
17 Tjazumba eye ma tja: “Ami hi tji nokuuhara ame rizemburuka nourunde wawo nozondjito zawo zouvi.” 18 Nu tji mbe ve isire ourunde wawo, ombunguhiro yokuisapo ourunde kahepero rukwao.
Ngatu ye ku Ndjambi nomutima watjiri
19 Vakwetu, Jesus tjinga a punguha ombinḓu ye, otjinga atu nousemba okuhita motjouyapukeyapuke nomutima wouyara. 20 Eye we tu patururira ondjira ombe ndji twara ku Ndjambi, ondjira ndji twara komuinyo, okutuurungira merapi etjizikize, okutja omorutu rwe omuini. 21 Otja tji tu nOmupristeri Otjiuru ngu ṱakamisa ondjuwo ya Ndjambi, 22 opu twa sokuya ku Ndjambi nomutima watjiri nongamburiro ndja zikama; orondu omeritjiviro wetu womomutima ya kohororwa kouvi auhe, notutu twetu twa kohwa nomeva omakohoke. 23 Ngatu kakatere nokuhina kukeyakeya komaundjiro ngu tu hongonona, orondu Ndjambi eye omuṱakame, eye u yenenisa imbi mbya kwizika. 24 Ngatu rikenderasane mokupanḓiparisasana morusuvero na moviungura oviwa. 25 Atu isa okuyenda kozombongarero zombongo otja tjiva tjinga ave tjita; nungwari ngatu panḓiparisasane okuyenda ku zo, tjinga amamu munu kutja Eyuva ra Muhona ri ri pokuya.
Ndjambi u vera ourunde mbu tjitirwa wina
26 Tji matu panḓere pokutjitira wina ourunde, tji twa zu nokutjiwa imbwi ouatjiri, kape tji nombunguhiro rukwao yokuisapo ourunde. 27 Ihi nambano tji tji ri po owo nga omaundjiro omatirise wombanguriro, nomuriro omusesete mbu mau seseta imba mbe pirukira Ndjambi. 28 Omundu ngu ma katuka Omatwako wa Moses ma ṱu nokuhinokuṱirwa otjari, indu omahongononeno wavevari poo wavetatu tji ya raisa kutja eye u nondjo. 29 Mamu tjangovasi ingwi, ngu ma nyengwa Omuna wa Ndjambi, ngu ma tengurura ombinḓu yomerikutiropamwe ndje mu yapura, nu ngu ma yamburura Ombepo yotjari ma verwa pu pe ṱeki? 30 Orondu eṱe matu tjiwa ingwi ngwa tjere: “Ami me sutisa nu me vere,” na ingwi wina ngwa tjere: “Muhona ma pangura otjiwaṋa tje.” 31 Okuwira momake wa Ndjambi omunamuinyo oko otjiṋa otjitirise.
Panḓereye pongamburiro
32 Ripureye nomayuva inga omatenga, indu Ndjambi tje mu yerisire nondjerera. Nu zemburukeye indu tji mwa kara ovaṱakame nandarire kutja mwa ri kehi yondatumisire onḓeu tjinene. 33 Tjiva veṋu va yambururwa namu nyekererwa komurungu wovandu, nu tjiva veṋu va kara norupa momatatumisiro wa imba mba tatumisiwa komuhingo mbwi. 34 Eṋe mwa hihamisiwa pamwe naimba mba twirwe motjovakamburwa, nouini weṋu auhe tji wa pundwa, eṋe mwa zara otjiṋa hi nondjorokero, tjinga iyamu tjiwa kutja mu nouini ouwa tjinene komeho nu mbu karerera nga aruhe. 35 Amu imbirahi ouṱakame mbu mu na wo mongamburiro yeṋu, tjinga au eta ondjambi onene. 36 Eṋe otji mamu sokukara nonḓaro orure, kokutja mu tjite ombango ya Ndjambi, nu mu pewe imbi eye mbye kwizika. 37 Orondu omatjangwa maye tja:
“Pa sewa okaruveze okasupi uriri,
nu ingwi ngu kwa za meya otji meya;
nu ke nokuwomba.
38 Ovandu vandje ovasemba mave kara nomuinyo mongamburiro;
nungwari ingwi ngu ma yaruka ombunda,
ami hi nokukara ko nonyuṋe mu ye.”
39 Eṱe kaweṱe ovaimba mbe yaruka ombunda nave pandjara. Nungwari, eṱe tu nongamburiro, nu matu kara nomuinyo.
© Herero Revision Bible © Bible Society in Namibia, 2021.
